TLAHHOÓ LAÁWI 25 - Biblía Axweesantá Hhohho' ar Mungú 2004

Kurkú faanqw

¹ AAKOÓ MUNGÚ Mose guri gawaá tloomár Sinaír wa báy,

² «Xoorór Israeli baweek, bara hardaté' baraá yaamuudá' anuú AAKOÓ MUNGÚ ni kuungií haniis, umuú kurkú faanqwe qamu in deelisá', mi dooslara', as ilaiwa/amer'eé'.

³ Kureeraá lahhooe qamu in doslá', nee an dahaasiindá', nee an bu'uundá', nee sabiíbuuhúng un tsoo/itá'.

⁴ Ala kurkú faanqw a Sabaáto, yaamu sleémeero nin hungu/uusiyá' nee an Sabaátór AAKOÓ MUNGÚ. Ma dahaasimaara', laqaá sabiíbuuhúng mu alkwasliimara'.

⁵ Kwaloó naa ti'iit mu buaara', laqaá sabiíbuú baraá xaa'aá taa fiitsiiká mu buaara'. Kurkudá' an kurkú hhape iwa hungu/us.

⁶ Tam kurkú qamu hungu/uusaro, qamu nun muruú /aymaárií haniisiyá', kuungá' nee lawaalerhúng ar hhawaate nee ar /ameenaaro, nee múk taa gadiyér wa qasé', nee hoomár baraá ayaahúng wa hoota,

⁷ nee makaá sla/ato nee hikwahunge, muruudá' sleémeero oo naa baraá deluú wa ti'iit ngun /ayiyá'.»

Deelór ur ar kureeraá mibeeri kooán

⁸ «Kureeri faanqw in faditá' ki/ima faanqw, dinkwaaro tari kureeri mibeeri tsiyáhh nee gwaleél.

⁹ Naagáy bál deelór mibaangw ar slahhángw faanqw tidá' haraki/isa kawa tlehha', hee un ya/abá' as tarumbeéta ngiwa ufaahhi baraá yaamu sleémeero.

¹⁰ Kurkú mibeeri kooán un ilaiwa/á' ar lawaale sleémeero kawa gweeri baraá yaamuwo. Kurkudá' tay kurkú taa paraátl oo deelór ur oo inslaslángw kureeraá mibeeri kooán. Umuúqo heewo daqaari'iimarós gari inkii/ nee múk do'ose.

¹¹ Asma kurkusíng tawa inslaslángw kurkú úr oo mibeeri kooán, dahaasiingw mu dahaasara', nee sleeme kwaláy mu bu'uumara', tam sabiíbuú xaaiiwós taa alkwasliiká mu bu'uumara'.

¹² Kurkusíng dirhunge a kurkú deelór ur, a kurkú hhoohhoó'. Adoosinge kwaloó naa baraá qamuú wa ti'iit kilós un /agá'.

¹³ «Baraá kurkusinge umuúqo gár taa weerisi gár kawa hariím a kan ki/is dír seebuúwós.

¹⁴ Bar yaamaá tlaxuún laqaá in weeramís dír inslaawmoowók, mu hara/uuntsimaar.

¹⁵ Tlaxór yaamu masók i alqoón nee faarór kureeraá kawa ki/isiiká dír seebuúwós.

¹⁶ Barnaxes kureeraá kawa /ak ki yaariir, tlaxo an dók, laqaá kureeri birki niina tlaxo an /aarés. Asma tlaxo kan qoomees nee balángw ni dirógií weeramiisi.

¹⁷ Miti hara/uuntsimaara', ala Munguúhúng na ilaiwawa/aak. Aníng an AAKOÓ MUNGÚ, Munguúhúng.»

Daawitamér kurkú faanqw

¹⁸ «Gawaá adoorihe daber'eé' an eehadá', nee kaahir'eé' an otá', as tawa hota' ar saxareema baraá yaamusingae.

¹⁹ Yaamu mamuuwós ngin duuxiyá' kuungá' kiri /agá', tari baraasíng wa hotá' ar saxareema.

