TLAHHOÓ LAÁWI 17 - Biblía Axweesantá Hhohho' ar Mungú 2004

Dabér tseerér hhohho'

¹ AAKOÓ MUNGÚ Mose gway báy,

² «Aroni nee na/iiwós nee xoorór Israeliwo ka beeto, AAKOÓ MUNGÚ gár naa hara'ayín a tí:

³ Heé xoorór Israeli barnaxés i awuú gaasár wa slaa', laqaá deelmoó bee/i, laqaá leei, baraá xaftá wa ale laqaá tsee/aá xafi,

⁴ kitángw ngiwa huwi dír afkú heémár Mungú didá' hhoohhoo' as ngiwa AAKOÓ MUNGÚ i haniisi, heedaádá' i dakuúsár kón ar tseere ngiwa ku'uús, nee inós kun baynitis dír xooroorós ar Israeliro.

⁵ Hara'ayaarí kana qaás as kahhó' xoorór Israeli hikwaaín kudá' geera ta tsu/i baraá aykú wa ale, ngiwa huwiya' dír AAKOÓ MUNGÚ, dír geeraá kaahamusmoó Mungú, nee dír afkú heémár Mungú, inós giri tsuu/, giri ilahhooár waydú wa haniis dír AAKOÓ MUNGÚ.

⁶ Naagáy kaahamusmoó Mungú tseere gari hikimiis gawaá kitángw ilahhooa oo AAKOÓ MUNGÚ, kuduú geeraá heémár Mungú i dirií', nee wahhnár hikwaadá' gari daa/ as tawa slaahhareeraá tsuuá' awa AAKOÓ MUNGÚ ngu sla'atimiisá'.

⁷ Gawaá adoorihe xoorór Israeli munguidaá lama awa slaqás nee slee ilahhooárií tsu/taaro ngi maye', asma gaarí an gár inkihhimu ngusa dakuusiye' dir'eene. Dakwí i hotaatín ay alhhe'eesay wasle, nee oo ta eehari ay qari sleémeero.

⁸ «Inooín ki beer, heé xoorór Israeli, laqaá hoomoó baraá tla/angw'ín wa hoót oo ilahhooár da/tá hanimiís, laqaá tam ilahhooár muruú ta tsu/i,

⁹ ala ngwa huwiiká dír geeraá heémár Mungú as nguwa gaasi dír AAKOÓ MUNGÚ, heewí aqo kun baynitis dír mukós oo Israeliro.

¹⁰ «Hee tam gaalá oo xoorór Israeli, laqaá hoomoó ayaaín wa hoót, oo tseere gaa /ayi, heedaádá' aníng u alkoóm nee nguri baynitís dír mukose.

¹¹ Asma slafíngw umuú gaaro i baraá tseere. Hara'aya ngina haniís as tseere ngiwa huba' dír kitángw ilahhooa, as haraki/isa kawa tleehhi as kuungá'. Asma tseere i haraki/isár tlehhít, asma slafiingw i baraá tseere.

¹² An gár aníng hara'aya ngisa oó' dír xoorór Israeli, nee hoomár ayaaín hoota, as tseere makawa baloó /aáy.

¹³ «Heé xoorór Israeli laqaá hoomoó ayaaín wa hoót bira makiito'ór slaktuú áy, laqaá tsir/i, a gár hariim tseere ngiwa yaamií ku'uusi, gari hhapeérár tiip.

¹⁴ Asma slafíngw umuú gaaro i baraá tseere, an gár xoorór Israeli ngisa báw, ‹Tseerér umuú makiito'ooro ka waak /aymaaro, asma slafíngw umuú gaaro i baraá tseere.›

¹⁵ «Heé yaamuloousmo laqaá hoomo oo gár aa kilós gwa' gaa /aay, laqaá ar taa gaás nee makiito'ór sla/a, gár kuwa hariím tlabaawós gin hhuunts, nee iri hamtlín, inós iri dah baraá meeta ay tsiindo. Aluuwo iri hhoohhooúy.

¹⁶ Ala bar tlabaawós gaa hhuuntsiiká nee aa hamtlinká, heewí tlakweemaawós i daanduuwós.»