Tlehhema'aá ya/Abuuse 10 - Biblía Axweesantá Hhohho' ar Mungú 2004

Petro nee Kornelio

¹ De'emadaádae heeko i deer oo baraá gixsár Kaisarea. Umuuwós a Kornelio, geeraharusmoó slawtá ta bay, «Askaárír Italia.»

² Inós nee múk do'ose sleémeero ta Munguú ilaiwa/a/aat. Slám muu gun qaaqáy ilahhooár yaariire, nee Mungú gun firaarín daqisleém.

³ Looarka wake qoomár looár gwaleél ar tlaatla/aangw iigu'utu guna ár. Malaykamoó Mungú guna i daqáy, guri báy, «Kornelío.»

⁴ Kornelio malaykamoodá' guri i qaytsita hhe'eés, iri da'ayuút, iri oó', «Gaa a milá, aáko?» Malaykamo iri oó', «Firoorók nee ilahhooaro Mungú gaa ilaaóh, nee Mungú ga gunqareesiiká.

⁵ Gimáy, muu na ya/aaweek ay Yopa, Simonuudá' ta bay Petro ateeteek.

⁶ Inós a dahaaymoó heeko ta bay Simonú kadaá tlehhahhiít, do'ós i afaá tláwtí dirii'. Inós tidá' kuúng wa hariim tlehhmuuwo ngi oo'.»

⁷ Qoomár malaykamoodá' iwa tláy, Kornelio lawaaleerós ar tsár ar do'ós gari ateét, nee askaarmoó wák oo Munguú ilaiwawaá/, baraá askaáridá' inós umuú daqto gu sagadiyuusa.

⁸ Nee kaangwí sleémeero nguwa dir'ínií alki/iít, giri ya/aáw ay Yopa.

⁹ Bál tsár tawa baraá aaí dirii'i, gixsa kari i tseewúy. Qoomaadae Petro iri tsa/án gawaá daanduú do', as iwa firór ay. Qoomaadá' a looár lahhoó' ar tlaatla/aangw.

¹⁰ Petro iri qwariít, i /aymár slaa'. Qoomár tawa muruú /aymár amohhe'eemisi, iigu'utu guri ár.

¹¹ Doori giri ár naxés naa gweeriitiyé', nee gár adór inqwaarír ur ar pasleemo tsiyáhh kingi yaamií aweerimiis.

¹² Nee baraá inqwaaridae makaá da'awemo sleémeero awa ya'a' tsiyáhh i dayá', nee awa gur'ér ar hi'imiitá' sleeme, nee tsir/ooro.

¹³ Afo gari axaás i kat, «Pétro, tláw, makaysíng tsu/eek, /ayeek.»

¹⁴ Ala Petro iri oó', «Aasla'áy, Aáko, asma aníng gár ta waki aga baloó /ayiiká.»

¹⁵ Afo guri i hardát sagaáwa tsár wa aleeró, guri beér, «Muruú Mungú aa hheehhe'eés, kuúng mu slasla/aruú babawaar.»

¹⁶ Kaangwí ina tleehharuút sagaáwa tám wa ale. Naxés xooslmoodá' kuri adaá gawaá doorí wa ilaaóh.

¹⁷ Qoomár Petro iwa adór i laqi aldakuuti daanduú iigu'utuudá' aa ari mukdá' taa ya/aáw nee Kornelio naxés naa hardáh ta doó Simonuú yaahamiis, taa afkú slúmtí sihhiít,

¹⁸ tari ateét, tari oó', «Simonudá' ta bay Petro i baraá do'wíhe?»

¹⁹ Petro qoomaadae i iigu'utudá' aldakuut. Qeeruú hhoohhoó' oo Mungú guri báy, «Mukko tám i kuúng leelehhiit.

²⁰ Tláw, aweér, nee inooín ti koondé'. Ma xuruutaar, asma heé mukwí ngwa ya/aaw a aníng.»

²¹ Petro iri aweér amór mukdá', giri báy, «Heedá' ta leelehhita' a aníng. Ma katá'?»

²² Tari oó', «Kornelio, geeraharusmoó askaári, atén tina ya/aáw. Inós a heé ganaá', slám a heé Munguú ilaiwawaá/, nee adór tar heé hhoó' múk Yahudi sleémeero ga xuu'. Inós kuna ádbáy nee malaykamoó hhoohhoó' muu nguwa ya/aawi amoorók, as kuúng tawa amór do'ós i daqeer, as axweesantók ngiwa axaasi.»

²³ Petro mukdá' guri baraádií dahaás ar qwala/, baalaadae giri deeliís. Looaytleérós Petro iri tláy dinkwa nee mukdá', nee hhaeekaari gixsár Yopár hootá' tiri alkoné' sleémeero.

²⁴ Nee bál tsár malé alé iri hardáh Kaisarea. Amoodae Kornelio gina daamarán, nee múk do'ós gwa burumbuúr nee mulqeerose.

²⁵ Petro iwa dáh, Kornelio nina al'awín iri tumbarara'aát dír geeraawós i alé.

²⁶ Ala Petro guri tleés iri oó', «Sihhiít, asma aníng sleeme a hee.»

