TLAHHOÓ LAÁWI 5 - Biblía Axweesantá Hhohho' ar Mungú 2004

Ilahhooa as tlakweemaá dimbadimbé kiwa hingeesi

¹ «Hee barnaxes kwaa ateét dír kwasleema as lamabu'uungw nguwa duuxi daanduú gár aa ari, laqaá ar aa axaasi, ala inós iri sií' ooaro, heewí adoorihe aa dakuús, gár kuwa hariím aqo kun doohhiis.

² «Laqaá barnaxes heeko baraá tla/angwhunge taa meetagaás ar adór aa haraxuiiká, tuuár makiito'ór sla/a gari kwatiít, laqaá ar slee, laqaá ar muruú ququmát, heewí i dakuúsár kón.

³ «Laqaá barnaxes hee heé taa meetagaás gwaa kwatiít, laqaá umuúqo gár inós gu meetagaasa, gaa kwatiít ar adór aa haraxuiiká, qoomár bar ngaa xuú' i dakuúsár kón.

⁴ «Laqaá barnaxes hee lo'o gaa huúw ar gaanslaay, adoodá' múk hatlá' i /imamisi gár tlaakw laqaá ar hhoo' ngiwa tleehhi, qoomár adoorí birnga tsaáhh i dakuúsár kón.

⁵ «Barnaxes hee baraá tlakweemakae, dakuúsarós gaa tsaáhh, daqaní ngi ooi.

⁶ Ilahhooár dakuús hingeesa ngi huwi dír AAKOÓ MUNGÚ, dareemír bee/i laqaá ar leei ngi huwi as tawa ilahhooár tlakweema hingeesa. Kaahamusmoó Mungú haraki/isa gan tleehh as daanduú heewí as tlakweemaadá'.

⁷ «Ala barnaxes dareemír bee/i ga aleeslayká hanisaro as tawa ilahhooár dakuúsarós hingeesa, as tlakweemaá aa tleéhh, inós hhookár tsár ngi haniisi, laqaá na/aá tsár awa hhooka, oo wák as tlakweema hingeesa, nee oo hatlá' tawa ilahhooár da/a.

⁸ Kari huuw dír kaahamusmo, ar wák gari ilahhooár tlakweema hingeesár wa haniis, gan tawo isa /uutl ala ga saga tu/iiká.

⁹ Tseere gari bahh sliik ar bihhér kitángw ilahhooa. Tseerér aa met gari ku'uus dír gwe'eedaá kitángw ilahhooa. Gaarí an ilahhooár tlakweema hingeesa.

¹⁰ Naagáy kaahamusmoó Mungú hhookidár tsár gan haniis tawa ilahhooár ta da/aa/an ar adoodá' kara hara'ayín. Kaahamusmoó Mungú haraki/isa gan tleehh as daanduú heewí as tlakweemaadá' aa tleéhh, inós kuri gurtláy.

¹¹ «Barnaxes hhooka tsár ga aleeslayká laqaá na/aá tsár awa hhooka, tawa ilahhooár tlakweemaadá' aa tleéhh hingeesa, puuruú kílór wák ngu huwi, ala munguwa dí/tí qaás laqaá mooyángw tsuú', asma gaarí a ilahhooár tlakweema hingeesa.

¹² Gun dír kaahamusmoó i huuw, kaahamusmo puruú tsa/oó wák gun daa/ gawaá kitángw ilahhooa tawa inslaslaangw, gun daa/ dinkwa nee ilahhooár da/a/aangw, gaarí tari ilahhooár tlakweema hingeesa.

¹³ Naagáy kaahamusmo haraki/isa gan tleehh as daanduú heewí as tlakweemaadá' aa tleéhh, inós kuri gurtláy. Puuruú aa meet tari oo kaahamusmoó Mungú, adór ilahhooár bu'úngw wa ale.»

Ilahhooár aslabu'uma

¹⁴ AAKOÓ MUNGÚ Mose guri báy,

¹⁵ «Barnaxes hee tlakweema gaa tleéhh ar adór aa haraxuiiká daanduú muruudá' hhohhó' ta AAKOÓ MUNGÚ i hanmiisi, inós gwaanduú xaslxaansli wásl ngu ilahhooár dakuús hingeesár wa haniisi. Kuúng tlaxór gwaandudá' an alqoomés nee tlaxór didá' hhoohhoo'. Tí an ilahhooár dakuús hingeesa.

¹⁶ Tam adoorihe muruudá' sleémeero hhohhó' aa hhitín gun buu', muruú kooán gun aldaaf ar gár wák, gari dír kaahamusmoó Mungú i haniis. Kaahamusmo haraki/isa gan tleehh as daanduú heewí ar gwaanduduú ilahhooár dakuús hingeesa, heedaádá' kuri gurtláy.

¹⁷ «Barnaxes hee tlakweema gaa tleéhh ar adór aa haraxuiiká, gár nee hara'ayár AAKOÓ MUNGÚ ti slawa'aaká gari tleéhh aa dakuús, heewí a doohhisa.

¹⁸ Inós gwaanduú xaslxaansli wásl gun huuw dír kaahamusmo, oo alqoomá' nee kuduú ilahhooár dakuús hingeesa. Kaahamusmo haraki/isa gan tleehh as daanduú heewí as tlakweemaadá' aa tleéhh ar adór aa haraxuiiká, heewí kuri gurtláy.

¹⁹ Gaarí an ilahhooár dakuús hingeesa, inós aa dakuús dír geeraá AAKOÓ MUNGUHE.»