TLAHHOÓ LAÁWI 27 - Biblía Axweesantá Hhohho' ar Mungú 2004

Dabér muruú ta hanmiisi dír Mungú

¹ AAKOÓ MUNGÚ Mose guri báy,

² «Xoorór Israeli adoorí baweek, hee bar al'axweesantós gaa oó' dír AAKOÓ MUNGÚ ar hee nguwa haniisi, heedaádá' ga aleesláy al'axweesantós ngiwa hingeesi ar peésa ngiwa haniisi. Nee qoomoó peésa oo ta haniisi a kwí:

³ Hhawaatuú kureeri mibeeri tsár ay kureeri mibeeri lahhoó' kun tuu/ ar peésár shekeéli mibeeri kooán ar qoomoó peésár didá' hhoohhoo'.

⁴ Barnaxes a /ameeni, gár kar tu/i a shekeéli mibeeri tám.

⁵ Barnaxes heedaádá' a tla/ángw kureeraá kooán nee mibeeri tsár, tu/utós a peésár shekeéli mibeeri tsár, barnaxes a garma. Barnaxes a dasi, gár kar tu/i a shekeéli mibaangw.

⁶ Barnaxes a na/oó garma oo afiqoomár slahhángw wák nee kureeraá kooán, kun tuu/ ar shekeéli kooán ar peésa. Barnaxes a dasi, a shekeéli tám.

⁷ Barnaxes a heé kureeraá mibeeri lahhooe aa waaraahh, oo hhawaata gár kur tu/i a shekeéli mibaá nee kooán ar peésa, nee shekeéli mibaangw ar peésa barnaxes a /ameeni.

⁸ «Ala barnaxes heesíng a narkutmo bu'utusíng gu aleeslayká, heesíng ku huwi dír kaahamusmoó Mungú. Kaahamusmoó Mungú tlaxoorós gan qoomees ar adór aleesleemuú heé al'axweesani gaa oo'.

⁹ «Ala al'axweesani bar slér muu i ilahhooár wa hanmamisi dír AAKOÓ MUNGÚ, sleedá' ka hhoohhoo'.

¹⁰ I ya/aandaaká sleedá' kawa slér hatlár warqeesi, slér slaqwa hhoo' ka slér slaqwa tlaákwár warqeesiiká, laqaá ar slaqwa tlaakw kawa warqes ar slér slaqwa hhoo'. Bar aga warqés, sleémeero tsaraawo ki hhohho'.

¹¹ Barnaxes sleedá' taa al'axweesantá wa oó' ka waak, nee a daa'aweemaá harima'aaká haniisaro dír AAKOÓ MUNGUHE, naagáy heedaádá' gan huuw, gari haniis dír kaahamusmoó Mungú, gari tlaaxw.

¹² Nee kaahamusmo tlaxoorós gari tsaat adór kar hariím, ar adór slaqwa hhooár slee, laqaá slaqwa tlakwe, adoodá' kaahamusmo ngira tsaát an adoodá' ir qoon.

¹³ Ala barnaxes seebuúwós ga tu/utá wa slaa' baraá tlaxoodá' slee kar tlaxuna, shiliíngír mibeeri tsár baraá tsiiruuwo gan didií dook.

¹⁴ «Hee bar do'ós gwaa paraátl kuwa hhoohhoó' as AAKOÓ MUNGÚ, kaahamusmo tlaxór do'odá' gan qoomees, ar adór do'dá' kur hhoohhoó', laqaá kur slasla/aár, adoodá' kaahamusmo i ooi an adór kus hariím.

¹⁵ Barnaxes seebuú do' gwaa paraatl gu tu/utá wa slaa', gár kus hariím baraá tlaxoodá' do' kur tlaxuna, shilíngír mibeeri tsár baraá tsiiruwo gan didií dook.

¹⁶ «Hee bar hhapeerós ar aalirós gaa paraátl as ngiwa AAKOÓ MUNGÚ i haniisi, naagáy tlaxoorós kan qoomees ar afiqoomár dahaasíngw qaymoodá' kar dahasaasin. Kílór mibeeri tsár ar shayiíri, tlaxoorós a shekeéli mibeeri kooán ar peésa.

