TLAHHOÓ LAÁWI 14 - Biblía Axweesantá Hhohho' ar Mungú 2004

Hhehhe'eemisuú hee alaá bira huunguú/ deeiro

¹ Aakoó MUNGÚ Mose guri báy,

² «Gaarí an dabér heé aa hunguu/ tiqtír tsatimituuwo, bál burkwa hhoohhooeés. Alaá bira hunguú/ ku huwi dír kaahamusmoó Mungú.

³ Kaahamusmoó Mungú gun ar tláy ay tsee/aá xafi, as nguwa ari áx aa hunguú/i.

⁴ Naagáy kaahamusmo hara'aya gari oo' dír muu, as tsir/o tsár ar hhohho' ar slaaf kingiwa huwi, nee parhheemaá sahhta, nee se'éngw da/atén, nee halmír hisoópo, as heewí kuwa hhoohhooeesi.

⁵ Kaahamusmoó Mungú hara'aya gari oó' ar tsir/ír wák kawa gaasi, kari qaas baraá hutloó ma'aá hhohho' awa kutli.

⁶ Kaahamusmoó Mungú tsir/idár hatlá' ar slaaf nee parhhamtá sahhti nee se'éngw da/atén, nee haleemaá hisoópo, muruuwí sleémeero guri /aytiis baraá tseereedár tsir/idár geera taa gaás.

⁷ Naagáy tseereedá' gari hikimiis gawaá heedaádá' taa hhoohhooeés ay ki/ima faanqw. Iri ooi heedaádá' aa hhoohhooúy. Tsir/idá' slaaf kay geemáy, iri tleér baraá sla/a.

⁸ Aluuwo heedaádá' tlabaawós giri hhuunts, se'eengós guri deeqw, iri hamtlín, inós iri hhohhooúy. Adoorí bira hhooeér iri kii/ baraá xafi, ala i dahiiká baraá heéma ay deelo faanqw.

⁹ Bál faanqwe se'eengós sleémeero nee daamoode nee hhamhhamaá ilaawo giri deeqw. Naagáy tlabaawós giri hhuunts, iri hamtlín ar ma'aay, inós iri hhoohhooúy.

¹⁰ «Bál dakaate deelmoó gwaanda oo xaslxaansli wásl, nee dareemír kurkú wák ar xaslxaansli wasl, nee kílo tám ar puuruú natsaatsaá' oo taa dí/tí aleedoók, as ilahhooár bu'uungw, dinkwa nee di/tá niina ar tlaqtá liíta gaa eeriiká ngiri huuw.

¹¹ Heedaádá' taa hhoohhooeés kaahamusmoó Mungú guri huuw dír geeraá AAKOÓ MUNGÚ, bihhaá afkú heémár Mungú, dinkwa nee muruuwós kudá' sleémeero naa huwi.

¹² Kaahamusmoó Mungú deelmooduú gwaanda oo wák guri oh dinkwa nee di/tá niina ar tlaqtá liíta, gari haniis as ilahhooár dakuús hingeesa wa ale, giri gáwtí tlees as ngiwa haniisi dír AAKOÓ MUNGÚ.

¹³ Naagáy deelmooduú bee/i guri gaas didá' hhoohhoo' ar makaá ilahhooár tlakweema hingeesa nee ilahhooár da/a ki tsu/aa/in. Ilahhooarír dakuús hingeesa nee ar tlakweema hingeesaro a hariímár kaahamusmoó Mungú.

¹⁴ Kaahamusmoó Mungú tseerér niiná ar ilahhooár dakuús hingeesa gan taataahh, gari sliik gawaá ságw iiár doó /iyáy nee dugunoó dákw doó /iyáy, nee dugunoó yaaér doó /iyáy as heedaádá' kuwa hhoohhooeesi.

¹⁵ Naagáy kaahamusmoó Mungú di/tá niiná ar tlaqtá liíta gari qaas baraá dakós oo doó basáy.

¹⁶ Gari tikiis ar diitsár dákw doó /iyáy, di/tadá' gari hikimiis gawaá heedaádá' ta hhoohhooeemisi sagaáwa faanqw dír geeraá AAKOÓ MUNGÚ.

¹⁷ Naagáy di/tá aa met baraá tsa/aywós gari sliik gawaá ságw iiár doó /iyáy nee gawaá dugunoó dákw doó /iyáy, nee gawaá dugunoó yaaér doó /iyáy ar heedaádá' ta hheehhe'eesi, dír aa sliík a didá' aa geerií sliík ar tseereedár ilahhooár dakuús hingeesa.