²⁰ «Bar yaahamisá' tawa kata', ‹Ma /ayaán baraá kurkú faanqwe, bar dahaasingo ta ya/anká, laqaá bu'uungo?›

²¹ Gimsé', aníng yaamu in tsuúq bál kurkú lahhooe as bu'úngw bu'uút oo kureeraá tám nguwa hamareesiya'.

²² Bar aga dahaasindé' kurkú dakaate, qarnaár bu'úngw bál geera an /agá', nee tari kumitá' /aymaro ay kurkú gwaleél, kudá' tawa sangw bu'uunda'.»

Gadiyér yaamu /utla

²³ «Yaamu mi baloó weerisaara', asma a kwe'eé', nee kuungá' a dahaaye, nee aauuse baraá yaamueene.

²⁴ «An gár baraá yaamu sleémeero tas dabér koonda' ar yaamu kiwa tu/uunda'.

²⁵ Barnaxes hhiyaawók oo narkutmo hhape gaa weeriís, hhiyaawós oo tseéw i harín ngiwa tu/i.

²⁶ Ala bar heesíng i hhiyoó konká oo hhapeerós ga tuú/, aluuwo iri daqaari'iít aleesleemu gway sláy oo hhapeerós ngiwa tu/i,

²⁷ naagáy kureeri gin faar iimír hhape ngiwa weeriís, nee iri bu'ún, heedaádá' gaa tlaaxw a hariima ngiwa ki/isi.

²⁸ Ala barnaxes heedaádá' aleesleemu gu konká, yaamu ni meetiye' dír dabaá heedaádá' gaa tlaaxw ay kurkú deelór ur ar inslaslángw kureeraá mibeeri kooán. Baraá kurkusinge a hariima daqaari'iimasíng kawa geemay nee kawa ki/isi dír heedaádá' gaa weeriis.

²⁹ «Bar hee do'ós i hooti kuduú baraá gixsár taa harweér ar koo/i gwaa weeriís, tu/uto gu aleesláy baraá kurkú wake iimír nguwa weeriís. Baraá kurkusíng wake a hariímaarós nguwa tu/i.

³⁰ Barnaxes do'odá' taa tleéhh baraá gixsár taa harweér ar koo/i, kwaa tu/iiká ar afiqoomár kurkú wake, naagáy daqaní do'odá' oo heedaádá' gwaa tlaaxw baraá xwaylarós sleémeero ay alhhe'eesay wasle, nee sleeme ku ki/isiiká kurkú inslaslaángw kurkú mibeeri kooane.

³¹ Ala maraá baraá ayeemaá taa harweeriiká ar koo/i, kin harafaar tawa adór qamu. I ya/aán heé do' loó' nguwa tlaxwi, nee qamuuká' kin ki/is dír seebuúín kurkú inslaslángw kureeraá mibeeraá kooane.

³² Gixsadaá tlahhoó Laáwi i aliiti ki aleesláy kiwa tu/i qoomár kiwa slai.

³³ Barnaxes heé wák baraá tlahhoó Laáwiwo hariímaarós gar gadiyusiiká ar do' nguwa tu/i, i hariín do'odá' taa weeriís kuwa ki/isi dír seebuúwós, bál inslaslángw kurkú mibeeri kooane, asma maraydá' taa múk tlahhoó Laáwirí haniís a kooín, asma xoorór Israeli gina hanís.

³⁴ Ala yamaá múk Laáwi naa aaliyé' dinkwárí ale mikiwa weeriís, asma gaasíng a aalir'ín ar ta warqeesiiká.»

Narkuute kawa kirkimeérí hanmisi

³⁵ «Barnaxes hhiyaawók a narkutmoó ti aleeslawaaká amohhe'eemisuuwo, a gár hariim kuwa amohhe'es as iwa kumiiti slafiingo, amohhe'eemiseek tawa adór dahaaymo nee aausmo diroge.

³⁶ Mu bu'utí sla'aar tam oo daa'awi gaalá. Ala Munguúwók na ilaiwawa/eek, nee hhiyaawók i hooti dinkwa nee kuúng.

