TLAHHOÓ LAÁWI 8 - Biblía Axweesantá Hhohho' ar Mungú 2004

Aroni nee daaqaywós kiwa paraátl

¹ AAKOÓ MUNGÚ Mose guna báy,

² «Aroni ar tlaweek nee daaqaywose, nee tlabadaá kaahamuuseero, nee dí/tá kir iimbalaxa nee awuú ilahhooár tlakweema hingeesaro, nee gwaandaawe tsár, nee lakwaantír mikaátér taa sluuftisiiká.

³ Daqaní dinku'uumár Israeli sleémeero i burumburit dír afkú heémár Mungú.»

⁴ Mose adoodá' kwaa báy nee AAKOÓ MUNGÚ gari tleéhh. Xooro sleémeero iri burumburít dír afkú heémár Mungú.

⁵ Mose xooro sleémeero gari báy, «Gár ni oo' a tidá' AAKOÓ MUNGÚ naa hara'ayín kawa tlehhá'.»

⁶ Mose Aroni nee daaqaywós ngiri huúw, giri hheehhe'eés ar ma'aay.

⁷ Naagáy Aroni guri tsiitiís ar hiyaay, guri himuú afeetló i tseék, nee guri hiyoó niiná i dahaás, guri tsiitiís ar naifeéra, gari tseék gawaá afeetlo ar himuudá' taa parootuús.

⁸ Gawaá da/eewaá Aroniwo tlakoó da/eewo gway qaás, tlaa/eedá' ta bay Urimu nee Tumimu giri baraadií qaás.

⁹ Mose Aroni guri kofiyá i dahaás, amór geeraawo gaa slamangwdá' taa parootuús oo sahaábu i qaás, adoodá' AAKOÓ MUNGÚ ngira hara'ayín.

¹⁰ Aluuwo Mose di/i gari taataáhh, heémár Mungú gari iimbalaáx nee umuúqo gár baraadá' i diriia, gari paraátl.

¹¹ Di/i gari taataáhh, gari hikiís gawaá kitángw ilahhooa ki/ima faanqw, kitángw ilahhooa nee xosluuwós sleémeero giri paraátl, nee iimpe nee kitaangose.

¹² Mose Aroni gway saga iimbalaáx ar di/i as nguwa paraatli.

¹³ Mose daaqoó Aroni guri dír geerií huúw, giri tsiitiís ar hiyi'i, giri afeetle him'eérí tsegiít, giri kofiyadúwí dahmiís, ar adoodá' AAKOÓ MUNGÚ ngira hara'ayín.

¹⁴ Mose awuuduú ilahhooár tlakweema hingeesa nguri huúw, Aroni nee daaqaywós kuri saga dabií qaás.

¹⁵ Mose awuudá' guri gaás, tseere gari diitsarós ar tikiís, gari slikín ar xareemaá kitangwduú ilahhooa, as nguwa paraatli. Tseerér aa met gay ku'uús baraá gwe'eedaá kitangwdá' aa paraátl nee aa haraki/isár i tleéhh.

¹⁶ Naagáy Mose wahhna sleémeero ar baraá gura', nee wa/angwdá' afhhamít oo dae nee gumbayayá' nee tlawanqaarose, giri daá/ gawaá kitángw ilahhooa.

¹⁷ Ala fu'unaá awuudá', nee kaahartose, nee sankarose giri daá/ tsee/aá xafi, adoodá' AAKOÓ MUNGÚ ngira hara'ayín.

¹⁸ Mose gwaanduú ilahhooár da/a ngway huúw, Aroni nee daaqaywós dabaaín kiri qaás gawaá ságw gwaanduudá'.

¹⁹ Naagáy Mose guri gaás, tseerér gwaanduudá' gari hikimiís bihhe sleémeero ar kitangwduú ilahhooa.

²⁰ Mose gwaanduudá' guri supín, guri daá/ dinkwa nee sagose nee wayoowo.

²¹ Alaá xooslár gura' nee ya'aawo hamaatlár ma'aaywo kiwa hhe'eés, Mose gwaanduudá' guri daá/ gawaá kitángw ilahhooa, adór ilahhooár da/a ar slaahhareeriiwós AAKOÓ MUNGÚ ngu sla'atamisá', Mose adoorí gana tleéhh ar adór AAKOÓ MUNGÚ ngura hara'ayín.

