Tlehhema'aá ya/Abuuse 11 - Biblía Axweesantá Hhohho' ar Mungú 2004

Petro iwa dír múk kríshaanáy oo baraá Yerusalemu

¹ Ya/abuuse nee hhae awa baraá yaamaá Yudea kaangwí nguna slayé', adór múk xoordaá hatlá' sleeme axweesantá Mungú kara ilaaóh.

² Nee Petro iwa Yerusalémúr i tsa/án, mukdá' hara'ayár al/utlo gaa ak ooha hhe'ees tari kaangaanuús,

³ tari káh, «Ahaá waáy kuúng masa amór múk taa al/utliniiká keér, tari al/ayiindé' nee inooín?»

⁴ Petro kaangwí adór ira tleehharuút iimír iimu/úngw wa tleemu, guri dir'íní alki/iít ar digir wakeetiingw, iri oó',

⁵ «Aníng niwa Yopárí dirii', qoomár niwa fiririim, iigu'utu una ár, gár adór inqwaarír ur ar ta kon ar pasleemaá tsiyáhh ana ár, kingi gawaá doorí wa /aytimiis ay didá' án ni dirii'.

⁶ Gadaádá' ana ló'wa ga/áw, án ngari aldakuút, makaá ya'a' tsiyáhh awa yaamu ngari ár, nee makaá sla/a, nee ya'a wasle, nee tsir/ooro.

⁷ Afo ngay axaás ar aníng babaw, ‹Pétro, tláw, muruusíng tsu/eek, /ayeek.›

⁸ Nay oó', ‹Aasla'áy, Aáko, asma gár ta waki laqaá ar slasla/aar, aníng aga baloó /ayiiká.›

⁹ Afoodá' nay malé gawaá doorí wa kí/, sagaáwa tsár wa ale, iri ó', ‹Muruú Mungú aa hhohhoeés, kuúng mu babawaar muruú slasla/arén.›

¹⁰ Adoodá' ina tleehharút sagaáwa tám wa ale, aluuwo muruudá' sleémeero kuri uuruúx ay gawaá doori.

¹¹ Nee siiwadár kilae múk tám naxés aa sihhiít geeraá do'daádá' ta i diriiaan, oo tinda Kaisareár wa ya/aáw amor'eé'.

¹² Qeeruú hhoohhoó' oo Mungú ina báy, ‹Nee mukí ti al koonde', ma xurumiitaar.› Nee hhaeeká' lahhoó' sleeme tay alkoomaán tay dahaán baraá doó heedaádá' i alé.

¹³ Inós ngiri alki/iít iwa kaahi, ‹Malaykamo ina sihhiít baraá dooeé', iri oó', muu ya/aaweek ay Yopa, as Simonuudá' ta babay Petro kuwa ateeti.

¹⁴ Inós axweesanoó kuúng u ba/amís nee múk do'ók sleémeero, ngu kuúngií oo'.›

¹⁵ Aníng axweesani ngiwa adoorí wa iimu/uúm, Qeeruú hhoohhoó' oo Mungú ina gawaaín i aweér, adoodá' iimu/uungo nira gawaarén i aweér.

¹⁶ /Aymuudá' Aako aa oó' nguri insláw, kudá' iwa oó', ‹Ar ló', Yohane ina baatimiís ar ma'aay, ala kuungá' tundu baatimiis ar Qeeruú hhoohhoó' oo Mungú.›

¹⁷ Qoomár atén Aako Yesu Kristo nguwa haratlintiaán, Mungú tina Qeeruuwós i haniís. Nee Qeeruudá' naa diréní haniís, bar guna dir'íní haniís sleeme, daxta án Mungú adór ngur baaq a adoomá?»

¹⁸ Axweesantí kawa axaás tari xasliít, Mungú kuri xirfeés, tari oó', «Laatí Mungú tam múk xoordaá hatlá' sleeme gwa pa/ángw i haniís oo hhu'u'uungw, as slafiingw nguwa slaya'.»

Múk kríshaanáy oo baraá Antiokia

¹⁹ Mukdá' aa diyaa/aat asma slahha'amaayér ur ar naa slayé', qoomár Stefano kuwa gaás, tana tláy ay Foinike nee Kipro nee Antiokia. Heé axweesantá Mungú gaa alki/iit i kaahh dír múk hatlae, aqo har dír múk Yahudi kilós.

²⁰ Ala baraaine bahh'alé a múk Kipro nee Kirene. Mukwí iwa hardáh Antiokia, kángw hhó' oo oo Aako Yesu kuri alki/iít dír múk Yunani sleeme.

²¹ /Uuruú Aako i gawaaín i dirii', nee múk yaariír Aako guna haratlintií' guri i warqáy.

²² Kángw mukwí kuna axaás nee múk kríshaanáy oo baraá Yerusalemúr i dirií'. Barnaba kuri ya/aáw ay Antiokia.

²³ Qoomár inós iwa hardáh, tsuuqaá Mungú ngiwa ár, ina qwalaá/, giri báy, «Aako ooha hhe'eesaak baraá munerhunge.»

²⁴ Asma Barnaba a heé hhoó', nee i haats Qeeruú hhoohhoó' oo Munguhe nee haratlintaaooro. Múk yaariír Aako guri haratlintií'.

²⁵ Barnaba Saulo guri leelehhtuú áy Tarsór i alé.

²⁶ Qoomár nguwa sláy nguri huúw ay Antiokia. Inooín kurkú wák kuri al faák nee eeharuuse, tidá' baraá Antiokiár i dirii', múk yaariír kuri intsaahhatimís. Yaamaá Antiokia an dír geera ar haratlintaauuse kawa báy kríshaanáy.

²⁷ Deeloodár kilae aaruuserka nina Yerusalemu wa /ét ay Antiokia.

²⁸ Oo wák tla/angw'ine ku babay Agabo, iri sihhiít iri oó' ar /uuruú Qeeruú hhoohhoó' oo Mungú, iwa kaahi, giyér yaariir ni tleér baraá yaamu sleémeerowo. Giyeérí niri tleér qoomár Klaudio tawa waawutmoó múk Roma.

²⁹ Eeharuuse iri al'axwés iri ó', «Umuúqo heewo alee/isoó i aleeslay ngu haniisi, as kuwa huwi amór hhaeerén kudá' yaamaá Yudeár i diriiá'.»

³⁰ Adoodá' taa al'axweés, kari tleéhh. Barnaba nee Saulo kiri ya/aáw, as alee/isaydá' kuwa huwi amór bariiseedár baraá yaamaá Yudéár i dirii'.