¹⁸ Di/tá aa met gari sliik gawaá ságw heedaádá'. Gawaá adoorihe kaahamusmoó Mungú haraki/isa gari tleehh dír geeraá AAKOÓ MUNGÚ wa ale as daanduú heewí.

¹⁹ «Kaahamusmoó Mungú ilahhooár tlakweema hingeesa gari haniis, nee heedaádá' ta hhehhe'eemisi guri haraki/isárí tleehh as meetaawós kiwa hingeesi. Naagáy deelmoó bee/i oo ilahhooár da/a guri gaas.

²⁰ Kaahamusmoó Mungú ilahhooár da/a gari haniis nee ilahhooár balaango gawaá kitángw ilahhooa, gawaá adoorihe kaahamusmoó Mungú haraki/isa gari tleehh as daanduú heewí, heedaádá' iri hhoohhooúy.

²¹ «Ala barnaxes heedaádá' a narkutmo, a heé aleesleemuú koomaaká, inós deelmoó wák oo gwaanda ngu huwi, tawa ilahhooár dakuús hingeesa oo ta gáwtí tleesi as kuwa haniisi dír Mungú as heedaádá' kuwa haraki/isárí tleehhi. Sleeme kílór wák ar puuruú natsaataá' oo taa aleedoók nee di/tá niina ar har tlaqtá liíta ngi haniisi tawa ilahhooár balaangw.

²² Hhooka tsár laqaá na/aá tsár awa hhooka ngi huwi ar adór aleesleemuwós, ar wák tawa ilahhooár tlakweema hingeesa, nee tooka tari ar ilahhooár da/a.

²³ Bál dakaate heedaádá' muruuwí gun huuw geeraá kaahamusmoó Mungú, dír geeraá heémár Mungú as kuwa hhoohhooeesi dír geeraá Mungú wa ale.

²⁴ Kaahamusmoó Mungú deelmooduú gwaanda oo ilahhooár dakuús hingeesa, dinkwa nee di/tá niina ar har tlaqtá liíta gari gáwtí tlees tawa ilahhooár ta haniisi dír AAKOÓ MUNGÚ.

²⁵ Kaahamusmoó Mungú gwaanduudá' niiná oo ilahhooár dakuús hingeesa, guri gaas, kaahamusmo tseerér niina gari sliik gawaá iiár doó /iyáy ar heé ta hheehhe'eemisi, nee gawaá dugunoó dákw doó /iyáy, nee gawaá dugunoó yaaér doó /iyáy.

²⁶ Kaahamusmoó Mungú di/tá niina gari qaas baraá tsa/oó dakós oo doó basáy.

²⁷ Naagáy di/tá niina gari hikimiis ar diitsarós ar doó /iyáy, ki/ima faanqw dír geeraá Mungú wa ale.

²⁸ Kaahamusmoó Mungú heedaádá' ta hhehhe'eemisi guri sliik ar di/tadá' ságw iiár doó /iyáy, nee dugunoó dákw doó /iyáy, nee dugunoó yaaér doó /iyáy, wa/ameedá' aáng aa geerií slikín ar tseerér ilahhooadár dakuús hingeesa.

²⁹ Di/tá aa met gawaá dabaawós gari sliik gawaá ságw heedaádá' ta hhehhe'eemisi as nguwa haraki/isárí tleehhi dír geeraá AAKOÓ MUNGUHE.

³⁰ Naagáy kaahamusmoó Mungú hhookír wák, laqaá na/oó wák oo hhookír heedaádá' guri oh ar adór heedaádá' aa aleesláy huwto.

³¹ Hhookír wák as ilahhooár tlakweema hingeesa, ar hatlá' ar ilahhooár da/a dinkwa nee ilahhooár balaangw, giri haniis, kaahamusmo guri haraki/isárií tleehh dír geeraá AAKOÓ MUNGUHE.

³² Gaarí an dabér heé tiqtír tsatmit oo dawa kaahaár oo ilahhooár hheehhe'eesarós ga koomaaká.»

Deeír baraá maraay

³³ AAKOÓ MUNGÚ Mose nee Aroni giri báy,

³⁴ «Barnaxes aga daté' baraá yaamaá Kana'ani, kudá' aníng na dirhúngí haniís kiwa ala', aníng dir/akuú tiqtír tsatmituú koóm ugwa qaás gawaá koo/ír maraykaariya' kuungá' ta ala'.

