TLAHHOÓ LAÁWI 2 - Biblía Axweesantá Hhohho' ar Mungú 2004

Ilahhooár bu'uungw

¹ «Umuúqo heé ilahhooár bu'uungw nga huuw dír AAKOÓ MUNGÚ, ilahhooarí masók a puuruú natsaatsaá'. Heedá' ilahhooa ngaa huuw puuruúdá' gun dí/tí qaas, nee mooyángw tsuú' sleeme guri baraadií qaas.

² Naagáy kay huuw dír daaqoó Aroni kudaá kaahamuuse. Tsa/oó wák oo puuruúdá' natsatsaá' taa dí/tí qaás, nee mooyángw tsuua kari huuw amór kaahamusmo, inós gari daa/ gawaá kitángw ilahhooa, tawa ilahhooár inslaslaangw. Ilahhooarí ta da/aa/an slaahhareeriiwós AAKOÓ MUNGÚ nguri sla'atisiyá'.

³ Bartadá' aa met baraá ilahhooarír da/ato ar Aroni nee daaqaywós. Asma ilahhooarí taa haniís dír AAKOÓ MUNGÚ ka ló'wa hhoohhoo'.

⁴ «Barnaxes hee ilahhooár mikaáte ga dír Mungú i haniisár wa slaa', masók a mikaátér taa sluuftisiiká, ar puuruú natsatsaá' nee oo taa aleedoók ar di/tá seituúni, laqaá mikaátér wananaa' ar taa sluuftisiiká, ar taa sliík ar di/i.

⁵ «Barnaxes ilahhooár ta hanis a mukaatmoó taa tleéhh baraá xooslmoó garangariingw, masók ilahhooarí ar puuruú natsaatsaá' oo taa aleedoók nee di/tá seituúni, ala masók kwaa sluuftisiiká.

⁶ Mikaáteedá' ka parhhamís, nee ka dí/tí tsiririxís. Gaarí tari ilahhooár bu'uungw.

⁷ «Bar ilahhooarók ar ta hanis ar mikaátér taa huurín baraá safúrya, daqaní ilahhooasíng ka tleehhi ar puuruú natsaatsaá' nee di/i.

⁸ Ilahhooasíng taa tleéhh ar muruusíng ka húp dír geeraá AAKOÓ MUNGÚ, qoomár bara hardahás, kaahamusmo ngi huwi gawaá kitángw ilahhooa.

⁹ Kaahamusmo ilahhooasíng gan bahh taataahh tawa ilahhooár inslaslaangw nee gari daa/ gawaá kitángw ilahhooa, ilahhooarí ta da/aa/an ar asla slaahhareeriiwós AAKOÓ MUNGÚ nguri sla'atisiyá'.

¹⁰ Ilahhooarír da/a taa haniís dír AAKOÓ MUNGÚ ka ló'wa hhoohhoo', nee bartadá' aa met kan haniis dír Aroni nee daaqaywós.

¹¹ «Ilahhooár bu'uungw ar taa sluuftís ka hanisiiká dír Mungú, asma ar taa sluuftís nee danú ki waak kawa da/i as AAKOÓ MUNGÚ.

¹² Bu'uungók oo geera ngu ilahhooár wa húp dír AAKOÓ MUNGÚ, ala ku qaasiiká gawaá kitángw ilahhooa tawa slaahhareeraá tsuuá'.

¹³ Ilahhooarók sleémeero ar bu'uungw ka díwtí qamiín, diwi ma baloó mawaar kawa qamiin baraá ilahhooarók ar bu'uungo, asma diwi an layár alqadór Mungú aa tleéhh nee kuungá'.

¹⁴ Qoomár ilahhooarók tidár bu'úngw geera bar húp dír AAKOÓ MUNGÚ, masók a tidá' taa /ar'aá aldaá/, laqaá mikaátér taa tleéhh ar puuruú angaánoó taa xoósl.

¹⁵ Kari dí/tí tsiririxís, kari mooyángw tsuúí qás. Gaarí a ilahhooár bu'uungw.

¹⁶ Kaahamusmoó Mungú ilahhooarír bu'úngw taa tuú' dinkwa nee mooyángw tsuú' gan bahh daa/ as tawa ilahhooár inslaslaangw. Gaarí an ilahhooár ta hanmiisi dír AAKOÓ MUNGÚ ar da/a/aangw.»