²⁷ Qoomár tawa axweesi, iri dáh baraá do'. Petro múk yaariír nguwa ár oo taa burumbuúr,

²⁸ iri oó', «Kuungá' a xuá' adór tar hariímarooká heé Yahudi iwa aldinku'uusi nee heé xoorór hatlá', tam nguwa i daqay. Ala Mungú nga dir'eénií laqán, án mawa gaa oó' daanduú heewo niwa oó' ‹ku harmeetín›, laqaá ‹ku slasla/aár›.

²⁹ Gaarí an gár aníng nisa amoorí hardáh qoomár tiwa ateet, mawa sií'. Ala hám daxta gár isa ateté' a milá?»

³⁰ Kornelio iri oó', «Laarí ar tsiyáhh qoomár looár gwaleél, aníng a saaliím baraá dooeé' wa aleeró. Heeko inqwar qwiirií/ nina geeraaeé' wa adaá ti'iít,

³¹ iri báy, ‹Kornelío, firoorók kaa axaás nee ilahhooarók Mungú ga gunqareesiiká.

³² Ala kuúng muu na ya/aaweek ay Yopa. Simon ateeteek, kudá' ta bay Petro. Inós haandá' i dír doó Simoní dirii', kudá' kadaá tlehhaahhiít. Do'ós i afaá tlawi. Nee Simon birna hardáh, inós kuúng u intsaahhatis.›

³³ Nee hamtidár kilae án muu nguri ya/aáw ay amoorók. Nee kuúng adór hhoo' aga tléhh niwa hardát. Ala hám daxta atén sleémeero a dír geeraá Mungú i diriiaán, as tidá' sleémeero ar Aako naa kuúng i hara'ayín kawa axaasaan.»

Alki/ituú Petro dír doó Kornelio

³⁴ Aluuwo Petro axweesani gari iimu/ún, inooín giri báy, «Daxta aníng aga tsaáhh adór Mungú ir barqaantír konká.

³⁵ Umuúqo heewo oo Mungú gu ilaiwawaá/, nee tidá' ganaa' ar Mungú i slai ga tlehhiít, inós ku ya/án nee Mungú, tam oo xooro gaalá.

³⁶ Kuungá' Ya/abtoodá' Mungú aa huúw dír múk Israeli a xuá', Ya/abtoodá' hho' ar wayda ar loohír Yesu Kristo. Inós an Aakoó muu sleémeero.

³⁷ Muruudá' sleémeero aa tleehharuut baraá yaamaá Yudea sleémeero kuungá' u xuá'. Ina iimu/ún baraá yaamaá Galilayár wa ale, alaá baatiismooduú Yohane aa alki/iít.

³⁸ Kuungá' kángw Yesú Nasareti u xuá', adór Mungú ngura Qeeruuwós oo hhoohhoó' i haniís nee /uuru. Inós ina hi'iimiít umuúqo diiro, gadiyér hho' gari tlehhiít, nee muu sleémeero guri hungu/uumiís, kudá' Neetlaangw aa slahh'eemiís. Asma inós nee Mungú a dinkwa.

³⁹ Nee atén a lamabu'uusér muruudá' sleémeero aa tleéhh baraá yaamaá Yudea nee baraá Yerusalemuro. Inooín inós kuna kikií' gawaá msalaába, kuri gaás.

⁴⁰ Ala Mungú guri waasle/atís bál tame, guri aleesleemuú i haniís iwa geehhouy.

⁴¹ Ala a dír muu sleémeerowooká, a dír ateédá' Mungú aa qaroó tsawaár lamabu'uusér wa ale. Atén ana /ayiimaán nee ana wahaamaán nee inós, alaá inós niwa waasleé/ baraá múk aa qaátl wa ale.

⁴² Yesu hara'aya ngina oó' ar muu kuwa Ya/abtór hhó' i alki/iitaan nee kuwa lamabu'uumaan, adór kwí tar kudá' taa hara'ayár i haniís nee Mungú, múk slaáf nee múk aa qatli nguwa sakwasleemuuti.

⁴³ Kwí aaruuse sleémeero guna adoorír lamabu'uún, as kahhó' umuúqo heewo oo gwa haratlintii', tlakweemaawós kiwa gurtláy ar umuuwós.»

Múk xoordu Qeeruú hhoohhoó' oo Mungú gwa ilaaóh

⁴⁴ Qoomár Petro iwa axweesantadí kahhi, mukdá' sleémeero axweesantadá' gaa axamiis, Qeeruú hhoohhoó' oo Mungú giri i aweér.

⁴⁵ Ala múk Yahudi kudá' aa haratlintii', kudá' nee Petro naa al daqaye', tari waa/oó/, asma Mungú múk xoordaá hatlá' sleeme gwa tawó qáy Qeeruú hhoohhoó' oo Munguhe.

⁴⁶ Asma tawa axweesi ar tsifrír xuawaslen nee Mungú kuwa diidi'iimisi kina axamiís. Petro iri oó',

⁴⁷ «Heé ma'aay gi /itiím a heemá ar mukwí kus baatisiiká. Asma mukwí Qeeruú hhoohhoó' oo Mungú gwa ilaaóh adór atén wa ale.»

⁴⁸ Petro iri oó', «Mukwí ku baatimiisi ar umuú Yesu Kristo.» Nee inooín Petro kuri firín iwa ayaaín wa hooti deelór niinawe.