TLAHHOÓ LAÁWI 16 - Biblía Axweesantá Hhohho' ar Mungú 2004

Baalár haraki/isa

¹ AAKOÓ MUNGÚ Mose guna i axweés, alaá daaqoó tsár oo Aroni iwa qaátl, qoomár nguwa ilahhooárí haniisiyé' ar loohír qoomaaká.

² Guna báy, «Hhiyaawók ádbaweek, umuúqo qoomaaro miwa daráh didá' hhoohhoo', ar alaá inqwaaridá' do' gwaa tla/a qasis, dír geeraá kitángw gurtleemu, kuduú gawaá sandakmoó alqado, as kahhó' miwa gwaá'. Asma aníng ti geehhooeés ar baraá huunki gawaá kitangwdú gurtleemuú wa ale.

³ Aroni in didá' hhoohhoó' i dah ar tsa/atmoó awu as ilahhooár tlakweema hingeesa, nee gwaanda as ilahhooár da/a.

⁴ «Iri hamtlín ar ma'aay, tlabaá hhohho' giri tsiit. Iri dah didá' hhoohhoo' naa qaroó tsiitín tlabaawós kudá' hhohhoe: Hiyoó hhoohhoó' oo taa tleéhh ar kitaáni ngun dahaas daanduú suruwánidár kitaánír wa ale, nee hiyaydá' tleér oo kitaáni ngwa qaroó dahaás, nee tla/aangose himuú kitaáni ngwaa tseék.

⁵ «Baraá muruuduú xoorooro gurtaawe tsár gari taataahh, nee gari haniis as ilahhooár tlakweema hingeesa, nee gwaanduú wák as tawa ilahhooár da/a.

⁶ Aroni tsa/atamooduú awu guri ilahhooár tlakweema hingeesár wa haniis as inós, nee haraki/isa gari tleehh inósuú kilá' nee as daanduú múk do'ós.

⁷ Naagáy gurtaaweedá' tsár gari qaas dír geeraá AAKOÓ MUNGÚ dír afkú heémár Mungú.

⁸ Gurtaaweedá' gari tsawdoórí tleehh, oo wák tawa oo AAKOÓ MUNGÚ, nee kooko tawa oo Asaseli.

⁹ Gurtuudá' tsawdo aa sleér as AAKOÓ MUNGÚ guri haniis ilahhooár tlakweema hingeesár wa ale.

¹⁰ Ala gurtuudá' tsawdo aa sleér as Asaseli guri duúx dír geeraá AAKOÓ MUNGÚ slafi ale, as haraki/isa ngiwa tleehhi, nee kaahamusmoó Mungú gurtuudá' guri geemáy baraá xaanxay as Asaseli, as tlakweemaá xooro hingeesa.

¹¹ «Aroni awuuduú ilahhooár tlakweema hingeesa guri haniis as inós, nee haraki/isa gari tleehh as inós nee múk do'ós. Naagáy awuudá' gway gaas as ilahhooár tlakweema hingeesa.

¹² Xooslmoó taa tleéhh ar tleei guri taataahh, guri gil'oodár gawaá kitángw ilahhooárí qaas, kuduú dír geeraá AAKOÓ MUNGÚ, nee tsa/a'aá tsár awa mooyángw taa xoosla hhe'eés. Inós ngiri huuw baraá guruú inqwaaridá' do' gwa tla/a qasis.

¹³ Inós mooyangwdá' ngun huuw dír geeraá AAKOÓ MUNGÚ, guri baraá ásltí qaas, nee quuír mooyangwdá' kitangwduú gurtleemu, kuduú gawaá sandakmoó alqado, guri tuuntúk. Adoorí ngi tleehhi as kahhó' miwa gwaá'.

¹⁴ Tseerér awuudá' gari bahh diitsarós ar tikiis gari hikimiis bihhaá da/aáw awa kitangwduú gurtleemu, nee geeraá sandakmooduú alqado ki/ima faanqw.

¹⁵ «Aluuwo gurtuú ilahhooár tlakweema hingeesa guri gaas as muu sleémeero. Tseerér gurtuudá' gari baraádií huúw, didá' ak hhoohhoo', ar adór tseerér awu ngaa /imiís, gari hikimiís gawaá kitángw gurtleemu nee amór geeraá kitaango.

¹⁶ Naagáy haraki/isa gari tleehh as didá' hhoohhoo' taa slasla/areés nee tlakweema nee dakumisuú xoorór Israeli. Adoorí gari malé tleehh as heémár Mungú, tidá' baraá tla/ángw inooínadaá tlakuuse.