³⁵ Ala heé do'dá' gwa i dah kaahamusmoó Mungú ngu bay, ‹Dooeé' i dir/akuú tiqtír tsatmituú kón.›

³⁶ Kaahamusmoó Mungú hara'aya gari oo' as xooslaá baraá do' sleémeero kiwa tsee/áy duuxi, dír inós tsee/ariingw ngura iimu/unká, asma xooslár baraá dó'wí mingiwa harafaár tawa xooslár ta waki. Duuxaro barka hhe'eés daqaní kaahamusmoó Mungú iri sangw tsee/aaríngw áy,

³⁷ dir/akuú tiqtidár tsatmit guri tsee/aarín áx koo/i gaa altsiyayaaxáti nee kaloó qaantsaár ngwaa laqaándi, laqaá daa/ateema nee aa dáti baraá koo/i.

³⁸ Naagáy kaahamusmoó Mungú bar ngaa ár, nin tsee/áy ti'iit, do'dá' guri tseek deeloo faanqw.

³⁹ Bál faanqwe kaahamusmoó Mungú iri kii/, do' guri xuuxuu' axáy dir/akuú tiqtidár tsatmit do' gwaa aleetsáti.

⁴⁰ Barnaxes gwaa aleetsaát kaahamusmoó Mungú hara'aya gari oo' as wa/angwdá' dir/akuú tiqtír tsatmituú koóm kuwa fee/i, nee kuwa kwahhi gawaá ufuú xwaansláy amór tsee/aá gixsa.

⁴¹ Na/amisuú do'dá' ku fee/i nee tsa/eewastá do'dá' ka kwahhi gawaá ufuú xwaansláy tsee/aá gixsa.

⁴² Naagáy tlaa/aá /aben ki didá' taa feé/ ar tleehhi, nee na/amisuú /abén ku na/aasi.

⁴³ «Barnaxes dir/akuú tiqtír tsatmit naa male deeruút, alaá tlaa/aá /aben kiwa qaás nee na/amisuú /abene,

⁴⁴ daqaní i hariín kaahamusmoó Mungú do'dá' nguwa tsee/aarin axáy dir/akuú tiqtír tsatmit do' gwaa aleetsáti. Bar ngwaa aleetsaát, daqaní tiqtisíng i tsiyayaaxamít nee do'osíng aa meetagwaá'.

⁴⁵ Do'dá' gár kuwa hariím a kun fee/ nee tlaa/eewós nee xaaiiwo nee na/amisuuwo, kiri kwahhtá áy tsee/aá gixsa, dír ufuú xwaansláy.

⁴⁶ Gawaá adoorihe hee bira dáh baraá do'dá' taa tseék, inós ku harmeetín ay tsiindo.

⁴⁷ Umuúqo heé aa qaat, laqaá oo aa /ayin baraá do'dá' wa alé, harihhoóarós a tlabaawós gin hhuunts.

⁴⁸ «Ala barnaxés do'dá' kwaa tsee/aarín nee kaahamusmoó Mungú, tiqtír tsatmit aa tsiyayaxatiká alaá na/amisuuwo, kaahamusmoó Mungú kaangw ngu ooi adór do'dá' ira hhoohhooúy, nee tiqtír tsatmit ira fák.

⁴⁹ As do'dá' kuwa hheehhe'eesi, heé do' loó' tsir/o tsár nee parhhamtá sahhti, nee se'éngw da/atén oo bee/aangw, nee halmír hisoópo ngi huwi.

⁵⁰ Tsir/ír wák gan gaas gawaá qataaír ma'aá hhohho' awa kutli.

⁵¹ Parhhamtá sahhti nee halmír hisoópo nee se'éngw da/atén oo bee/aangw, dinkwa nee tsir/idá' slaaf giri /aytiis sleémeero baraá tseerér tsir/idá' taa gaás nee ma'aydaá kutli, naagáy gari hikimiis ki/ima faanqw baraá do'dií ale.

⁵² Adoorí an adór do'dá' kur hheehhe'eesi ar tseerér tsir/idá' nee ma'aá hhohho' awa kutli nee tsir/idá' slaaf nee parhhamtá sahhti, nee halmír hisoópo nee se'éngw da/atén oo bee/aangw.

⁵³ Tsir/idá' slaaf gari geemáy tsee/aá gixsa. Adoorí an adór do'dá' kur haraki/isárí tleehhi nee iri hhoohhooúy.

⁵⁴ «Gaarí an dabér dimbadimbé ar deei nee tiqtír tsatmit sleémeero kar hhohhoeemamisi,

⁵⁵ nee deeír baraá inqwar laqaá baraá do',

⁵⁶ nee xiri'ima nee um'i nee sliiqi.

⁵⁷ Adoorí an adór gár slasla/aar kar tsaahhi nee ar hhoohhooe. Adoorí an adór dabér tiqtír tsatmit i diri'.»