¹⁷ Barnaxes a qaymo gana paraátl baraá kurkú deelór ur oo mibeeri kooán, tlaxoorós gár kas hariím an adór tidár geera kara qoomeés.

¹⁸ Ala barnaxes gana paraátl alaá kurkudae, naagáy kaahamusmo tlaxoorós gan tsaat ar qoomoó kureeraá naa meetiye' dír inslaslángw kureeraá mibeeri kooán ira xayká, nee tlaxoorós gari /aarees.

¹⁹ Barnaxes inósú kilá' gan tu/utá wá slaa', gár kus hariím baraá tlaxoodá' yaamu kir tlaxuna, shilíngír mibeeri tsár gan dook baraá tsiiruuwo, tari tós.

²⁰ Ala barnaxes tu/uto ga slaiiká, laqaá ga heé hatlá' wa ila/án, ala qaymoosíng makawa baloó tuú/.

²¹ Baraá kurkú inslaslángw kureeraá mibeeri kooán, qaymoosíng ka may tawa ar AAKOÓ MUNGÚ ay alhhe'eesay wasle. Kaahamusmo an heé ga aál.

²² «Barnaxes hee qaymór aa tlaáxw gaa paraátl, ala tós ar aalirooká,

²³ kaahamusmoó Mungú tlaxór qaymoodá' gan qoomees ar kureeraá naa meetiye' dír inslaslángw kureeraá mibeeri kooán ira xayká. Heedaádá' i harín tlaxoorós ngiwa bui baalaadár kilae tawa adór tlaxór gár hhoohhoo' ar AAKOÓ MUNGÚ.

²⁴ Ala kurkú inslaslaangw oo mibeeri kooane a hariima qaymoodá' kawa ki/isi dír heedaádá' gaa weeriis asma a aalirós.

²⁵ «Umuú qoomaywo kun qoomees ar peésaadár shekeéli ar didá' hhoohhoo', qoomaydá' ta bay geéra bar mibeeri tsár, kan tlaaxw ar shekeélír wák.

²⁶ «I hariindaaká na/oó baris oo slee, laqaá oo bee/i kuwa paratl, asma hariimaro kwisíng oo AAKOÓ MUNGÚ.

²⁷ Barnaxes makiito'oodá' ka slaqwa tlaakw, seebuúwós gan tuu/ ar adoodá' kara qoomesé', nee shiliíngír mibeeraá tsár baraá tsiiruwo gan didií dook. Ala bar kaa tu/iiká ka weerisá' ar qoomayhúng kudá' taa qoomesé'.

²⁸ «Ala umuúqo gár taa paraátl as AAKOÓ MUNGÚ bar an hee, laqaá slee, laqaá yaamuuwós awa aali, muruuwí ku weerisiiká, laqaá ku tu/iiká. Umuúqo gár taa paraátl as AAKOÓ MUNGÚ ka hhoohhoo' kángw kilá' wa aleeró.

²⁹ Hee tam gaalá oo taa paraátl as AAKOÓ MUNGÚ as kuwa gaasi, mukuwa tuú/, a hariima kuwa gaasi.

³⁰ «Ilahhooadár gár wák baraá mibaango ta Mungú i hanmamisi ar balaangw, laqaá na/aá xaai, sleémeero ar AAKOÓ MUNGÚ, kaa hhoohhooeés as AAKOÓ MUNGÚ.

³¹ Barnaxes hee ilahhooarós ga tu/utá wá slaa', gan buu', baraá tlaxoodá' ngira tlaxwi shilíngír mibeeri tsár baraá tsiiruwo gan didií dook.

³² Qoomár hikwa faarooro umuúqo slér mibaangw kaa paraátl as AAKOÓ MUNGÚ.

³³ Hee tam gaalá i harinká sleedá' ngiwa weerisi, tam ka slaqwa hhoó', laqaá ka slaqwa tlaakw, makawa baloó warqeés ar slér hatlá'. Barnaxes kaa warqeés ar slér hatlá', tsaraawo kaa hhoohhooeés, ki baloó tu/iiká.»

³⁴ Gaarí an hara'ayár AAKOÓ MUNGÚ aa hara'ayín dír Mose gawaá tloomár Sinaír wa ale as xoorór Israeli.