TLAHHOÓ LAÁWI 3 - Biblía Axweesantá Hhohho' ar Mungú 2004

Ilahhooár wayda

¹ «Barnaxes hee ilahhooarós ar wayda ar muruú ta tsu/i ga haniisár wa slaa', nee ilahhooarós ar awu laqaá slee, gaasíng tindi huwi dír geeraá anuú AAKOÓ MUNGÚ masók ka xaslxaansli wasl.

² Heedá' dabaawós ngi qaasi gawaá ságw sleedá' daqaní ka gaasi dír afkú heémár Mungú wa ale. Daaqoó kaahamusmo Aroni tseerér sleedá' ka hikimiisi bihhe sleémeero ar kitangwduú ilahhooa.

³ Wayo sleémeero awa xooslár gura' ngaa tuuntuukiye' awa sleedá' taa ilahhooár waydú wa gaás, kin daa/ tawa ilahhooár da/a ar ta haniisi dír AAKOÓ MUNGÚ,

⁴ sleeme gumbayayá' tsaraawo, nee tlawanqaarose, nee tidár gawaá slawuhe, nee wayoodaá gawaá daeero, inós muruuwí sleémeero ngu haniisi.

⁵ Daaqoó Aroni gari gawaá kitángw ilahhooárí daa/ dinkwa nee ilahhooadár da/a/aangw ar gawaá migírí dirii'. Gaarí an ilahhooár da/a ar slaahhareeriiwós AAKOÓ MUNGÚ ngu sla'atisá'.

⁶ «Barnaxes ilahhooarók ar wayda ar muruú ta tsu/i, tidá' ta hanis dír Mungú ar muruú ququmát, gwaanda laqaá bee/i, gaasíng ta hanis masók ka xaslxaansli wasl.

⁷ Gár ta haniisár wa sla' dír AAKOÓ MUNGÚ bar deelmoó bee/i, haniseek.

⁸ Dakók un qás gawaá ságw makiito'oodá', kari gás dír geeraá heémár Mungú. Daaqoó Aroni tseereerós ngi hikimiisiye' bihhe sleémeero ar kitángw ilahhooa.

⁹ Naagáy ilahhooarír wayda ar muruú ta tsu/i, tidá' ta da/i dír AAKOÓ MUNGÚ, adór kar hanisa' a adoorí: Tlawanqaarós, hhaysho in adá' altsát dír iisaapoó hhatsiinír daanda, dinkwa nee wayo sleémeero kudá' xooslár gura' nga tuuntuukiye', nee tlawanqaarose.

¹⁰ Gumbayayá' tsaraawo nee tlawanqaarose dinkwa nee wayoodaá gawaá dae, sleémeero in hingés.

¹¹ Naagáy kaahamusmoó Mungú gari daa/ gawaá kitángw ilahhooa, tawa adór muruú /aymár taa daá/ dír AAKOÓ MUNGÚ.

¹² «Bar ilahhooarók a leei, haniiseek dír AAKOÓ MUNGÚ.

¹³ Dakók un qás gawaá ságw makiito'oodá', ka gás dír geeraá heémár Mungú, nee daaqoó Aroni tseereerós ngi hikimiisiye' bihhe sleémeero ar kitángw ilahhooa.

¹⁴ Naagáy wayo sleémeero awa xooslár gura' nga tuuntuukiye' ngi ilahhooár da/tá wa haniisi dír AAKOÓ MUNGÚ.

¹⁵ Sleeme gumbayayá' tsaraawo nee tlawanqarose, nee tidár gawaá slawuhe dinkwa nee wayoodaá gawaá daeero, sleémeero ngi ilahhooár da/tá wa haniisi.

¹⁶ Aluuwo kaahamusmoó Mungú giri daa/ gawaá kitángw ilahhooa tawa muruú /aymár taa daá/ oo slahhareeraá koóm. Wahhna sleémeero ar AAKOÓ MUNGÚ.

¹⁷ Kuungá' wahhna laqaá tseere ma baloó /ayaara', hara'ayaarí ka otá' baraá xwaylarhúng sleémeero umuúqo dír ta hota'a.»