TLAHHOÓ LAÁWI 19 - Biblía Axweesantá Hhohho' ar Mungú 2004

Hara'ayár hhoohhoo' nee ar ganaa'

¹ AAKOÓ MUNGÚ Mose guri báy,

² «Xoorór Israeli sleémeero ka beer: Kuungá' masók tundu hhohhó', asma anuú AAKOÓ MUNGÚ, Munguúhúng ti hhoohhoó'.

³ Umuú heewo gár kuwa hariím a baabuúwós nee aayoorose gin ilaiwawaa/, nee deelór Sabaátor'eé' gan amohhe'eemiis. Aníng a AAKOÓ MUNGÚ, Munguúhúng.

⁴ «Ma warqawaara' amór munguaá' murslaaqat, tam munguaá murslaaqat mi tlehhitara'. Aníng an AAKOÓ MUNGÚ Munguúhúng.

⁵ «Qoomár bar ilahhooár wayda ngi gaamisá' dír anuú AAKOÓ MUNGÚ, ngi hanisá' ar adoodá' hariim, as tunduwa ya/an.

⁶ Ilahhooa i hariín kawa /ayi baalaadá' kawa haniisi, laqaá bál tsár, nee gár aa met ay bál tám gár kawa hariím a da/a iri da/arút.

⁷ Fu'unaydá' bal tám birnga ayé', ki waak /aymaaro, nee ilahhooadá' ka ilaoohiiká.

⁸ Heé fu'unaydá' gaa /aay taa dahaás baraá tlakweema, asma gadaádá' hhoohhoo' ar AAKOÓ MUNGÚ gaa slasla/areés. Heewí gár kuwa hariím a kun baynitis dír múk Munguhe.

⁹ «Qoomár bar bu'uundá' baraá yaamuhunge ma bu'uumaara' ay afaá qamu, laqaá ma alií ki/aara' tawa bururuú burumburiinda'.

¹⁰ Tam sabiíbu aa meet baraá qaymo mu burumburiimara', tam mamaá sabiíbuuhúng awa na paahhiye' mi sleemisaara'. Mawaak as narkuute nee hoomár dabe kaaharen ar baraá ayaahúng hoot. Aníng an AAKOÓ MUNGÚ, Munguúhúng.

¹¹ «Ma fisiisimaara', ma al/agiimara', laqaá miti lamemií kaahara'.

¹² Lo'o ma tawo /ayaar ar umuueé', tam umuú Munguúhúng kuri /oslisliindá'. Aníng an AAKOÓ MUNGÚ.

¹³ «Inslaawmoowók mu hara/untsimaar, laqaá mu gaa fiisaar. Slaqwér heé aa gadiyuus miwa dirók wa iwiiwít xweera sleémeero ay matlaatle.

¹⁴ Iawasli ma lu'usar, laqaá dukutsmo mu geeraá taampaárí qaasaar. Munguúwók na ilaiwawa/eek. Aníng an AAKOÓ MUNGÚ.

¹⁵ «Bar kwasleemár tlaqá', tlaaqaak ar gan'amu, narkutmo mu barqantuusara', tam heé ilaiwa/amér koóm mu da'ayumiitara'. Ala a gár hariim inslaawmo kuwa sakwasleemár ganaá' i tlehh.

¹⁶ Ma baloó kwa'afeeraá maraá múkwár warahhaar tawa mar'eefoowók safolit. Hotaá inslaawmoowók mi baraá tsaxwaá gwa'aarárí dahasaar ar axweesanaywók. Aníng an AAKOÓ MUNGÚ.

¹⁷ «Hhiyaawók mu magoódií tseegaar baraá muunaáwoge, ala ti kaahi sleere' umuú daqto nee inslaawmoowók as kahhó' tlakweema kiwa tlehha'aaká.

¹⁸ Li/aay mu bu'uumar, laqaá ma wakaarír ar hootara' nee mukók, masók inslaawmoowók un slá' adór kuúng tir kilók sla'. Aníng an AAKOÓ MUNGÚ.