²² Naagáy Mose gwaanduuduú tsár ngway huúw as Aroni nee daaqaywós kiwa paraatli. Inooín dabaaín ngiri qaasiye' gawaá ságw gwaanduudá'.

²³ Mose gwaanduudá' guri gaás, tseereerós gari sliík gawaá ságw iiár Aroni ar doó /iyáy, nee gawaá dugunoó dákw doó /iyáy, nee gawaá dugunoó yaaér doó /iyáy.

²⁴ Daaqoó Aroni niri hardáh, Mose giri sagér iaá doó /iyáy slikín, nee dugeenaá dabaawo nee dugeenaá ya'aawo sleeme. Tseerér aa met gari hikimiís gawaá kitangwduú ilahhooa bihhe sleémeero.

²⁵ Mose wahhna sleémeero ar hhaysho gari taataáhh, nee wayaá baraá guruuwo, nee de'eero nee gumbayayá', nee tlawaanqarose, nee tluwa/amoó yaaér doó /iyáy ar alu ar gwaanduudá'.

²⁶ Aluuwo baraá kikaápuuduú mikaátér taa dír geeraá AAKOÓ MUNGÚ i qaasi, mukaatmoó wák oo taa sluuftisiiká guri taataáhh, nee mukaatmoó wák oo taa dí/tí qaás, nee mukaatmoó niinahe. Sleémeero giri qaás gawaá tlawaanqaadá' nee gawaá yaaér doó /iyáy ar gwaanduudá'.

²⁷ Mose muruudá' sleémeero guri haniís dír Aroni nee daaqaywós, inooín kuri gáwtí tleés as kuwa dír AAKOÓ MUNGÚ i haniisi.

²⁸ Mose muruudá' sleémeero guri baraá dabaaín wa taataáhh, guri daá/ gawaá kitángw ilahhooa dinkwa nee ilahhooár da/a. Gaarí an ilahhooár paraatla tidá' slaahhareeriiwós AAKOÓ MUNGÚ ngu sla'atimisá', tidá' ta hanmiisi ar asla.

²⁹ Mose fu'unaá da/eewo giri taataáhh, nee giri gáwtí tleés, as ngiwa haniisi dír AAKOÓ MUNGÚ, da/eewaá gwaanduú tara partliít awa Mose, ar adoodá' AAKOÓ MUNGÚ ngira hara'ayín.

³⁰ Naagáy Mose di/tá iimbalaxaangw nee tseerero giri taataáhh gawaá kitángw ilahhooaro, giri hikimiís gawaá Aroni nee daaqaywós nee gawaá tsitay'ín. Gawaá adoorihe Mose Aroni nee daaqaywós nee tsitay'ine giri paraátl.

³¹ Mose Aroni nee daaqaywose giri báy, «Fu'unaay dahhsak dír afkú heémár Mungú wa ale, ki /agá' dír afkú heémár wa ale, nee mikaátér baraá katatír ilahhooár paraatla. Adoodá' ngira hara'ayiím niwa oó', ‹Tí kan /aay nee Aroni nee daaqaywós.

³² Fu'unaá naa meetiye' nee mikaáte sleémeero ki dá/.

³³ Ma baloó tsee/aá heémár Mungú i ti'iitara' deelo faanqw, ay dír deeloodá' hariim ar paraatlarhúng i fak, asma a deelo faanqw.›

³⁴ Adoorí taa tleehhaán AAKOÓ MUNGÚ ngina hara'ayín as kuungá' nuwa haraki/isárí tleehhaan.

³⁵ Kuungá' an metá' dír afkú heémár Mungú deelo faanqw xweera nee tlaatla/aango, as tidá' AAKOÓ MUNGÚ naa hara'ayín kawa tlehhita', bara tsee/áy ti'ité' a qatlá'. Adoorí an adór aníng tira hara'ayín.»

³⁶ Aroni nee daaqaywós adoodá' AAKOÓ MUNGÚ ngira hara'ayín ar loohír Mose kari tleéhh.