¹⁷ Qoomár Aroni bir haraki/isár tleehh as inós nee múk do'ós, nee as xoorór Israeli, hee miwa deeruút baraá guruú heémaro ay dír kaangwí ngway faaki, nee iri ti'iit tsee/áy ale.

¹⁸ Aluuwo niri tsee/áy ti'iit ay dír kitangwduú ilahhooa oo dír geeraá AAKOÓ MUNGÚ, tseerér awu nee ar gurtuuwo gari bahh taataahh, gari sliik ar xareemaá kitangwduú ilahhooa.

¹⁹ Tseereedá' gari hikimiis ar diitsa ki/ima faanqw gawaá kitángw ilahhooa, guri paraatl, gari hhohhoees slasla/areema sleémeerowo awa múk Israeli.»

Gurtuú ta baraá xaanxáy guusi

²⁰ «Alaá Aroni haraki/isa ngiwa hhe'eés as didá' hhoohhoo' nee heémár Mungú nee kitángw ilahhooa, gurtuudá' slaáf oo Asaseli guri haniis.

²¹ Aroni dabaawós giri qaas gawaá ságw gurtuudá' slaáf, tlakweema nee dakumisuú xoorór Israeliwo giri gawaá gurtuudií hhu'uu'ún, as gurtuudá' ngiwa gagaari. Naagáy gurtuudá' gway geemáy baraá xaanxaay, kway haniis dír heé taa amohhe'eés.

²² Gurtuudá' kway huuw baraá xaanxaay dír múk koomaaká, inós tlakweemaaín sleémeero gaa gagaár.

²³ «Naagáy Aroni iri kii/ baraá heémár Mungú, tsitaywós kudá' taa tleéhh ar kitaáni, kudá' aa dahaás qoomár iwa dahmaá ay didá' ló'wa hhoohhoo', guri duux, guri didií geexáy.

²⁴ Iri didá' hhoohhoó' wa hamtlín nee tlabaawós giri dahaas, iri ti'iit, ilahhooarós ar da/a gari haniis, nee ilahhooár da/a ar múk Israeli, as haraki/isa ngiwa tleehhi as inós nee as muu sleémeero.

²⁵ Wahhnár ilahhooár tlakweema hingeesa gari daa/ gawaá kitángw ilahhooa.

²⁶ Heedaádá' gurtuudá' gwaa huuw amór Asaseli geeraá kilae tlabaawós gin hhuunts, iri hamtlín, daqaní iri sangw dah baraá xafi.

²⁷ Awuudá' nee gurtuuwo taa haniis as ilahhooár tlakweema hingeesa, kudá' tseerer'ín taa huúw didá' ló'wa hhoohhoo' as haraki/isa kawa tleehhi, kin tsee/aá xáftí huuw. Kaduuín nee fu'unaywo, nee sankaro, sleémeero kiri daa/.

²⁸ Heedaádá' gi daá/ tlabaawós gin hhuunts nee iri hamtlín, daqaní iri sangw dah baraá xafi.»

Deelór haraki/isa kawa harmagaahhi

²⁹ «Gaarí an dabér ta eehada' ay alhhe'eesay wasle. Bál slahhángw faanqw bar mibaangw kuungaá kilá' nee hoomár ayaahúng hoota, a gár hariim tawa gwaawiinda', nee gadiyeé kawa meera' tleehharo.

³⁰ Adoorí an tlehhá' asma baalaasíng an baalár kuungá' tunduwa firór waydií tleehhi, tlakweemaahúng kiwa hhohhoeesi, nee kuungá' tawa hhoohhoeera' dír geeraá AAKOÓ MUNGUHE.

³¹ Baalaarí an Sabaátór hungu/umaá bu'uutá' awa kuungá' tawa gwaawiinda'. Dakwí an dákw hotaatiím ay alhhe'eesay wasle.

³² Kaahamusmoó Mungú oo taa paraátl nee oo taa dí/tár iimbalaáx as gadiyér baabuúwós ngiwa oohi, an heé haraki/isa ga tleéhh, nee masók tlabaadá' hhohho' awa taa tleéhh ar kitaáni ngaa dahaás.

³³ Haraki/isa gari tleehh as didá' hhoohhoo' nee as heémár Mungú, nee as kitángw ilahhooa nee as kaahamuuse, nee as dinku'uumár xoorór Israeli.

³⁴ Gaarí an dákw hotaatiím ay alhhe'eesay wasle, a hariima kuwa eehada' nee haraki/isa kawa tlehhita' as múk Israeli ki/ima wak baraá kurko as tlakweemaaín sleémeero kiwa gurtlatlay.» Aroni muruuwí sleémeero guri tleéhh ar adoodá' AAKOÓ MUNGÚ Mose ngura hara'ayín.