³⁷ Mu kirkitisaar peésa ngiwa aldaafi, laqaá muruú /ayma as slaasláw kawa sleer.

³⁸ Aníng an AAKOÓ MUNGÚ, Munguúhúng, kudá' kuungá' naa baraá Misrír wa duux, as nuwa yaamaá Kana'anirí haniis, nee as aníng niwa Munguúhúng tleehhiit.»

Lawaale kawa gweeri

³⁹ «Barnaxes hhiyaawók oo tseéw aa narkuút, tiri weeriís dirók, mur gadiyuusaar adór lawaalmoó wa ale.

⁴⁰ In hoot adór sagadiyusmo oo ta bu'un, laqaá adór aausmo, un sagadiyuus ay dír kurkú mibeeraá kooán i xay kuduú deelór ur.

⁴¹ Kurkusinge gár tuwa hariím un geemeér as iwa ki/i amór mukós nee amór aalír bariiseerós, geemaweek dinkwa nee múk do'ose.

⁴² Asma xoorór Israeli a sagadiyuuser'eé', ar naa baraá Misrír wa duúx. Gawaá adoorihe mikiwa adór lawaalér wa weerimiís.

⁴³ Hhiyaawók mu sawaawuti'iimaar ar xarasleema, ala Munguúwók na ilaiwawa/eek.

⁴⁴ Lawaalér /ameena nee hhawaate tlaxooro a aleesleér amór xoordaá inslaawáy wa aleeró.

⁴⁵ Kiwa dír hoomár wa tlaxw i aleesleér, nee na/ii'ín awa naa baraá ayaahúngí laqwaaliyé' in tlaxwá' as tawa daqari'iimarhúng.

⁴⁶ Lawaleerí an hanís dír na/iiwók tawa kooín baraá slafingw'ín sleémeero. Kuká' i aleesleér kiwa lawaale tlehh. Ala hhaeewók awa xoorór Israeli mi sawaawuti'iimaar ar xarasleema.

⁴⁷ «Barnaxes hoomo laqaá aausmo oo nee kuungá' alhootá', bira daqaari'iít, nee hhiyaawók aa narkuút, nee tiri weeriis dír hoomoodá', laqaá aausmoodá', laqaá dír heé wák oo mar'eefooín,

⁴⁸ i ya/aán kuwa tu/i alaá tiwa weeriís. Oo wák baraá hhaeewose tu/uto gu aleesláy,

⁴⁹ laqaá maamáywós tu/uto gu aleesláy, laqaá na/oó áyshigá, laqaá oo maamáy, laqaá oo hhiyoó tseéw oo tlahhaywós. I ya/aán tiwa kilós tu/i bir ti aleesláy.

⁵⁰ Inós nee heedaádá' gwa tlaaxw, kureeri kin faar, iimír kurkudá' tiwa weeriís ay kurkú inslaslaangw oo hi'iít, bu'utuuwós oo kur tu/i kun alqoomees ar kureeraá naa meetiye' awa aakoowós nguwa sagadiyuusi. Bu'utuuwí ku alqoomees nee bu'utuú heé ta bu'un umuú kurko.

⁵¹ Barnaxes faarór kureeri ay kurkú gweermo oo hi'iít ka ur, gár kus hariím a peésár ur gan buu' baraá tidá' kura tlaxwi.

⁵² Barnaxes kureeraá naa meetiye' ay kurkuduú inslaslaangw ki niina, qoomoó tlaxoodá' aa met kun faar ar qoomoó kureeridá', kuri buu'.

⁵³ Qooma sleémeero ar iwa doó aakoowós i dirii'i, a gár hariim kuwa bu'utuú umuú kurkií haniisi adór sagadiyusmoó ta bu'un. Heedaádá' gwaa tlaaxw munguwa i xaraasl.

⁵⁴ Ala bar heesíng kwaa tu/iiká nee mukós, ku gweeri kurkú inslaslángw kureeraá mibeeri kooane.

⁵⁵ Xoorór Israeli a sagadiyuuser'eé', asma ngiwa baraá yaamaá Misrír wa duúx. Aníng an AAKOÓ MUNGÚ, Munguúhúng.»