TLAHHOÓ LAÁWI 22 - Biblía Axweesantá Hhohho' ar Mungú 2004

Hhohhoartá ilahhooa

¹ AAKOÓ MUNGÚ Mose guri báy,

² «Aroni nee daaqaywós kuduú kaahamuusér Mungú ádbaweek, mura' sleémeero oo xoorór Israeli aa parátl ku ilaiwawa/i, as umuueé' kudá' hhoohhoó' mukuwa /ooslín. Aníng a AAKOÓ MUNGÚ.

³ Inooín kaangwí baweek, barnaxes heé wák baraá xwaylarhúng sleémeero oo meetaá koóm, aa tseewúy dír muruudá' hhohhó', kudá' xoorór Israeli aa parátl as anuú AAKOÓ MUNGÚ, heedaádá' dir'eene kun baynitis. Aníng an AAKOÓ MUNGÚ.

⁴ «Heé xwaylár Aroni bir tiiq tiqtír tsatmituuwo, laqaá bir malalaahh as tiqtír tsaatu'uuma, muruú hhohhó' munguwa /aáy ay dír i hhoohhoouy. Umuúqo heewo oo heé taa meetagaas as tuua ngiwa kwatiít, gwa kwatiit, laqaá heé aa pisahhaat gwa kwatiit,

⁵ laqaá makiito'ór gurúr hi'iimiit ar inós gu meetagaas gaa kwatiit, laqaá heé inós gu meetagaás,

⁶ heedaádá' i baraá meeta ay tsiindo. I hariindaaká muruú /aymár hhohhó' nguwa /ayi, ay dír i hamtlin.

⁷ Tsiindi bira dát inós aa hhoohhooúy, gawaá adoorihe i ya/aán muruú /aymár hhohhó' nguwa /ayi, asma an muruú /aymaarós.

⁸ Kaahamusmoó Mungú makiito'ór aa kilós gwa' mingiwa /aáy, laqaá ar taa gaás nee makiito'ór sla/a, as mitiwa meetagaás. Aníng a AAKOÓ MUNGÚ.

⁹ «Kaahamuusér Mungú gár kawa hariím a hara'ayar'eé' ngin oohiyá', as kahhó' tlakweema mingiwa tleehhiyé' nee kiri didá' hhoohhoóí tsuu/. Aníng a AAKOÓ MUNGÚ, kudá' inooín gaa paraatl.

¹⁰ «Heé kaahamusmoowooká i ya/aandaaká muruú /aymár hhohhó' nguwa /ayi, tam dahaaymoó doó kaahamusmo, laqaá sagadiyusmoó do'ose i bu'un.

¹¹ Ala barnaxes a lawaalmoowós oo aa tlaáxw as tawa kós, i ya/aán muruú /aymaadá' nguwa /ayi, nee sleeme kudá' taa do'ós wa laqwaál.

¹² Bar dasír kaahamusmo kaa duúx nee heé kaahamusmoowooká, i ya/aandaaká muruú /aymaadá' nguwa /ak, kudá' tinda ilahhooár hhohhó' wa haniís.

¹³ Ala barnaxes dasír kaahamusmo a kwaalo'o, laqaá duuxo ngaa gás, slám i na/oó koondaaká, nari dír doó baabuúwós i kí/, a adór qoomár tawa /amaatlito'o, i ya/aán muruú /aymár baabuúwós nguwa /ak. Tam adoosinge heé doó kaahamusmoowooká i ya/aandaaká muruú /aymarí nguwa /ayi.

¹⁴ «Barnaxes heé hatlá' muruú hhohhó' gwaa /aáy ar adór aa haraxuiiká, heedaádá' muruú /aymaadá' gun buu' ar shiliíngír mibeeri tsár baraá tsiiruuwo, hariímár muruú /aymaadá' gari ki/is dír kaahamusmoó Mungú.

¹⁵ Kaahamusmoó Mungú muruú xoorór Israeli naa hanís as AAKOÓ MUNGÚ munguwa meetagaás.