¹⁹ «A hariima hara'ayar'éé' kawa ilaiwawa/a: Hikwawók mindiwa laqwaliyé' ar makaá hatlá'. Baraá qaymooroge dahaasíngw daa'aweemaá tsár mu dahaasaar. Tlawuú taa tleéhh ar muruú daa'awemaá tsár mu tsiitaar.

²⁰ «Hhawaata nee /ameenír lawaalo'o ar taa lehhiít nee heé hatlá' barta alqaát, ala barnaxes /ameeni kinga geemayká baraá lawaali'iimaro, kaangwí ku alqaytsiti, ala mikiwa tsuú/, asma /ameenirí kinga geemayká baraá lawaali'iimaro.

²¹ Hhawaatudá' gwaanda ngu huwi dír geeraá heémár Mungú, nee ngu haniisi dir'eé', anuú AAKOÓ MUNGÚ, as tawa ilahhooár dakuús hingeesa.

²² Kaahamusmoó Mungú haraki/isa gari tleehh ar gwaandudá' dír geeraá AAKOÓ MUNGÚ wa ale, nee tlakweemaadá' heedaádá' aa tleéhh ki gurtláy.

²³ «Bara hardaté' baraá yaamaá Kana'aniro, xaa'aá mamuuwós ta /aa/ayi awa daa'aweemaá dimbadimbé in dahaasiindá', ala mamuuín i /aga'aaká, kaa ya/anká /aymaro ay kureeri tám.

²⁴ Kurkú tsiyahhe mamu sleémeero ki hhohho' kiwa ilahhooár wa haniisi dír AAKOÓ MUNGÚ.

²⁵ Ala mamaá kurkú kooán wa iimu/uuma in /agá', nee bu'ungwhúng iri doogín. Aníng an AAKOÓ MUNGÚ, Munguúhúng.

²⁶ «Fu'unaá tseerér koomá' mi /ayaara', tlaa/e mi a'awaara', tam ma da/ariirimaara'.

²⁷ Se'engwhúng mu baráy wa deequtaara', laqaá daamórhúng ma deequtaara'.

²⁸ Slaqoohúng mi siiqitaara' qoomár bar tsuunqumiisa', slaqoohúng mi iiree/imaara'. Aníng an AAKOÓ MUNGÚ.

²⁹ «Dasiirók ma hanisaar as iwa tsaatu'uumár eer, as yaamu mindiwa dahiyé' baraá tsaatu'uuma, niri hatsiyá' slasla/aruuwo.

³⁰ Sabaátor'eé' na amohhe'eemisaak, nee dir'eé' tidá' hhoohhoo' na ilaiwawa/aak. Aníng an AAKOÓ MUNGÚ.

³¹ «Xu'utuusér gi'i ma i daqaaqawaar, laqaá da/aluuse ma firiirimara' as nuwa alee/is, adoosíng bara tleehhé', tunda dahaás baraá tlakweema. Aníng an AAKOÓ MUNGÚ, Munguúhúng.

³² «Bar dír geeraá heé úrií dirí' oo al/awtantá koóm, gár tuwa hariím an geeraawósí sihhít, kuri ilaiwa/ameérií tléhh, nee kuúng Munguúwók ilaiwawa/eek. Aníng an AAKOÓ MUNGÚ.

³³ «Hoomo bir baraá yaamuuwók i dirii', mu gár tlaákw i tleehhaar.

³⁴ Hoomtuudá' nee kuúng an alhotá', tari adór yaamuloousmo diroge, ku slá' adór kuúng tir kilók sla'. Asma kuúng aáng a hoomtu baraá yaamaá Misriro. Aníng an AAKOÓ MUNGÚ, Munguúwók.

³⁵ «Muruú gana'aaká mu tlehhiitara' baraá kwasleemaro, muu mu al/agiimaara' ar qoomoó qoomaaká oo tlenaangw, nee oo iilooeema, nee oo hatsimisuuwo.

³⁶ A gár hariim xooslmoó taa ya/án kuwa ar qoomeemesa', nee qoomeemesuú qoóm. Aníng an AAKOÓ MUNGÚ, Munguúhúng, kudá' kuungá' naa baraá yaamaá Misrír wa duux.

³⁷ A gár hariim daber'eé' kawa ota', nee kaahir'eé' kawa eehada'. Aníng an AAKOÓ MUNGÚ.»