TLAHHOÓ LAÁWI 23 - Biblía Axweesantá Hhohho' ar Mungú 2004

Deelór uren ar diíni

¹ AAKOÓ MUNGÚ Mose guri báy,

² «Xoorór Israeli kabeeto, deeloorí an deelór uren ar AAKOÓ MUNGÚ, tidá' taa qoomeés, dinku'uumár hhoohhoo' an tlehhá'. Deelór ur ar naa qoomeés an tí:

³ Deelo lahhooe gadiyeé an tlehhá', ala bál faanqw a baalár Sabaáto. Baalaarihe a gadiyusa'aaká, dinku'uumár hhoohhoo' an tlehhá'. Bál faanqwe a gadiyusa'aaká, an Sabaáto, an baalár taa paraátl as anuú AAKOÓ MUNGÚ baraá hotaahúng sleémeero umuúqo diiro.

⁴ Deelor'eé' ar uren ar hatlá' ar anuú AAKOÓ MUNGÚ ar dinku'uumár hhoohhoo' kawa tlehha', a baraá qom'iiká taa qoomeés.»

Deelór Pasaáka nee mikaátér taa sluuftisiiká

⁵ «Tsiindaá baalár mibaá nee tsiyáhh awa slahhángw geera an baalár Pasaáka kuwa boo/esa' as anuú AAKOÓ MUNGÚ.

⁶ Bál mibaá nee kooán ar slahhangwduú kilá' deelór ur ar mikaátér taa sluuftisiiká in iimu/uún. Deelo faanqw mikaátér taa sluuftisiiká an /agá'.

⁷ Bál deelór geera dinku'uumár hhoohhoo' an tlehhá', baalaarihe ma gadiyuusara'.

⁸ Deeloorí faanqwamaawo anuú AAKOÓ MUNGÚ in ilahhooár dá/tí hanimisá'. Bál faanqwe dinku'uuma an tlehhá', ma gadiyuusara'.»

⁹ AAKOÓ MUNGÚ Mose guri báy,

¹⁰ «Xoorór Israeli kabeeto, bara daté' baraá yaamuusingá' naa haniís, bar aga bu'uundé', ufuú balaangw oo bu'úngw geera un hubá' amór kaahamusmoó Mungú.

¹¹ Kaahamusmoó Mungú ufuuduú balaangw guri gáwtí tlees as nguwa haniisi dír geeraá AAKOÓ MUNGÚ, as kahhó' kuungá' tunduwa ya/an. Adoorí ngi tleehhi matloowós baalár Sabaáto bira waaráhh.

¹² Baalaasíng ufeedá' ngiwa hanisa' dír anuú AAKOÓ MUNGÚ, ilahhooár da/a ar deelmoó gwaanda oo xaslxaansli wásl, oo kurkú wák, ngun hanisá' sleeme.

¹³ Dinkwa nee tisinge ilahhooár bu'úngw afi qoomár kílo tsár ar puuruú natsaatsaá' oo taa aleedoók nee di/i ngun hanisá' dír anuú AAKOÓ MUNGÚ ar asla, nee slaahhareeriiwós aníng iri sla'atisiyá'. Ilahhooarós ar wahaangw a liíta wak ar difaái.

¹⁴ Dír ilahhooarhúng ngira hubi'iiká amor'eé', anuú Munguúhúng, i hariindaaká bu'úngw geera oo balangwhúng kuwa qiintír wa /aga', laqaá kuwa da/a/aanda', laqaá kuwa mikaátér wa tlehha'. Gaarí an dawa oo ta eehada' baraá qartahúng sleémeero umuúqo diiro ar tawa hota'a ay alhhe'eesáy wasle.»

Deelór ur ar bu'uungw

¹⁵ «Iimír baalaadár alaá Sabaátoro, tidá' ilahhooár ufuú balaangw kunguwa gáwtí tleés, as kunguwa haniisi dír anuú AAKOÓ MUNGÚ, wiikidaá faanqw awa ádkoomá' in fadá'.