¹⁶ Xoorór Israeli mingiwa baraá dakuúsar'ín i dahaás as muruú /aymár hhohhó' nguwa /ayiyé', sakwasleemár hariím as dakuúsar'ín nee tlakweemaaín ngiri slayá'. Aníng a AAKOÓ MUNGÚ kudá' muruusíng gwaa paraatl.»

¹⁷ AAKOÓ MUNGÚ Mose gway báy,

¹⁸ «Aroni nee daaqaywós kuduú kaahamuusér Mungú nee xoorór Israeli sleémeero ki beer, umuú heewo oo baraá tla/angwhúng wa hoót, laqaá hoomoó tla/angwhúng hoót, oo ilahhooarós ar aa al'axweés ngaa huuw, laqaá ar sla'aari, ar ta da/i as AAKOÓ MUNGÚ,

¹⁹ as kahhó' kawa ya/an gwaanduú xaslxaasli wásl gun haniis, laqaá awuú xaslxaansli wásl, laqaá gurtuú xaslxaansli wásl.

²⁰ I baloó ya/aandaaká gár xaslxaanslír koom kawa haniisi, asma i kuungá' wa hariindaaká.

²¹ Hee tam gaalá bar ilahhooár muruú ta tsu/i ngi hanmiis dír AAKOÓ MUNGÚ, ilahhooár wayda as al'axweesantós ngiwa boo/eesi, laqaá ilahhooár muunuú sla'aari, baraá daqtós tidá' i de'ena, as kuwa ya/an, masók an makiito'ór hhoohhoo' ar xaslxaanslír koomaaká.

²² Makiito'ór taampa ma haniisaar, laqaá ar toqoori, laqaá ar qaanqatuú koom, laqaá ar inkaahhi'i malalaahh, laqaá ar hhusluú koom, laqaá ar deeír koom, muruuwí mu ilahhooár da/tá wa hanisaar gawaá kitángw ilahhooár AAKOÓ MUNGÚ.

²³ Awu laqaá gwaanda oo diqiya' tlét, laqaá oo diqiya' ququmát u aleesleér kuwa ilahhooár muunuú sla'aarír wa hanis. Ala kuká' mi al'axweesantá wa haniisaar.

²⁴ Makiito'ór yaqaamba ar tlaa/eewós taa tuú', laqaá tlaa/eewós taa kikiíhh, laqaá taa kwakwaáhh, laqaá taa tsaát, ló' ma baloó haniisaar dír AAKOÓ MUNGÚ, tam baraá ayko ma ilahhooár wa gaasaar.

²⁵ «Laqaá mi dír hoomár wa ilaoohaar as ngiwa muruú /aymár wa hanis dír anuú AAKOÓ MUNGÚ. Makaysingá' i xaslxaanslír koná', as kiwa tlaáq, nee i kuungá' wa harina'aaká.»

²⁶ AAKOÓ MUNGÚ Mose guri báy,

²⁷ «Awu, laqaá gwaanda, laqaá gurta oo taa laqwaál in dír aayorós wa du'ún deelo faanqw, ala iimír bál dakaate i ya/án tawa ilahhooár ta da/i ar asla dír AAKOÓ MUNGÚ.

²⁸ Slee nee damaarose, laqaá bee/i nee na/aywo, ló' mi looár wák tsu/aar.

²⁹ Barnaxes anuú AAKOÓ MUNGÚ iga ilahhooár sluufáy gaasár eér, ngin hanís ar adór tuwa ya/an.

³⁰ Makiito'oodá' gár kawa hariím a kan /aay baalaadár kilae, ma meetisaara' ay matlo matlaatle. Aníng an AAKOÓ MUNGÚ.

³¹ «Gawaá adoorihe hara'ayar'eé' an otá' nee an tlehhá'! Aníng an AAKOÓ MUNGÚ.

³² Umuueé' kudá' hhoohhoó' mukuwa /ooslín. A gár hariim aníng tiwa ilaiwawa/i baraá tla/ángw múk Israeliwo as tiwa hhoohhoó'. Aníng an AAKOÓ MUNGÚ, kudá' kuungá' nu hhoohhooeemiís.

³³ Aníng an kudá' kuungá' naa baraá yaamaá Misrír wa duux, as niwa Munguúhúng tleehhiit. Aníng an AAKOÓ MUNGÚ.»