TLAHHOÓ LAÁWI 20 - Biblía Axweesantá Hhohho' ar Mungú 2004

Muxta as iawasle

¹ AAKOÓ MUNGÚ Mose guri báy,

² «Umuúqo heewo baraá xoorór Israeliwo, laqaá hoomtuú baraá tla/angw'ín hoota, bar na/aywós gwaa ilahhooár wa haniís dír munguú ta bay Moloki, gár heedaádá' kuwa hariím a gaasa, xoorór didá' gun tlaa/ér tlaqút ay dír i gwaai.

³ Aníng heedaádá' un hara sihhiít, ngway baynitís dír muk'eene, as na/aywós nguwa ilahhooár wa haniís dír munguú ta bay Moloki, nee adoodá' dir'eé' tidá' hhoohhoo' nee umuueé' kudá' hhoohhoó' nguwa slasla/areés.

⁴ Barnaxes múk yaamuudá' ngwaa ya'aá hara'afaátl, gwaa muxiiká as kuwa gaasi,

⁵ aníngú kilá' un i sihhiít, inós nee múk do'ose, dinkwa nee mukdá' sleémeero oo inós gwa eehar, mukdá' sleémeero aa inkihhimu waslees dir'eene, munguúdá' ta bay Moloki ngway sluufmiisiye', inooín kiri baynitis dír mukós oo Israeliwo.

⁶ «Hee barnaxes aa daqáy dír xu'utuusér gi'i, nee da/aluuse, ar adoodae inkihhimu ngway dakuús dir'eene, un hara sihhiít, ngway baynitís dír xooroorós ar Israeliro.

⁷ Gawaá adoorihe ti partle' dír múk tlakwe as tawa múk hhohhó' tleehhita', asma aníng an AAKOÓ MUNGÚ Munguúhúng.

⁸ Daber'eé' oohaak, nee kawa eehada'. Asma aníng an AAKOÓ MUNGÚ kudá' kuungá' nu hhoohhooeemiís.

⁹ «Heé baabuúwós laqaá aayoorós gi lu'umís, gár kuwa hariím a gaasa. Heé baabuúwós laqaá aayoorós gaa lu'us, tseereerós i gawaá daanduuwós.

¹⁰ «Hhawaata nee harér inslaawmoowós barta fuquús, gár tsaraawo kiwa hariím a tsu/uta.

¹¹ Bar hhawaata nee harér baabuúwós taa fuquús, a baabuúwós gun mureekeemiis, inooínaaká' tsaraawo gár kiwa hariím a tsu/uta, tseerer'ín i gawaá daanduuín.

¹² Bar hee nee harér garmaawós taa fuquús, gár tsaraawo kiwa hariím kin tsuu/. Inooín a mar'eefo tseerduuín i gawaá daanduuín.

¹³ Bar hhawaata nee hhawaatuú hatlá' naa fuquusiyé' hariímár /ameenír wa alé, i hariín tsaraawo kiwa tsu/i, asma gár slasla/aar kaa tleéhh, nee tseerduuín i gawaá daandeemooín.

¹⁴ Bar hee hare gaa duúx, nee aayór hare gay duúx, adoodá' ka slasla/aar. Inooínaaká tamaawo gár kiwa hariím a kin daa/ ar asla, asma gár slasla/aar ngaa tleehhiyé'. Adoorí an tlehhitá' as slasla/aruuwí kuwa ila/a' baraá tla/angwhunge.

¹⁵ Hhawaata bira qaát nee makiito'o, gár kuwa hariím a kun gaas, nee makiito'oodá' kan gaas sleeme.

¹⁶ /Ameeni bira tseewuúr dír makiito'o as tawa qaati, gár kawa hariím a gaasa, nee makiito'oodá' sleeme. Tseerduuín i gawaá daandeemooín.

¹⁷ «Barnaxes hhawaata hho'oorós gaa duúx, dasír baabuúwós, laqaá ar aayírós, dasiidá' iri ya/aán hhawaatuudá' ngiwa duuxi, kuduú hhiyaawós, nee tari qaat nee inós, gadaádá' a slasla/areema, gár kiwa hariím a kin baynitis dír múk qarti'ine, asma gár murér koom ngaa tleehhiyé'. Tlakweemaaká' i gawaá daanduú hhawaatuuwí.

¹⁸ Bar hhawaata nee /ameenír baraá hariímaarós ar slahhángwí dirii' taa qaát, tsaraawo gár kiwa hariím a kin baynitis dír muk'ín oo Israeliwo, asma hhawaatudá' aa qaát nee /ameenír baraá meetaá hariímaarós ar slahhángwí dirii', nee /ameenír baraá hariímaarós ar slahhángwí dirii' aa ya/aán iwa qat nee hhawaata.

¹⁹ «Ma fuquusara' nee ayiniínarók, laqaá áyshigaárók, asma inooín a mar'eefoowók awa guruú do'. Múk tlehhmuusíng gwaa tleehh, tlakweemaaká' i gawaá daanduuín.

²⁰ Bar hee taa qaát nee harér baabuúwós oo úr, laqaá ar baabuúwós oo niiná, a baabuúwós gun mureekeemís. Inooín tsaraawo tlakweemaaká' i gawaá daandeemooín. Inooín ta qaatl tam na/ii ngi slay'aaká.

²¹ Bar hee harér hhiyaawós gaa duúx a hhiyaawós gun mureekeemiis, nee adoorí ka slasla/aar, inooín tan qaatl na/ii ki slayká.

²² «Gár tunduwa hariím a daber'eé' sleémeero an otá' nee kaahir'eé' sleémeero an tlehhá' as kahhó' yaamuudá' nuy huuw munduwa si'iyé'.

²³ Loohír mukdá' naa geerahúng wa guús ma eeharara', asma adoodá' sleémeero qoomaaká ngina tleehhiyé', aníng ngiri aáhh ló'wa aleeró.

²⁴ Ala án kuungá' naa qaroó báw, yaamuusíng a aalirhúng, yaamaá diihhooár ilwa nee dane. Aníng an AAKOÓ MUNGÚ, Munguúhúng, kudá' kuungá' naa paraatl dír xoordaá hatlae.

²⁵ Gawaá adoorihe masók kuungá' makaá ta waki /aymaro nee awa ta /aa/ayi i tsahhá', nee tsir/ír ta /aa/ayi, nee ar ta waki /aymaro, miti meetagaasara' ar makiito'o, laqaá tsir/i, laqaá ya'awaslér baraá yaamu ar naa paraátl as kawa waki.

²⁶ Kuungá' masók tundu hhohhó' dir'eene, asma anuú AAKOÓ MUNGÚ ti hhoohhoó'. Aníng kuungá' nuna paraátl dír xoordaá hatlae, as kuungá' tawa kwe'eé'.

²⁷ «/Ameeni laqaá hhawaata awa giaá duxuumá', laqaá awa da/ariirimá', gár kiwa hariím kin tlaquut ar tlaa/e, kiri tsuu/, tseerer'ín i gawaá daandeemooín.»