Tlehhema'aá ya/Abuuse 12 - Biblía Axweesantá Hhohho' ar Mungú 2004

Gaasár Yakobo nee tseegár Petro

¹ Deeloodae waawutmo Herode múk kríshaanáy guna bahh ohín, guri slahh'eemiís.

² Yakobo hhiyoó Yohane guri gaás ar paánga.

³ Ngiwa ár adór múk Yahudi adoodá' ngira qwal/atís, Petro guri óh sleeme. Qoomaadá' a qoomár deelór ur ar Mikaátér taa sluuftisiiká.

⁴ Ooharo nguwa hhe'eés, guna dahaás baraá doó tseegamo, guri qaás gawaá dabaá askaárír daqooroó tsiyáhh, as nguwa xuun, umuú daqto askaári tsiyáhh. Gár aa slaá' a gun dabaá múk i qaas, Pasaáka bira waaraáhh.

⁵ Petro kuna xún baraá doó tseegamór wa ale. Ala múk kríshaanáy Mungú guna firín ar ilakaaharu as inós.

Petro kuwa gweér nee malaykamo

⁶ Deeloodá' Herode nguwa duuxár wa slai, nee nguwa sihhitisi geeraá muu, xweeraawo Petro aa guú' tla/ángw askaarír tsár. Kwaa tsegiít ar pínguú tsár, nee xuumuuse i afkú doó tseegamór xuún.

⁷ Hamtidár kilá' malaykamoó Aako iri sihhiít bihhiiwós, do' iri gwa/aát, malaykamoodá' Petro guri tleés, guri báy, «Tlawáng ar gaanslaay.» Pínguudá' oo gawaá dabaawós iri paáhh.

⁸ Malaykamo iri oó', «Sihhiitáng, ya/ataawók dahaaseek.» Iri sihhiít, ya/ataawós giri dahaás, kuri báy, «Inqwaarirók tsiteek, aníng eeharáng.»

⁹ Iri ti'iít ay tsee/a, guri eehár, ala gaa xuuiiká adór malaykamo aa tleéhh adór tar ló'. Ala inós ngi xui a iigu'utu guna ár.

¹⁰ Nee afkú do' oo geera nee oo tsár kuwa waaraáhh, tari hardáh dír afkudá' úr oo muqsli, kudá' tar dahi baraá gixsa. Afkudá' iri kilós gweeriít. Tawa ti'iít, tari kumiít ay alhhe'eesoó loohidá'. Petro kuri geexáy nee malaykamo.

¹¹ Nee Petro iimirós iwa faxát, iri oó', «Daxta aga kángw kilá' wa tsaáhh adór Aako malaykamoowós ngura ya/aáw, as aníng iwa ba/amisi baraá dabaá Herodewo, nee baraá kangwdá' xoorór Yahudi sleémeero i daamaraan.»

¹² Nee qoomaadá' kaangwí nguwa aldakuuti baraá muunaáwós i ale, iri hardáh dír doó Maria, aayór Yohane, kudá' umuuwós oo tsár ta bay Marko, nee múk yaariír ta baraá do'dií dirii' ta firiirín.

¹³ Inós iwa afkú slumtá wa ateét, dasirka ta bay Roda ina iiár qaasár eér afkú do'.

¹⁴ Afór Petro ngiwa tsáhh, tam afkudá' gwa gwediká qwal/uwo, aqo ina gaanslár tiaiín baraá doó i alé, mukdá' baraá doó i dirií' guna ádbeemuú eér, adór Petro ir afkú dó' wa sihhimiít.

¹⁵ Kari báy, «Aga slarhhamút.» Ala inós axweesanto iri kumít iri kát, «Tí ar ló'.» Tari oó', «Gaasíng a malaykamoowós.»

¹⁶ Petro ina kumiít ateetiingo. Afkú do' nguwa gweeriyé', nguri ariyé', tari waa/oo/amín.

¹⁷ Giri kuútl ar daba' as iwa xasliitiya'. Adór Aako inós ngura baraá doó tseegamór wa duúx gari alki/iít. Iri oó', «Kaangwí amór Yakobo ti hardahase' nee hha'aá hatlá' sleeme.» Iri tláy amór hatlá'.

¹⁸ Qoomár iimi iwa /awakuúr askaári gurhaamír yaariir gari eér, ta kaahi, «Adór Petro aa /imiís laarí a adoomá?»

¹⁹ Tam Herode nguwa leelehhiít nee nguwa slayká, xuumuuseedá' gari yaahamaamiís, aluuwo hara'aya gari oó' kiwa tsuu/i. Aluuwo Herode yaamaá Yudea giri geexáy, iri /eét ay Kaisarea, iri amoodá' wa hoót.

Gwa'arár Herode

²⁰ Herode iri ló' wa buúhh dír múk Tiro nee Sidoni. Inooín kuri hara daqáy ar muunuú wakleeli'iima. Blasto kuna mulqi'iimár i tleéhh, asma Blasto an heé doó gu'utér waawutmo gu amohhe'eemiís. Tari wayduú áy amór Herode, asma múk yaamuuín muruú /ayma dír nguwa slaslay a dír yaamaá waawutmo.

²¹ Baalarka wák ar taa al'axweés, Herode tlabaawós awa waawuti'iima gina dahaás, iri iwiít gawaá kitaangós oo waawuti'iima, iri kwasleemuút geeraaín wa ale.

²² Muu iri tseeamín ar afór ur, iri káh, «Afoosíng a afór mungú, a afór heewooká!»

²³ Hamtidár kilae malaykamoó Aako Herode guna slaáhh, asma Mungú gwa xirfuú i haniisiiká. Kuri /aáy nee naanaga, iri gwaá'.

²⁴ Ala axweesantá Ya/abtór Aako iri kumít nee iri tsiyayaaxát.

²⁵ Barnaba nee Saulo gadiyér'ín ngiwa hhe'eesiyé', niri Yerusalemúr wa ki/iyé', ti al koná' nee Yohanedá' ta bay Marko.