Tlehhema'aá ya/Abuuse 1 - Biblía Axweesantá Hhohho' ar Mungú 2004

Al'axweesantá Qeeruú hhoohhoó' oo Mungú kuwa haniisi

¹ Kitaábuuduú geera nguna gooiím dír kuúng Teofilo, gawaá daanduú muruudá' sleémeero Yesu aa tleéhh nee aa intsaahhatimís iimír iimu/uungo,

² ay qoomaadá' inós kuwa ar tláy gawaá doori. Qoomaadae inós ya/abuuseerós tidá' aa tsawaár gana hara'ayiiyín ar /uuruú Qeeruú hhoohhoó' oo Mungú.

³ Alaá gwa'araarose inós tina laqaqán dír ya/abuuse deelo mibeeri tsiyáhh ar layaá dimbadimbé, adór inós ir slaáf. Nee kángw waawuti'iimár Mungú guri axweés.

⁴ Tam qoomár inós nee ya/abuuse tiwa doogiyé', giri hara'ayín, iri oó', «Ma ti'iitara' baraá Yerusalemuwo, ala al'axweesantá Baabá na daamaak, tidá' taa dir'eé' wa axasé'.

⁵ Asma Yohane ina baatimiís ar ma'aay, ala kuungá' tundu baatimiis ar Qeeruú hhoohhoó' oo Mungú alaá deeloorí niina aa meti.»

Yesu kuwa gawaá doorií ar tláy

⁶ Qoomár tawa burumburiít, ya/abuuse Yesu guri yaahás guri beér, «Qoomaarí a tidá' múk Israeli kuwa waawuti'iimar'ín i ki/ísa?»

⁷ Iri oó', «Siiwadá' nee qoomaadá' Baabá aa qaás baraá aleesleemuuwose a gadiyérhungeeká kawa xua'.

⁸ Ala kuungá' /uuru u sleerá' bál Qeeruú hhoohhoó' oo Mungú burna i hardáh. Nee kuungá' aníng iri lamabu'uundá' baraaká' Yerusalemuro, nee baraá Yudea sleémeero, nee Samaria, tam ay alhhe'eesoó yaamu.»

⁹ Axweesanaywí ooaro nguwa hhe'eés, qoomár inooín kuwa ga/ay, inós kurir gáwtí tláy, huunki guri ilaaót dír ilaaín wa ale.

¹⁰ Qoomár Yesu iwa gáwtí tláy, muu ilaaín giri kiririhhín gawaá doori. Múk tsár iri bihhaíní sihhiít oo inqwar /awák.

¹¹ Mukdá' iri oó', «Aá múk Galilaya, asma milá mas sihhimitá' tawa dooraá ga/eerá'? Yésuuwí gawaá doori tsa/a/ám ni kii/, ar adoosíng kura aandé' iwa tsa/a/an gawaá doori.»

Heé taa daanduú Yuda wa tsawaár

¹² Aluuwo ya/abuuse niri gawaá tloomár Seituúnír wa awét, tidá' bihhaá Yerusalemúrí tseew, tari kií/ ay Yerusalemu, tloomadá' saweemaawo a har qoomoó hi'iitanór deelór Sabaáto.

¹³ Tari dáh baraá do', tari tsa/án gawaá qoroófa, amoodá' geeraawo tawa iwiwiít. Inooín a kuká': Petro nee Yohane, nee Yakobo nee Andrea, nee Filipo nee Tomas, nee Bartolomayo nee Matayo, nee Yakobó Alfayo nee Simonudá' yaamuuwós aleeslaáqw, nee Yuduú Yakobo.

¹⁴ Mukwí sleémeero ina hoót ar muunuú wák baraá firooro, dinkwa nee /ameena sleeme, nee Maria aayór Yesu, nee hha'aá Yesu.

¹⁵ Looarka wake Petro iri sihhiít dír tla/ángw hhae. Faaror'ín a tsiiruú wák nee mibeeraá tsár. Iri oó',

¹⁶ «Hháe, Gooi gár kawa hariím aqo in bó/, tidá' Qeeruú hhoohhoó' oo Mungú aáng ira axweés ar afkú Daudi, daanduú Yudawo. Inós an kudá' múk Yésú oohár áw gwa geerahaar.

¹⁷ Inós geeraawo nee atén a dinkwa, asma inós sleeme kuna tsawaár as gadiyeérí atén ta tleehhaan kawa al tleehhaan nee inós.»

¹⁸ Heewí qaymo gari tlaáxw ar peésár aa sláy ar tlehhmuudá' tlaákw. Iri huú' ar hu'umaá tlakw. Iri pu/uút, waqatuuwós sleémeero iri tsee/ií ti'iít.

¹⁹ Kaangwí muu sleémeero oo Yerusalemu guri xuú', tam qaymoodá' kari báy Hakeldama tsifrir'ine. Gídaabárós a «Qaymór tseere».

²⁰ «Asma kaa gooín baraá kitaábuú Wara'amto, ‹Hotaangós i tawó iwiiti. Slám heé baraadá' wa hoót miwa deeruút.› Slám kaa gooín, ‹Gadiyeédá' i tlehhahhiti heé hatlá' ngi oohi.›

²¹ «Gawaá adoorihe múk nee atén aga al hotaatimaan i deer, deelo sleémeero qoomár Yesu iwa ayaarén i dirii'i, tam ay bál iwa ayaarén wa tláy,

²² iimír qoomaadár baatimisuú Yohane, ay bál Yesu kuwa dirén wa ar tláy, kuwa tsa/aás gawaá doori. I hariín heé wák iwa lamabu'usmoó waasle/uuwós tleehhiiti dinkwa nee atén.»

²³ Múk tsár kuri qaás, Yosefu kudá' ta bay Barsaba, nee umuuwós oo tsár a Yusto, nee Matiya.

²⁴ Mungú kuri firín, tari oó', «Aáko, kuúng munér muu sleémeero a xú', dír mukwí tsare heé kuúng taa tsawát laqaamang,

²⁵ asma pa/aangwí nguwa oohi nee gadiyeérír ya/abusi'iima, tí Yuda aa dakuús, iri amoorós i tláy.»

²⁶ Tsawdo kari tleéhh. Matiya kuri tsawaár, nee kuri harafaár tawa heé wák dír ya/abuuseedá' mibaá nee tsare.