TLAHHOÓ LAÁWI 4 - Biblía Axweesantá Hhohho' ar Mungú 2004

Ilahhooár ta hanmiisi as tlakweemaá pa/aayo hingeesa

¹ AAKOÓ MUNGÚ Mose guri báy,

² «Xoorór Israeli ka beeto, bar hee tlakweema gaa tleéhh ar adór aa haraxuiiká, gár nee hara'ayár AAKOÓ MUNGÚ ti slawa'aaká gari tleéhh, adór i tleehhi a tí:

³ Barnaxes heé adoosíng gaa tleehh a kaahamusmoó Mungú, kudá' taa iimbalaáx ar di/i, inós gár kuwa hariím a awuú niiná oo xaslxaansli wásl gun ilahhooár wa haniis dír AAKOÓ MUNGÚ as tlakweemaadá' hingeesa.

⁴ Inós awuuwí niiná ngu huwi dír afkú heémár Mungú, dír geeraá AAKOÓ MUNGÚ, dakós ngu qaasi gawaá ságw awuudá', daqaní awuudá' ngu gaasi dír geeraá AAKOÓ MUNGÚ.

⁵ Kaahamusmoodá' taa iimbalaáx ar di/i, tseerér awuudá' gan bahh taataahh gari ar dah baraá heémár Mungú.

⁶ Kaahamusmo gari tikiis ar diitsarós, gari hikimiis ki/ima faanqw dír geeraá AAKOÓ MUNGÚ didár inqwaarír dahmaá didá' ak hhoohhoo'.

⁷ Kaahamusmo tseereedá' gari bahh taataahh, gari sliik ar xareemaá kitángw ilahhooár mooyángw tsuú' kawa da/aa/an dír geeraá AAKOÓ MUNGÚ baraá heémár Mungú. Tseerér aa met gari ku'uus dír gwe'eedaá kitángw ilahhooa kay da/aa/an, kuduú dír afkú heémár Mungú.

⁸ Naagáy wahhna sleémeero ar awuuwí gan hingees nee wayoodaá xooslár gura' nga tuuntuuki'i.

⁹ Gumbayayá' tsaraawo nee tlawanqaarose nee wahhnár baraá slawuhe nee wayoodaá baraá daeero, gin hingees.

¹⁰ Wa/aangwí ta hingeemisi aqo adór kudá' taa hingeés dír awuú taa ilahhooár wayduú wa qaás, kaahamusmoó Mungú gari daa/ gawaá kitángw ilahhooár da/a/aangw.

¹¹ Ala kaahartá awuudá' nee fu'unaywo, nee sagose nee ya'aawo, nee xooslár gura' nee sankaarose,

¹² gídaabárós a muruuwí sleémeero aa meet oo awuuwí gun tsee/aá xáftí huuw, didá' taa fiíts ta da/arárí kwaakwahhi, guri daa/ ar asltá migír. Dír kway da/i a gawaá ufuudá' da/ara ki kwaakwahhi.

¹³ «Barnaxes dinku'uumár xoorór Israeli tlakweema gaa tléhh ar adór taa haraxuiiká, gár nee hara'ayár Mungú ti slawa'aaká kari tleéhh, inooín tari dakuús.

¹⁴ Qoomár tlakweemaadá' taa tleéhh birna xu'utitiyé', dinku'uumadá' awuú niiná gun gás as tawa ilahhooár tlakweema hingeesa, kuri huuw dír geeraá heémár Mungú.

¹⁵ Bariisér múk Israeli dabaaín kiri qaas gawaá ságw awuudá' niiná, naagáy kuri gaas dír geeraá AAKOÓ MUNGÚ.

¹⁶ Kaahamusmoodá' taa iimbalaáx ar di/i, tseerér awuudá' gari bahh huuw baraá heémár Mungú.

¹⁷ Tseereedá' gari tikiis ar diitsarós, gari hikimiis ki/ima faanqw dír geeraá AAKOÓ MUNGÚ didár inqwaarír dahmaá didá' ak hhoohhoo'.

¹⁸ Tseere gay bahh taataahh gari xareemaá kitángw ilahhooár sliik dír geeraá AAKOÓ MUNGÚ baraá heémár Mungú, tseerér aa met gari ku'uus dír gwe'eedaá kitángw ilahhooár da/a/aangw, kuduú dír afkú heémár Mungú.

¹⁹ Naagáy wahhna sleémeero ar awuudá' gari hingees, gay daa/ gawaá kitángw ilahhooa.

