TLAHHOÓ LAÁWI 18 - Biblía Axweesantá Hhohho' ar Mungú 2004

Duuxór ta waki

¹ AAKOÓ MUNGÚ Mose guna báy,

² «Xoorór Israeli na baweek, aníng an AAKOÓ MUNGÚ, Munguúhúng.

³ Adoodár xoorór Misri i tlehhaahhit, amoodá' kuungá' niwa hoté', ma baloó tleehhara'. Laqaá adoodár múk yaamaá Kana'ani ni tlehhiitiya', amoodá' kuungá' ni huuw, ma baloó tleehhara'.

⁴ Kuungá' daber'eé' an eehadá' nee kaahir'eé' an otá'. Aníng an AAKOÓ MUNGÚ Munguúhúng.

⁵ Gawaá adoorihe daber'eé' na oohaak nee kaahir'eene as tawa hota'. Aníng an AAKOÓ MUNGÚ.

⁶ «Heé xoorór Israeli i harinká nee mar'afto'oorós ar tseew tawa fuquusi. Aníng an AAKOÓ MUNGÚ.

⁷ Miwa baloó deeruút hee baabuúwós nguwa mureekeesi ar iwa fuquusi nee aayoorós ar gwaa laqwal. Ma mureekeesaar, asma inós a aayoorók.

⁸ Baabuúwók mu mureekeesaar tawa fuqusa' nee hareerós tam gaalá. Asma inooín an ín aayo diroge.

⁹ Ma baloó fuquusara' nee hho'oorók barnaxes an hho'oorók ar kilá' laqaá ar aayír hatlá'.

¹⁰ Ma baloó fuquusara' nee hát naango, dasír garmaawók, asma /ankwetsuuín oo sufa, a adór kók.

¹¹ Ma baloó fuquusara' nee dasír aayór hatlá', ayoodá' taa duúx nee baabuúwók, asma dasisiíng a hho'o diroge.

¹² Ma baloó fuquusara' nee áyshigaárók, asma inós a hho'ór baabuúwók.

¹³ Ma baloó fuquusara' nee hho'ór aayírók, asma a aayírók ar niina, laqaá ar ur.

¹⁴ Ma baloó fuquusara' nee harér baabuúwók oo úr laqaá oo niiná asma tisíng a aayírók.

¹⁵ Ma baloó fuquusara' nee harér garmaawók, asma a harér garmaawók, ló' ma baloó fuquusara'.

¹⁶ Ma baloó fuquusara' nee harér hhiyaawók, asma inós a harér hhiyaawók.

¹⁷ Bar aga fuqusé' nee /ameeni, ma baloó fuquusara' nee dasiirós, laqaá haywaá hatós, asma inooín a hhae. Kiwa aleedogiiti ka tlaakw.

¹⁸ Hho'ór hareerók ma baloó duuxaar, qoomár hare bir sláf, asma gaasíng ni tlaampa'aamisuú húp.

¹⁹ «Ma fuquusara' nee /ameenír baraá hariimaarós ar slahhángw i dirii'.

²⁰ Ma baloó fuquusara' nee harér hee, nee tiri kilók slasla/arúr eér.

²¹ Na/aywók ló' mu baloó ilahhooár wa hanisaar dír munguú ta bay Moloki, asma adoosinge umuú Munguúwók u /oosliín. Aníng a AAKOÓ MUNGÚ.

²² Ma baloó fuquusara' nee hhawaata adór /ameenír wa aleeró, adoosíng ka waak.

²³ Ma baloó fuquusara' nee makiito'o as tiwa slasla/ares. /Ameeni laqaá hhawaata adoosíng mingiwa tleéhh, asma tlehhmuú adór kwisíng a qwanaay.

²⁴ «Miti slasla/areesaar ar adoosíng kawa tlehh, asma muruusíng an gár xoordu kudá' geeraahúngií diriiá' ngis gusisiim, asma inooín adoosíng ngina tleehhiyé' tari slasla/areesiyé'.

²⁵ Yaamuuín kina slasla/areés, aníng ngiri muúx, nee inooín kiri sií' nee yaamu.

²⁶ Ala kuungá', nee hoomár ayaahúng hoot, gár tunduwa hariím a hara'ayar'eé' nee daber'eene in otá', muruuwí slasla/arén mu tlehhitara'.

²⁷ Tlehhmi'iisíng slasla/aren mukduú yaamaá Kana'ani aa geerahúng wa hoot gina tleéhh, inooín yaamu kiri slasla/areés.

²⁸ Ala kuungá' adoosíng ma tleehhara', as yaamu munduwa si'iyé' adór mukduú geerahúng wa ale.

²⁹ Muu sleémeero oo muruudá' ta waki gu tlehhiít a gár hariím kun baynitimis dír muk'ín wa aleeró.

³⁰ «Gawaá adoorihe daber'eé' sleémeero oohaak, muruudá' slasla/arén ta waki mu aleealuusara', kudá' taa geeraahúng wa tleéhh nee mukdá' yaamu gaa geerahúng wa hoot, kuungá' miti slasla/areesara' ar tlehhmi'iidá'. Asma aníng an AAKOÓ MUNGÚ Munguúhúng.»