TLAHHOÓ LAÁWI 15 - Biblía Axweesantá Hhohho' ar Mungú 2004

Muruú meetaá gaamiís oo baraá slaqwtá wa ti'imiít

¹ AAKOÓ MUNGÚ Mose nee Aroni giri báy,

² «Xoorór Israeli bawaak, barnaxes hhawaata i malalaahh as tiqtír tsaatu'uuma ngiwa sláy, daqaní malhhartidá' gwaa meetagás.

³ Barnaxes malhharo i baraá slaqwtós wá ti'imít laqaá tam i ti'imitká, inós gwaa qoo meetagás.

⁴ Qatanír i qaát laqaá kitángw i iwiít kwaa meetagaás.

⁵ Umuúqo heé qatanír heewí gaa qoo kwatiiti harihhoóarós a tlabaawós gin hhuunts, nee slaqwtós gari ma'ár hamaatl, nee inós i baraá meeta ay tsiindo.

⁶ Umuúqo gár heedaádá' malalaáhh aa i iiwiiti bar hee ngaa i iwiít, harihhoóarós a tlabaawós gin hhuunts, nee iri hamtlín, inós i baraá meeta ay tsiindo.

⁷ Heé heedaádá' gwaa kwatiit aqo tlabaawós gin hhuunts, iri hamtlín, inós i baraá meeta ay tsiindo.

⁸ Heé taa i tsuúq nee heedaádá' malalaáhh aqo tlabaawós gin hhuunts, iri hamtlín, inós i baraá meeta ay tsiindo.

⁹ Tlawuú taa hhaáf gawaá makiito'o oo heé malalaáhh aa i iwiít kun harmeetín.

¹⁰ Hee bar gár heé malalaáhh gaa kwatiít tidá' aa i iwiít, inós i baraá meeta ay tsiindo. Heé gár heedaádá' gaa loohiis harihhoóarós a tlabaawós gin hhuunts iri hamtlín, inós i baraá meeta ay tsiindo.

¹¹ Hee bar malhhari nguwa ti'imít, slám dabaawós gaa hamatliiká geerií ale, inós hee guri kwatiít, harihhoóarós tlabaawós gin hhuunts nee in ma'ár hamtlín, nee inós i baraá meeta ay tsiindo.

¹² Xooslmoó tleei oo taa kwatiít nee heé malalaáhh, harihhoóarós aqo kun gaas. Ala bar xooslmoó xa'ano, harihhoóarós aqo kun hamaatl ar ma'aay.

¹³ «Hhawaatuú malalaáhh bira hunguú/ gár kuwa hariím in dán deelo faanqw dír meetaawós nira faaki'iiká. Tlabaawós giri hhuunts, nee iri hamtlín ar ma'aá kutli, iri hhohhooúy.

¹⁴ Bál dakaate gár kuwa hariím a hhooka tsár, laqaá na/aá tsár awa hhooka gin huuw dír geeraá AAKOÓ MUNGÚ, dír afkú heémár Mungú, nee gari haniis dír kaahamusmoó Mungú.

¹⁵ Kaahamusmoó Mungú giri haniis, ar wák as ilahhooár tlakweema hingeesa, nee ar hatlá' as ilahhooár da/a. Kaahamusmoó Mungú heedaádá' guri haraki/isárí tleehh dír geeraá AAKOÓ MUNGÚ wa ale, as iwa malalaáhh.

¹⁶ «Barnaxes hhawaata aa pisaahhaát, gár kuwa hariím a slaqwa gan sleémeero wa hamaatl, inós i baraá meeta ay tsiindo.

¹⁷ Tsitoó ma'aydá' naa layé', laqaá fala gár kawa hariím a kan hamaatl ar ma'aay, nee ka harmeetin ay tsiindo.

¹⁸ Barnaxes hhawaata nee /ameeni taa fuquús, ma'aay nay ti'iitiyé', harihhoóar'ín aqo tan ma'ár hamtlín, nee inooín i baraá meeta ay tsiindo.

¹⁹ «/Ameeni bir baraá hariímaarós ar slahhaángwí dirí' inós i baraá meeta deelo faanqw. Hee barnaxes ngaa kwatiít i baraá meeta ay tsiindo.

²⁰ Umuúqo gaaro ar aa al'iwiti, laqaá ar aa alqati, aa meetagwá'.

²¹ Hee bar qatanír /ameenidá' gaa kwatiít i baraá meeta, harihhoóarós aa in hamtlín, nee tlabaawós gin hhuunts, nee inós i baraá meeta ay tsiindo.

²² Hee barnaxes gár /ameenidá' aa al'iwít gaa kwatiít, harihhoóarós a tlabaawós gin hhuunts nee iri hamtlín, inós i baraá meeta ay tsiindo.

²³ Hee bar gár /ameenidá' gaa kwatiít, laqaá gaa alqaát, laqaá gaa al'iwiít, inós i baraá meeta ay tsiindo.

²⁴ Barnaxes hhawaata nee /ameenír baraá hariímaarós ar slahhaángwí dirii' taa alqaát, inós i baraá meeta deelo faanqwe. Qatanír hhawaatundá' i qaati aa meetagwá'.

²⁵ «/Ameeni barnaxes tseerdu ngi alti'imitiyá' deelór yaariire, ala a qoomár deelooroseeká, laqaá deeloodár hariímarós bira waaráhh nee tseerdu i kumiitiyá', inós i baraá meeta deelo sleémeero ar tseerdu ngiwa alti'imitiia.

²⁶ Qatani laqaá kitángw i iwiti, qooma sleémeero ar tseerdu ngiwa alti'imitiia, aqo kan harmeetín adoodá' iwa baraá hariímaarós ar slahhaángwí diri'.

²⁷ Hee barnaxes muruuwós kudá' gwaa kwatiít, kwaa meetagaás, harihhoóarós in hhuuntsiit, nee in hamtlín, inós i baraá meeta ay tsiindo.

²⁸ Ala tseerduuwós birna qawiyé', inós in daán deelo faanqwe, nee alaá deeloodae inós aa hhoohhoouúr.

²⁹ Bál dakaate hhooka tsár laqaá na/aá tsár awa hhooki ngi hup dír kaahamusmoó Mungú dír afkú heémár Mungú.

³⁰ Kaahamusmoó Mungú hhookír wák gari haniis ilahhooár tlakweema hingeesa, nee ar hatlá' as ilahhooár da/a. Ar adoorihe kaahamusmo haraki/isa gari tleehh as daanduú /ameenirí dír geeraá AAKOÓ MUNGUHE, as tseerdu ngiwa al'ubaabiné'.

³¹ «Adoorí an adór xoorór Israeli kar iislax as tiwa harmeetina' as dir'eé' tidá' hhoohhoo' ar baraá tla/angw'ín makawa meetagaás, ar darhuuín qoomár bir baraá meeta, bar adoosíng ngaa tleehhiyé' i qatliyá' baraá meetagaasar'ín.»

³² Adoorí an dabe ar hhawaatuú malalaáhh as tiqtír tsaatu'uuma, nee oo aa pisaahhaat, nee iwa baraá meeta.

³³ Dabeerí i /ameenír wa hariín tidá' ubíngw tseerdaá koom nee ar baraá meeta. Dabeerí sleeme i hhawaate nee /ameenár wa hariín ar ubíngw kooma, nee hhawaatuú nee /ameenír baraá hariímarós ar slahhaangwí dirii' naa alqaatiye'.