TLAHHOÓ LAÁWI 24 - Biblía Axweesantá Hhohho' ar Mungú 2004

Tsaa'astá didá' hhoohhoo'

¹ AAKOÓ MUNGÚ Mose guri báy,

² «Múk Israeli ádbaweek inooín kuúng tuwa di/tá hhohhóí huwi as tsaa'asi iwa gwa/at qooma sleémeero.

³ Aroni tsaa'asi ngi qaasi baraá heémár Mungú, alaá inqwaaridá' heéma ga tla/a qasis tidá' sandakmoó alqado gwa baq as iwa gwa/at geeraá AAKOÓ MUNGÚ wá alé xweeraawo ay matlaatle. Gaarí an dákw ta eehada' baraá xwaylarhúng sleémeero ay alhhe'eesay wasle.

⁴ Tsaa'asoosíng gan qaas gawaá kitangwduú tsaa'aso kudá' taa tleéhh ar sahaábuú hhohhó' as iwa gwa/at daqisleém dír geeraá AAKOÓ MUNGÚ wa ale.

Mikaátér ta ilahhooár wa haniisi dír Mungú

⁵ «Puuruú natsaatsaá' ku taatáhh oo kílór mibaá nee tsár, nee ku tléhh ar mikaátér mibaá nee tsár.

⁶ Mikaátedá' ka qoomés baraá hha'aá tsár dír geeraá AAKOÓ MUNGÚ gawaá meésár taa tleéhh ar sahaábuú hhohhó', nee umuúqo hhaywo a mikaáte lahhoó'.

⁷ Nee umuúqo hhaywo ku mooyángw tsuú' i qás as tiwa alkona' nee mikaátedá' nee tawa ilahhooár da/a ar inslaslaangw dír AAKOÓ MUNGUHE.

⁸ Umuúqo baalár Sabaátoro Aroni gan baraá hháy qoomeemees geeraá anuú AAKOÓ MUNGÚ wa ale, kitángw múk Israel wa ale, as alqadoodár alhhe'eesay wasl.

⁹ Aroni nee xwaylarós kilooín i hariná' mikaátedá' kawa /ayi didá' hhoohhoó' wa ale, asma ka ló'wa hhohho', nee sleeme an ilahhooár tinda haniís as anuú AAKOÓ MUNGÚ ar asla. Tí an hariímar'ín ay alhhe'eesay wasle.»

Muxtár ganaa'

¹⁰ Looarka wake afo dakumis nina deeruút baraá xaftá wa ale tla/ángw heé Israeli nee masoomoó wák oo aayorós ar múk Israeli ar ta bay, Shelemoti, ala baabuúwós a heé xoorór Misri.

¹¹ Looarka wake garmaadá' aayorós ta bay Shelemoti, dasír Diberi, ar tlahhoó Dani, umuú Mungú guna /ooslín, nee guri lu'ús. Naagáy muu masoomoodá' guri huúw dír Mose.

¹² Kway baraá dó' i tseék ay dír sla'aarír Mungú kay dir'íní gwa/atisi.

¹³ Naagáy AAKOÓ MUNGÚ Mose guri báy,

¹⁴ «Masoomoosíng aníng iga /ooslín, tsee/aá xáftí duuxeek, nee mukdá' sleémeero gwaa axaas iwa án /oosliislin dabaaín ngi qaasiye' gawaá sagós, nee xooro sleémeero ngu tlaqut ar tlaa/e ay dír i gwaai.

¹⁵ Kuúng xoorór Israeli ka beer: Umuúqo heewo oo umuú Mungú gwaa lu'us, gár kuwa hariím a tlakweemaawós gin gagaar.

¹⁶ Umuúqo heewo oo yaamuloó' laqaá hoomo oo umuú AAKOÓ MUNGÚ gwaa tloqoos, xooro gun tlaa/ér gás.

¹⁷ «Umuúqo heé hee gwa gaas, inós sleeme gár kuwa hariím kun gaas.

¹⁸ Heé slér hee gaa gaas gár kuwa hariím gan buu'. Dawa a kwí: Slafiingw nee slafiingw.

¹⁹ «Umuúqo heé inslaawmoowós gwaa slahh'ees, nee inós sleeme kun slahh'ees adoodá' inós inslaawmoowós ngura slahh'eés.

²⁰ Bar fara gana geeqáy inós aqo kun fara geeqáy sleeme, bar ila gana gaás, aqo inós kun ila gaas sleeme, bar sihhno guna tuú/, aqo inós kun sihhno tuu/ sleeme. Umúqo heewo oo hee gwaa slahh'ees, inós sleeme gár kuwa hariím kun slahh'ees ar adoodá' inós aa tleéhh.

²¹ Oo slee gaa gaas gár kus hariím a bu'utu gun haniis, ala heé hee gwaa gaas a inós kun gaas.

²² Dabeerí in hariín as hoomoó ayaahúng hoót, nee yaamuloouuse. Asma aníng an AAKOÓ MUNGÚ, Munguúhúng.»

²³ Naagáy Mose xoorór Israeli sleémeero gari kaangwí báy. Heedaádá' AAKOÓ MUNGÚ gwa lu'us, kuri tsee/aá xáftí duúx, kuri tlaa/ér tlaquút, kway gaás. Adoorí an adór xoorór Israeli aa tléhh, ar adór AAKOÓ MUNGÚ Mose ngura hara'ayín.