¹⁶ Bál mibeeri kooán, baalár alaá Sabaátór faanqw ilahhooár bu'úngw /abén duuxare' as anuú AAKOÓ MUNGÚ.

¹⁷ Umuúqo do'o mikaáte tsár kan haniis as tawa ilahhooár ta gáwtí tlesa' as ngiwa hanisa' dír anuú AAKOÓ MUNGÚ. Umuúqo mukatmoowo masók gár kungura tleéhh a kílo tsár ar puuruú natsaatsaá' oo taa sluuftís. Mikaáteesíng ngin hubá' dír anuú AAKOÓ MUNGÚ as tawa ilahhooár bu'úngw geera dirhunge.

¹⁸ Dinkwa nee tihe deeloó faanqw oo bee/aangw oo kurkú wák oo xaslxaanslír koomaaká un haniisa', nee awuú batlitmo oo wák, nee gwaandaawe tsár. Makaysingá' an ilahhooár da/a dinkwa nee ilahhooár bu'uungw nee ilahhooár wahaangw. Slaahhareeraá ilahhooarí anuú AAKOÓ MUNGÚ iri sla'atisiyá'.

¹⁹ Gurta ngun ilahhooár tlakweema hingeesár wa hanisá', nee deeloó tsár oo gwaandaawe, oo kurkú wák, un tsu/á' as ilahhooár wayda.

²⁰ Kaahamusmoó Mungú giri gáwtí tlees as tawa ilahhooár ni haniisi dír anuú AAKOÓ MUNGÚ, dinkwa nee mukaatmoó bu'úngw geera, nee deelaydá' tsár oo bee/aangw. Muruusíng a muruú hhohhó' dír anuú AAKOÓ MUNGUHE, nee a muruú /aymár kaahamusmoó Mungú kilós.

²¹ Baalaasír kilae kángw dinku'uumár hhoohhoo' kuri ilahanisá', baalaadae a gadiyusa'aaká. Gaarí an dákw ta eehada' ay alhhe'eesay wasle baraá xwaylarhúng sleémeero, umuúqo dír tawa hota'a.

²² «Bar bu'uún baraá qaymooroge, ma baloó bu'uumaar ay alhhe'eesoó qaymoorók, laqaá ma alií ki/aar as buruurú kuwa sleemis, un meér as dahaayér waaraahh nee narkuute. Aníng an AAKOÓ MUNGÚ, Munguúwók.»

Deelór ur ar kurkú /abén

²³ AAKOÓ MUNGÚ Mose guri báy,

²⁴ «Múk Israeli ku beer, baalár hargeera ar slahhángw faanqw an boo/esá', tawa deelór hungu/uma, deelór inslaslaangw ar ta ilaharisa' ar afór tarumbeéta, nee dinku'uumár hhoohhoo' kari tlehhá'.

²⁵ Baalaadae ma gadiyusara', a gár hariim anuú AAKOÓ MUNGÚ iwa ilahhooár dá/tií hanisa'.»

Baalár ur ar haraki/isa

²⁶ AAKOÓ MUNGÚ Mose guri báy,

²⁷ «Bál slahhángw faanqw bar mibaangw a baalár haraki/isa. Baalaasíng an baalár dinku'uumár hhoohhoo' kawa tlehha'. An gwaawiindá', nee ilahhooár da/a kari hanisá' dír anuú AAKOÓ MUNGÚ.

²⁸ Baalaarihe gadiyeé ma tleehhara'. Asma baalaasíng a baalár haraki/isa, a baalár tunduwa haraki/isi dír geeraá AAKOÓ MUNGÚ, Munguúhúng.

²⁹ Umuúqo heewo oo baalaarihe aa gwaawinká gár kuwa hariím a kun baynitis dír mukós oo Israeliwo.

