TLAHHOÓ LAÁWI 26 - Biblía Axweesantá Hhohho' ar Mungú 2004

Tsuuqa as ialooa

¹ «Slaqsa'aá mungui mi tleehhara', slaqsoó taa hhaásl mu sihhtisaara', laqaá uheemi, laqaá slaqsoó tlaa/aá taa hhaásl baraá yaamuhunge, nee mu i tumbarara'amitara'. Aníng an AAKOÓ MUNGÚ, Munguúhúng.

² Deelór Sabaátor'eé' amohhe'eemisaak, nee didá' ak ló'wa hhoohhoó' ilaiwawa/aak. Aníng an AAKOÓ MUNGÚ.

³ «Barnaxes daber'eé' aga eehadé' nee kaahir'eé' kay oté',

⁴ aníng nun tluwáy haniís ar qoomoó hariím, yaamu nay bu'úngw yaariír i laqwaaliyá', xaa'aá baraá qamuuhúng na/ii ngiri laqwaaliyá' sleeme.

⁵ Balaangw slahhaango an kumaamitá' ay qoomár bu'úngw sabiíbu, nee bu'úngw sabiíbu ay qoomár tawa dahaasin. Muruú /aymár bu'uút un sleerá', nee an hotá' ar amohhooa baraá yaamuuhunge.

⁶ «Nun waydií haniís baraá yaamuwo, tam tari guá', tundu dae tlaaqiiká. Makaá xaraaslá' in hingeés baraá yaamuwo, nee yaamuuhúng slaqwara gi baloó haradatká.

⁷ Wakuuserhúng an gusá' nee an paangadúr tsu/á'.

⁸ Mukhúng oo kooán wakuusér tsiiru ngin guusiyá', nee mukhúng oo tsiiru wakuusér kumuú wák ngin guusiyá', wakuuserhúng an geerahúng wa qwaaresá' ar paánga.

⁹ Aníng kuungá' nu i qaytsiít nuri na/aá yaariír i haniís nee tari doogiindá', aníng alqador'eé' ngiri gawdeés dirhunge.

¹⁰ Qoomár bu'uungo kuungá' a qarnaa an /agá'. Nee slám qarna an bihhií qasá' as pa/aangw kuwa sleera' oo bu'úngw /abén kway qasa'.

¹¹ Aníng dír hotaaeé' an tleéhh baraá tla/angwhúng nee kuungá' nu baloó geexawaaká.

¹² An hi'iimiít baraá tla/angwhúng wa ale, aníng tari Munguúhúng nee kuungá' tari muk'eé'.

¹³ Aníng an AAKOÓ MUNGÚ, Munguúhúng, kudá' kuungá' naa baraá Misrír wa duux as tawa lawaalér múk Misrirooká. Aníng taaqwani aga geeqáw tidá' taa tseék gawaá isoohúng, as kahhó' tawa hota' ar amohhooa.»

Múk iawaslén lo'o gu /ák

¹⁴ «Ala bar aníng iga iiárií qasi'iiká, laqaá hara'ayar'eé' aga eehadi'iiká,

¹⁵ laqaá kaahir'eé' bara waaqaé' nee hara'ayar'eé' kay ahhé' nee daber'eé' kay meeré' sleémeero, nee alqador'eé' kay sié',

¹⁶ daqaní aníng adoorí an tleéhh, nun slaáhh ar nuwa de'ér urií huuw ar gaanslaay, nee tiqtír da/eewe, nee ga/atantá nu ila' taampuupuuw, nuri naduduúr. Dahaasingwhúng un dahaasiindá' ala u gár wa sleera'aaká, asma wakuuserhúng gun /ák.

¹⁷ Aníng nun harasihhiít, nee wakuuserhúng nuri múx, tunduri sawaawuti'ín nee kudá' naa aahhiye', tundun dae tlaaq, nee tari ti'i'iindá' tam handá' heé naa guus i kahhi.

¹⁸ «Nee tam alaá tunduwa doohhiís iga iiárií qasi'iiká, naagáy, nun doohhiís ki/ima faanqw as tlakweemaahúng.

¹⁹ Aníng daara/angwhúng un faák ar tluwaay nguwa ilaa/, asma doori in gawdeés adór muqsli, nee yaamuuhúng in gawdeés adór muqslír sirdaa/aat.

²⁰ /Uureemoohúng in tawo hhitiindá', asma qamuuhúng balaangw ngu hamareesiaaká, nee yaamuuhúng i mamaá laqwaliaaká.

²¹ «Bar aga kumité' aníng tlampa'amisuuwo nee iwa siasia' axamisuuwo, aníng muxtarhúng ngi male doók ki/ima faanqw ar qoomoó yaareemaá tlakweemaahúng.

²² Nun makaá xaraaslá' i tleés awa na/iihúng ngi xampoamiisá', nee hikwaahúng ngiri /ayiyá' nee faarorhúng iri /aaruúr, nee lohduuhúng niri warqayá' tari adór xaanxaay.

²³ «Barnaxes alaá muxtasinge aníng iga i warqeeri'iiká', ala ana kumité' tlampa'amisueene,

²⁴ naagáy aníng nee kuungá' tin tlampa'asaán nee nuri muúx ki/ima faanqw as tlakweemaahúng.

