TLAHHOÓ LAÁWI 9 - Biblía Axweesantá Hhohho' ar Mungú 2004

Aroni ilahhooa ngiwa haniís

¹ Deelo dakaát iwa waaráhh, alaá deeloodá' faanqw ar hariímár paraatla, Mose Aroni nee daaqaywose giri ateét dinkwa nee bariisér Israeli.

² Mose Aroni guri báy, «Tsa/atamoó awu taataahheek, as ilahhooár tlakweema hingeesa, nee gwaanda as ilahhooár da/a, muruuwí masók ku xaslxaansli wásl. Daqaní ki hanís dír AAKOÓ MUNGÚ.

³ Xoorór Israeli ka beer: Gurtuú wák slawaak as tawa ilahhooár tlakweema hingeesa, nee deelmoó bee/i taataahhaak nee dama, kuká' sleémeero masók awa kurkú wák, nee masók ki xaslxaansli wasl, as tawa ilahhooár da/a.

⁴ Awu nee gwaanda a ilahhooár wayda, ar ta gaasi ka dír AAKOÓ MUNGÚ ii haniisi dinkwa nee balángw taa aleedoók nee di/i. Asma AAKOÓ MUNGÚ laarí nu harati'iit.»

⁵ Xoorór Israeli muruuwí sleémeero kuri huúw dír geeraá heémár Mungú, adoodá' Mose ngira hara'ayín. Xooro sleémeero iri tseewuúr, iri sihhít dír geeraá AAKOÓ MUNGÚ.

⁶ Mose giri báy, «Adoorí an adór AAKOÓ MUNGÚ naa hara'ayín ar ta tlehha' as xirfuuwós nguwa dirhúngí laqan.»

⁷ Naagáy Mose Aroni guri báy, «Kitángw ilahhooa i tseewuweek, as ilahhooarók ar tlakweema hingeesa nee as ilahhooár da/ato kawa hanis, nee haraki/isa tleehheek as kuúng nee as xoorór Israeli. Kuúng ilahhooár muu haniiseek nee haraki/isa tleehheek as inooín, adoodá' AAKOÓ MUNGÚ ngira hara'ayín.»

⁸ Naagáy Aroni kitángw ilahhooa guri i tseewúy, damaadá' gay gaás as ilahhooa tlakweemaawós hingeesa.

⁹ Daaqaywós nguri tseereérí huyé', inós gari tikiís ar diitsarós, gari sliík ar xareemaá kitángw ilahhooa. Tseerér aa met gari ku'uús baraá gwe'eedá kitangwdá'.

¹⁰ Ala wahhna nee gumbayayá', nee de'eero ar sleedár ilahhooár tlakweema hingeesa, sleémeero gari daá/ gawaá kitángw ilahhooa adoodá' AAKOÓ MUNGÚ Mose ngura hara'ayín.

¹¹ Ala fu'unaay nee kaahari giri da/tá áy tsee/aá xafi.

¹² Naagáy Aroni sleedár ilahhooár da/a gari gaás. Daaqaywós tseere gari huúw, inós tseereedá' gari hikimiís gawaá kankeemaá kitángw ilahhooa.

¹³ Naagáy kuri ilahhooár dá/átí huúw ar fu'unaá taa supín nee saga, inós giri daá/ gawaá kitángw ilahhooa.

¹⁴ Xooslár gura' nee ya'a' giri hamaátl, giri daá/ dinkwa nee ilahhooár da/a gawaá kitangwduú ilahhooa.

¹⁵ Naagáy Aroni ilahhooár muu gari haniís, leei gari taataáhh as tawa ilahhooár muu ar tlakweemaaín hingeesa, gari gaás, gari ilahhooár tlakweema hingeesár wa haniís, adór tidár geeraá wa ale.

¹⁶ Ilahhooár da/a gari huúw dír geera, gari haniís ar adoodá' kara hara'yín.

¹⁷ Ilahhooár balaangw gari huúw dír geera, tsa/oó wák guri dalaá/, guri daá/ gawaá kitángw ilahhooa dinkwa nee ilahhooár da/a ar umuúqo matlaatle.

¹⁸ Aluuwo Aroni awu nee gwaanda giri tsuú/ as ilahhooár wayda as muu. Daaqaywós tseere gari dirósí huúw as ngiwa hikimiisi baraá badu sleémeero ar kitángw ilahhooár.

¹⁹ Wahhnár awu nee ar gwaanda nee hhaysho, nee wayoodaá xooslár gura' nga tuuntuukiye', nee gumbayayá' nee de'eero,

²⁰ kiri qaás gawaá de/eewo, inós giri daá/ gawaá kitángw ilahhooa.

²¹ Ala de/eewo nee yaaér doó /iyáy Aroni giri gáwtí tleés as ngiwa haniisi dír AAKOÓ MUNGÚ ar adoodá' Mose ngura hara'ayín.

²² Aroni ilahhooa sleémeero hanmisuwo ngiwa hhe'eés, adór ilahhooár tlakweema hingeesa, nee ilahhooár da/a nee ilahhooár wayda, dabaawós giri gáwtí tleés amór muu, guri tsuúq, naagáy niri aweér.

²³ Naagáy Mose nee Aroni tari dáh baraá heémár Mungú, tawa ti'iít muu kuri tsuúq, nee xirfuú AAKOÓ MUNGÚ iri geehhooúy dír muu sleémeero.

²⁴ AAKOÓ MUNGÚ asla ngay huúw, ilahhooár da/a gay /ák nee wahhnadá' gawaá ilahhooárí diriia. Muu sleémeero asla kawa ár tari tseé', tari gur'eérár huuhu'ún.