TLAHHOÓ LAÁWI 7 - Biblía Axweesantá Hhohho' ar Mungú 2004

Ilahhooár dakuús hingeesa

¹ «Gaarí an dabér ilahhooár dakuús hingeesa, an ilahhooár hhoohhoo' kángw kilá' wa ale.

² Sleedár ilahhooár dakuús hingeesa dír kawa gaasi an dír slér ilahhooár da/a kawa gaamaamisi, nee tseereerós kan hikimiis badu sleémeero awa kitángw ilahhooa.

³ Wahhna sleémeero nee ar hhayshowo nee ar xoslaá gura' gaa tuuntuk kan duux, kari daa/,

⁴ nee gumbayayá' tsaraawo, nee tlawanqaarose, nee di/itidár gawaá slawuhe, nee wayoodá' gawaá de'eero.

⁵ Kaahamusmoó Mungú gin daa/ gawaá daanduú kitangwduú ilahhooa, tawa adór ilahhooár ta hanmiisi dír AAKOÓ MUNGÚ, as tawa ilahhooár dakuús hingeesa.

⁶ Umuúqo hhawaatuuwo baraá kaahamuusér Munguhe fu'unaay gin /aay didá' hhoohhoó' wa ale asma kiwa ló'wa hhohhó'.

⁷ «Dabér ilahhooár dakuús hingeesa nee ar tlakweema hingeesa a wak, kaahamusmoó Mungú kudá' haraki/imisuú tlehhiít, fu'unaydá' gin ar tláy.

⁸ Kaahamusmoó Mungú ilahhooár da/a gaa haniis ar umuúqo hee, kaahartá sleedá' taa ilahhooár wa daá/ gari ar tláy.

⁹ Ilahhooár balaangw ar taa qo humín baraá asla, laqaá baraá safúrya, laqaá xooslmoó garangariingw, ar kaahamusmoodá' gaa haniis.

¹⁰ Umuúqo ilahhooár balaangw ar taa aleedook ar di/i, laqaá ar taa aleedoogiiká ar di/i, ar xwaylár Aroni, sleémeero ka qasmiisi ar qoomoó alqoóm.»

Ilahhooár wayda

¹¹ «Gaarí an dabér muruú ta ilahhooár waydú wa tsu/i oo hee i haniisár wa slai dír AAKOÓ MUNGÚ.

¹² Barnaxes hee ilahhooár sluufoó wayda ga haniis as Mungú nguwa sluufmiisi, sleedá' ta gaasi ngi haniisi dinkwa nee mandásoó taa sluuftisiiká, oo taa dí/tár sliík, nee mikaátér ninakw ar taa dí/tár sliík, nee mandásoó puuruú natsaatsaá' oo taa aleedoók nee di/i.

¹³ Dinkwa nee ilahhooarós ar aa waydú wa gaasi as Mungú nguwa sluufmiisi, inós mandásoó taa sluuftís ngu huwi.

¹⁴ Hee mandasmoó wák gun haniis dír AAKOÓ MUNGÚ baraá umuú ilahhooaro, mandaásaydá' tari oo kaahamusmoodá' tseerér ilahhooár wayda gaa hikimiis gawaá kitángw ilahhooa.

¹⁵ Fu'unaá sleedá' taa ilahhooár waydú wa gaás, tidá' taa ilahhooár wa haniís dír Mungú, aqo kin /aay baalaadár kilae, ki mayká ay matlaatle.

¹⁶ «Ala bar sleedá' taa gaás ar ilahhooár al'axweesani, laqaá ar taa ilahhooár sla'aarír wa gaás, kan /aay baalaadár kilae, bartá aa met matloowose kan /aay.

¹⁷ Ala fu'unaá naa meetiye' ay bál tám, ki da/i.

¹⁸ Barnaxes fu'unaay awa ilahhooár wayda, kin /aay bál tame, ki ya/anká sleeme ki harafariiká bartá heé gaa haniis. Fu'unaydá' ki tlaakw, nee umuúqo heé gaa /ayi taa kilós tlakweemár áy.

¹⁹ Umuúqo fu'unaywo awa taa gár slasla/aár ár kwatiít mikiwa /aáy, ki da/i ar asla. Ala fu'unaá hatlá' kin /aay nee múk hhohhó'.