³⁰ Umuúqo heewo oo baalaadae aa gadiyuus aníng un gaás baraá tla/ángw mukose.

³¹ Baalaadae ma gadiyuusara', gaarí an dákw ta eehada' baraá xwaylarhúng, umuúqo dír tawa hota'a ay alhhe'eesay wasle.

³² Baalaasíng dirhunge a Sabaátór hungu/umaá kilá' nee ar gwaawito. Baalár Sabaáto an bál gwaleél ar slahhaangwí iimír tsiindo wa ale ay tsiindaá bál hatlá'.»

Deelór ur ar isleeri

³³ AAKOÓ MUNGÚ Mose guri báy,

³⁴ «Xoorór Israeli baweek: Iimír bál mibaá nee kooán ar slahhángw faanqw, deelór ur an tlehhá' ar isleeri deelo faanqw as AAKOÓ MUNGÚ.

³⁵ Baalár hargeera baraá deeloosíng faanqwe dinku'uumár hhoohhoo' a koondá', baalaasinge ma gadiyusara'.

³⁶ Deeloosíng faanqwe ilahhooár da/a an hanmisá' dir anuú AAKOÓ MUNGÚ, bál dakaát dinku'uumár hhoohhoo' an boo/esá', nee ilahhooár da/a an hanisá' dír AAKOÓ MUNGÚ. Dinku'uumadá' ka hhoohhoo', baalaasinge ma gadiyusara'.

³⁷ «Deeloosíng an deelór uren ar AAKOÓ MUNGÚ ar taa qoomeés nee as kaangw kuwa ilahanisa' as dinku'uumár hhoohhoo' kawa tlehha', ar AAKOÓ MUNGÚ kuwa ilahhooár dá/tí hanmisa', nee ar bu'uungo, nee ilahhooár muruú ta tsu/i, nee ar wahaango. Ilahhooarí sleémeero kan daa/, umuúqo ilahhooaro nee baalaarós.

³⁸ Ilahhooasíng a dinkwa nee tidá' ni hanmisa' dír anuú AAKOÓ MUNGÚ. Bál deelór Sabaátoro, adoodár ilahhooadá' /iisí kar hanmaamisa', ilahhooadár al'axweesani kawa boo/esa', nee ilahhooár muunuú sla'aariro, tidá' ni hanmaamisa' dír anuú AAKOÓ MUNGÚ.

³⁹ «Alaá bu'úngw qamuhunge deelór ur ngin tlehhá' ar deelo faanqw, iimír deelór mibaá nee kooán ar slahhángw faanqw. Baalár hargeera nee bál dakaát a baalár hungu/uma.

⁴⁰ Bál deelór geera mamaá xaaihúng awa tsuuá' ki lehhá', nee haleemaá xaa'aá loo/o yaariir nee haleemaá ti'imaamitá' baraá afaá yaaér wa ale, kuungá' deelór ur kari tlehhá' deelo faanqw geeraá AAKOÓ MUNGÚ, Munguúhúng wa ale.

⁴¹ Umuú kurko deeloorí an tlehhá' deelo faanqw as anuú AAKOÓ MUNGÚ, adoorí an tlehhitá' umuúqo slahhángw faanqwe. Gaarí an dákw ta eehada' baraá qari sleémeero ay alhhe'eesay wasle.

⁴² Deelo faanqwe an hotá' baraá xafáy wa ale. Qoomaasíng sleémeero yaamuloouusér Israeli nin baraá xafáy wa hootiyá'.

⁴³ Tlehhmuuwí xwaylarhúng gan xu'utimis adór aníng baabi'iihúng ngira duúx baraá yaamaá Misrír wa aleeró, niri baraá xafáy wa hootiyé'. Aníng an AAKOÓ MUNGÚ, Munguúhúng.»

⁴⁴ Mose xoorór Israeli gari xu'utís deelór uren ar AAKOÓ MUNGÚ ar taa qoomeesi.