²⁵ Nun paángárí huúw as li/oó alqador'eé' tidá' taa geeqeeré' nguwa buu'. Kuungá' bara gobé' baraá gixsaduhúng, ala nuri tiqtír tlákw i kwaáhh, nee nuri baraá dabaá wakuuserhúng i qaás.

²⁶ Muruú /aymarhúng un /aareés, tam /ameenár mibaangw tla/afír wák gan wa huuriín, nun i qasmiisiyá' ar qoomaay. Tam alaá /aymaro kuungá' aqo qwaritá'.

²⁷ «Nee tam alaá tí sleémeero iga iiárií qasi'iikahe, ala an kumitá' iwa tlampa'amisa',

²⁸ naagáy aníng kuungá' nu tlampa'aás ar xarasleemaeé', nee nuri muúx anuú kilá' ki/ima faanqw, asma tlakweemaahúng.

²⁹ Na/iihúng awa daaqaay nee awa dasuuwo kiri /agá'.

³⁰ Dirhúng tidár firo ar gawaá gongoamo an hhitiím, kiteerihúng kudaá ilahhooa in feé/, nee kudá' mooyángw tsuú' tleemis, nee tu'uuhúng ngiri kwaáhh gawaá daanduú tuaá murslaaqatuhúng, qeeruueé' kuungá' nuri ló'wa aahh.

³¹ Gixsaduhúng in daá/, dirhúng tidá' hhoohhoo' an xaanxay tleéhh nee ilahhooár mooyangwhúng kudá' tsuú' u baloó ya/amaaká.

³² yaamuuhúng in hhitiím tam wakuuserhúng ar baraadií loohoó slaa' kiwa waa/oo/i.

³³ Nun tsiyayaáx baraá tla/ángw xoordu, nee nuri paangadúr ayá', yaamuuhúng niri darma tleehhiyá' nee gixsaduhúng niri hhituruutiyá'.

³⁴ Qoomár kuungá' bar baraá dabaá wakuuserhúng i diriá', an qoomár yaamu Sabaáto ngiwa saqwala/iya', qoomár niwa darma tleehhitiyé', yaamu niri hungu/usiyá' nee niri qwalaala/iyá' as Sabaátor'ín.

³⁵ Qooma sleémeero ar yaamu niwa darmuú wa iwiwiitiya', Sabaátor'ín ngin slayá', tidá' naa slayi'iiká' kuungá' tawa baraadá' wa hooté'.

³⁶ «Nee mukhúng bahh'ale oo aa meet un daeérí tleés gur'er'íne ma'aay ngay dalaa/iyá', baraá yaamaá wakuuser'ine, tam afór loo/ír fur'a ir tlatleer bar kaa axaás, gin tlatlahhás. Gin tlatlahhás adór múk aa slaqwarár wa goow. Nin gogowiyá' nay huhu'uná', tam heé gi gusisiím i kahhi.

³⁷ Tin i huhu'uná' tawo alé adór heé naa goow slaqwarár wa ale, tam heé gi gusisiím i kahhi. /Uuruú niiná ta koondá' i kaahh oo wakuusérhúng kawa bala'.

³⁸ An baraá tla/ángw xoordú i qwadá', nee yaamaá wakuuserhúng nun gu/iyá'.

³⁹ Barnaxes bartaka aa mét baraá yaamaá wakuuserhúng, nin naduumitiyá' nee niri faakiyá' as tlakweemaaín nee as tlakweemaá baabi'ii'ín.

⁴⁰ «Ala barnaxes tlakweemaaín ngaa hhu'uu'uné', nee tlakweemaá baabi'ii'ine, gawaá aahhidá' tinda aníng i tleehhi, nee inooín aníng iwa tlampa'aamisiye',

⁴¹ gár aníng nee inooín tisa tlaampa'aamisaán bar ngaa tsaahhiyé', nee gár ngisa huúw baraá yaamaá wakuuser'ín, nee barnaxes ar ló' muner'ín tidá' gawden aa wanana'át nee tlakweemaaín ngiri hhu'uu'uné',

⁴² aníng daqaní alqador'eé' an insláw, tidá' naa tleéhh nee Abrahamu, nee Isaka, nee Yakobo, nee yaamuudá' ngi al'axweés ngiri insláw.

⁴³ Qoomár inooín yaamuuín birnga geexayé', yaamu Sabaátor'ín ngin saqwalaa/iyá', qoomár bar yaamuuín naa darma tleehhitiyé', qoomaadae bar inooín tlakweemaaín ngaa hhu'uu'uné', kudá' hara'ayar'eé' ngiwa waaqaiyé', nee ngiwa aahhiyé',

⁴⁴ ala baraá tisíng sleémeerowo qoomár inooín tawa baraá yaamaá wakuuser'ín i dirii'i, aníng i kwahhaaká, laqaá i aahhaaká, tam ngiri ló'wa hhaamiís, nee alqador'eé' ngiri kwaáhh. Asma aníng an AAKOÓ MUNGÚ, Munguúín.

⁴⁵ Aasla'áy, as inooine alqador'eé' an insláw, tidá' naa tleéhh nee baabi'ii'ín, kudá' naa baraá yaamaá Misrír wa duúx, as án niwa Munguúín tleehhiit, adoorí xoordu ngina ariyé'. Aníng an AAKOÓ MUNGÚ.»

⁴⁶ Gaarí an dabe nee kaahi nee hara'ayár AAKOÓ MUNGÚ aa haniís dír múk Israeli gawaá tloomár Sinai wa ale ar dákw Mose.