²⁰ Adoodá' ngira tleéhh dír awuuduú ilahhooár tlakweema hingeesa, an adoodá' i tleehhi dír awuuwihe sleeme. Kaahamusmo haraki/isa gan tleehh as inooín, inooín kiri gurtláy.

²¹ Inós awuudá' niiná guri tsee/aá xáftí huuw, guri daa/ adór kuduú geeraá wa ale. Gaarí an ilahhooár ta hanmiisi as tlakweemaá xooro hingeesa.

²² «Barnaxes geeraharusmo tlakweema gaa tleéhh ar adór aa haraxuiiká, gár nee hara'ayár AAKOÓ MUNGÚ, Munguúwós, ti slawa'aaká gari tleéhh, inós iri dakuús.

²³ Inós burkwa xu'utís tlakweemaawós kudae, inós gurtuú xaslxaansli wásl ngu haniisi, tawa ilahhooarós ar tlakweema hingeesa.

²⁴ Dabaawós ngi qaasi gawaá ságw gurtuudá' nee ngu gaasi didá' muruú ilahhooár da/a kuwa tsu/aa/in dír geeraá AAKOÓ MUNGÚ. Gaarí an ilahhooár tlakweema kir hingeesi.

²⁵ Kaahamusmo tseere gari bahh taataahh gari tikiis ar diitsarós, gari gawaá xareemaá kitángw ilahhooár dá/tár sliik, nee tseereedá' aa met ngi ku'uusi dír gwe'eedaá kitángw ilahhooár da/a/aangw.

²⁶ Wahhna sleémeero ar gurtuudá' gan daa/ gawaá kitángw ilahhooa, adór wahhnár gár taa ilahhooár waydú wa gaás ka /imaamisi. Gawaá adoorihe kaahamusmo haraki/isa gan tleehh as geeraharusmoodá', inós kway gurtláy.

²⁷ «Barnaxes a heé geeraharusmowooká tlakweema gina tleéhh ar adór aa haraxuiiká, gár nee hara'ayár AAKOÓ MUNGÚ ti slawa'aaká gari tleéhh, inós iri dakuús.

²⁸ Bar tlakweemadá' aa tleehhi kwa xu'utís, inós leeír xaslxaansli wasl gan haniis ilahhooarós wa ale as hingeesár tlakweemaawós kudá' aa tleéhh.

²⁹ Dakós ngu qaasi gawaá ságw leeír ilahhooár tlakweema hingeesa, nee gari gaas didá' muruú ilahhooár da/a/aangw kuwa tsu/aa/in.

³⁰ Kaahamusmo tseereedá' gari tikiis ar diitsarós gari sliik gawaá xareemaá kitángw ilahhooár da/a/aangw. Tseerér aa met gari ku'uus dír gwe'eedaá kitángw ilahhooa.

³¹ Wahhna sleémeero ar leeidá' gari hingees, adór tidár aaraá ta ilahhooár wayduú wa hanmiisi, ka /imaamiisi. Kaahamusmo gari daa/ gawaá kitángw ilahhooa, slaahhareeriiwós AAKOÓ MUNGÚ nguri sla'atisiyá'. Kaahamusmo haraki/isa gari tleehh as daanduú heewí, heewí kuri gurtláy.

³² «Bar hee gár naa huúw a bee/i as ilahhooár tlakweema hingeesa, ala masók gár ni huwi a dareemír bee/i ar xaslxaansli wasl.

³³ Dakós ngu qaasi gawaá ságw dareemirír bee/i ar ilahhooár tlakweema hingeesa. Ngi gaasi didá' muruú ilahhooár da/a/aangw kuwa tsu/aa/in.

³⁴ Kaahamusmo diitsarós gan tikiis baraá tseerér dareemidár ilahhooár tlakweema hingeemis, gari sliik gawaá xareemaá kitángw ilahhooár da/a/aangw. Tseerér aa met gari ku'uus dír gwe'eedaá kitángw ilahhooa.

³⁵ Naagáy wahhna sleémeero gari hingees adór tidár bee/ír taa ilahhooár waydú wa gaás ka /imaamisi. Kaahamusmo gari daa/ gawaá kitángw ilahhooa dinkwa nee ilahhooár ta da/aa/an ar ta hanmiisi dír AAKOÓ MUNGÚ. Kaahamusmo haraki/isa gan tleehh as tlakweemaá heewí as tlakweemaadá' aa tleéhh, inós kuri gurtláy.»