TLAHHOÓ LAÁWI 6 - Biblía Axweesantá Hhohho' ar Mungú 2004

¹ AAKOÓ MUNGÚ Mose guri báy,

² «Barnaxes hee tlakweema gaa tleéhh dír AAKOÓ MUNGÚ ar inslaawmoowós nguwa al/aáy kángw peésaaro, laqaá gár tawa al'axweés, laqaá nguwa malguús, laqaá nguwa hara/uuntsín,

³ laqaá gár hee ar aa qwat gana sláy, inós lama gari tsaát, laqaá lo'ór lama gari /aáy daanduú umuúqo gaaro ar muu iwa dakumamisi,

⁴ heesíng tlakweema gaa tleéhh nee aa dakuús. Gadaádá' aa fiís ngi ki/isi, laqaá tidá' nguwa /aytín, laqaá peésaadá' kway haniís, laqaá gadaádár inslaawmoowós aa sláy,

⁵ laqaá umuúqo gár lama ar aa lo'ór wa /ayi, inós umuú gaaro gan buu', muruú kooán gun aldaaf ar gár wák.

⁶ Gwaanduú xaslxaansli wásl gun huuw dír kaahamusmoó Mungú as tawa ilahhooár dakuús hingeesa dír AAKOÓ MUNGUHE, laqaá gár alqoomá' nee tidár tlakweema hingeesa.

⁷ Kaahamusmoó Mungú haraki/isa gari tleehh as daanduú heedá' aa dakuus dír geeraá AAKOÓ MUNGUHE, heewí kuri gurtláy baraá muruudá' iwa dakuusi.»

Ilahhooár da/a ar gár ádkoom

⁸ AAKOÓ MUNGÚ Mose guri báy,

⁹ «Aroni nee daaqaywós hara'ayaarí baweek: Gaarí an dabér ilahhooár da/a/aangw. Ilahhooár da/a/aangw kan gawaá kitángw ilahhooárí máy xweera sleémeero ay matlaatle, kan ásltí gutlhhún, asltós miwa gwá'.

¹⁰ Kaahamusmoó tsitaywós kuduú kahamuusi'iima, kudá' taa tleéhh ar kitaáni gun dahaas gawaá daanduú surwaánirós tidá' ya'a' ququmát wa ale, tidá' taa tleéhh ar kitaáni. Inós da/aradár gawaá kitángw ilahhooár da/a gari hingees, gari qaas bihhaá kitángw ilahhooa.

¹¹ Naagáy tlabaadá' i kon giri duux, tlabaá hatlá' giri dahaas, da/ara gari huuw didá' taa fiíts ar xafto guruú tsee/a.

¹² Asltá gawaá kitángw ilahhooa gár kawa hariím inós gan gutlhhún as miwa baloó gwá'. Umuúqo matlaatleero kaahamusmoó Mungú migír gun baraá ásltí qamín, inós ilahhooár da/a gan qoomeemees. Gawaá asltadaádae wahhanadá' gan daa/ as wayda.

¹³ Asla in kumaamít ohmaango gawaá kitángw ilahhooár wa ale, miwa baloó gwá'.»

Ilahhooár bu'uungw

¹⁴ «Gaarí a dabér ilahhooár bu'uungw: Daaqoó Aroni gan haniis dír AAKOÓ MUNGÚ gawaá kitangwduú ilahhooa.

¹⁵ Kaahamusmoó wák tsa/oó wák oo puurú gun taataahh ilahhooár balángw wa alé dinkwa nee di/i, nee mooyángw tsuú', sleémeero gari daa/ gawaá kitángw ilahhooa, tawa inslaslaangw, slaahhareeriiwós AAKOÓ MUNGÚ nguri sla'atisiyá'.

¹⁶ Puuruú aa meet kaahamusmo Aroni nee daaqaywós ngun /ayiyá', ngun didá' hhoohhoo' ar baraá afeenár heémár Mungú wa /ayiyá', ala ku sluuftisiiká.

¹⁷ Ló' mukuwa humín, sleeme mukuwa sluuftís. Qoomayhúng ngwaa haniís baraá ilahhooarír da/to tindi amor'eé' hanimiisi. A ilahhooár ló'wa hhoohhoo' adór ilahhooár tlakweema hingeesa nee ar dakuús hingeesa.

¹⁸ Umuúqo hhawaatuwo baraá xwaylár Aroniwo an múk hariím gaarí kawa /ayi, asma kana paraátl umuú daqto as inooín, dír ilahhooadá'' ta dír AAKOÓ MUNGÚ i da/a/ana. Umuúqo heewo oo gaa kwatiit aqo in hhoohhooúy.»

¹⁹ AAKOÓ MUNGÚ Mose guri báy,

²⁰ «Gaarí an ilahhooadá' Aroni nee daaqaywós ta haniisi dír AAKOÓ MUNGÚ qoomár bar kaa paraátl nee kaa iimbalaáx ar di/i. Umuú deelooro, kílo wak ar puuruú natsaatsaá', matlaatleero tlaqi kan haniis, tlaqtá hatlá' tsiindo.

²¹ Puuruúdá' guri xwaranxwaar dinkwa nee di/i baraá xooslmoó garangariingw. Guri tleehh adór parhheemaá ninakw awa mikaáte, giri haniis tawa slaahhareeraá tsuu á' awa AAKOÓ MUNGÚ gu sla'atimiisá'.

²² Kaahamusmoó Mungú kudá' taa iimbalaáx ar di/i baraá tla/ángw xwaylár Aroniwo, as gadiyér ilahhooa hanmis ngiwa oohi, AAKOÓ MUNGÚ gun ilahhooarí haniis, ilahhooarí sleémeero kan daa/. Ilahhooarír da/a/aangw a hara'ayár kureerisleém.

²³ Ilahhooa sleémeero ar balaangw ar taa haniís nee kaahamusmoó Mungú, ka da/i sleémeero, nee makawa baloó /aáy.»

Ilahhooár tlakweema hingeesa

²⁴ AAKOÓ MUNGÚ Mose guri báy,

²⁵ «Aroni nee daaqaywós kibeeto, gaarí an dabér ilahhooár tlakweema hingeemis adór kar hanmisa'. Didá' slér ilahhooár da/a ki gaamaamisi an didá' slér ilahhooár tlakweema hingeesa kawa gaasi, dír geeraá AAKOÓ MUNGÚ. Ilahhooarí kari hhoohhoo' ló'wa ale.

²⁶ Kaahamusmoó Mungú kudá' ilahhooarí gaa haniis an kudá' ga /aáy, gan /aay didá' hhoohhoó' wa ale baraá afeenír heémár Mungú.

²⁷ Umuúqo gaaro ar fu'unaydá' gaa kwatit in hhoohhoouúr, tsitoó taa qo i taxaati nee tseerér ilahhooadá' aqo kun hamaatl didá' hhoohhoó' wa ale.

²⁸ Ilahhooarí bar kaa dahhás baraá xoslaá tleei, xosluudá' kin tsuu/, ala bar a baraá xooslár muqslár sirdaa/aten, xosluudá' kin hamaatl, kari slawawa/aas ar ma'aay.

²⁹ Umuúqo kaahamusmoó Munguhe ilahhooarí ga /aay. Gaarí an ilahhooár hhoohhoo' kángw kilá' wa ale.

³⁰ Ala ilahhooarír tlakweema hingeesa ló' makawa /aáy, tidá' tseereerós tinda huúw baraá heémár Mungú as haraki/imis kuwa tleehhi didá' hhoohhoó' wa ale. Ilahhooári kan daa/ ar asla.»