²⁰ Ala umuúqo heewo oo ta harmeetin oo fu'unaá sleedá' taa ilahhooár waydú wa gaás dír AAKOÓ MUNGÚ gaa /aay, ku baynitisi dír xooroorós ar Israeli sleémeero.

²¹ Umuúqo heewo oo gár slasla/aar gaa kwatiit, laqaá gár hee ar slasla/aar, laqaá makiito'ór slaasla/aar, laqaá umuúqo makiito'ór ta waki, fu'unaá taa ilahhooár wayduú wa haniís dír AAKOÓ MUNGÚ birnga /aáy, heewí ku baynitisi dír xooroorós ar Israeli.»

²² AAKOÓ MUNGÚ Mose guri báy,

²³ «Xoorór Israeli ka beeto, wahhnár hikwa nee ar bee/aangw, laqaá ar aara ma /ayaara'.

²⁴ Wahhnár slér aa tawo gwa', laqaá ar taa gaás nee makiito'ór sla/a, ka amohhe'és as gadiyedaá hatlá', ala ló' makawa /aáy.

²⁵ Hee tam gaalá bar wahhnár slér taa ilahhooár da/tá wa haniís dír AAKOÓ MUNGÚ gaa /aáy, kun baynitis dír xooroorós ar Israeliro.

²⁶ Baraá hotaahunge tseere ma baloó /ayaara', tam ar daa'awi gaalá, ar tsir/o laqaá ar makaay.

²⁷ Umuúqo heewo oo tseere gaalá gaa /aay kun baynitis dír xooroorós ar Israeliro.»

²⁸ AAKOÓ MUNGÚ Mose guri báy,

²⁹ «Xoorór Israeli ádbaweek, umuúqo heewo oo ilahhooár wayda ga gaas, aqo inósuú kilá' bartaka gan huuw amór AAKOÓ MUNGÚ.

³⁰ Ngin dabaawós awa kilár huuw tawa adór ilahhooár da/a, nee di/i nee da/eewo, gari gáwtí tlees as ngiwa haniís dír AAKOÓ MUNGÚ.

³¹ Kaahamusmoó Mungú wahana gari daa/ gawaá kitángw ilahhooa, ala fu'unaá da/eewo awa Aroni nee daaqaywós.

³² Yaaér doó /iyáy ar alu ar sleedár ilahhooár wayda an kaahamusmoó Mungú i hanisá'.

³³ Yaaeedá' tari ar kaahamusmoó Mungú oo xwaylár Aroni, kudá' tseerér ilahhooár wayda nee wahhnaaro gi hanmamiís.

³⁴ Asma anuú AAKOÓ MUNGÚ da/eewodá' taa haniís tawa ilahhooár ta gáwtí tleemisi nee yaaeedá' taa ilahhooár wa haniisi baraá ilahhooar'ín tidár wayduwo, aga hara'ayiím múk Israeli ngiwa haniisi dír kaahamusmo Aroni nee xwaylarós. Asma fu'unayká' kina dír kaahamuusér Mungú ii haniís ay alhhe'eesay wasle.

³⁵ Muruuwí kuna paraátl as Aroni nee xwaylarós baraá ilahhooadár da/a ta hanmiisi dír AAKOÓ MUNGÚ iimír bál kiwa kaahamuusér AAKOÓ MUNGÚ wa qaás.

³⁶ Bál kiwa paraátl, kiri iimbalaáx ar di/i, AAKOÓ MUNGÚ xoorór Israeli gana hara'ayín baraá ilahhooar'ín tidár da/to muruuwí kuwa hanmiisi dír kaahamuuse tawa gar'ín kureerisleém baraá qari sleémeero.»

³⁷ Gawaá adoorihe, gaarí an dabér ilahhooár da/a, nee ar ilahhooár balaangw, nee ar ilahhooár tlakweema hingeesa, nee ar ilahhooár dakuús hingeesa, nee dabér paraatla, nee ar ilahhooár wayda.

³⁸ AAKOÓ MUNGÚ Mose guna hara'ayaárí haniís gawaá tloomár Sinaír wa ale, baalaadá' Mungú xoorór Israeli ngiwa ádbáy ilahhooar'ín ngiwa huwiya' baraá xaanxoó Sinai.