TLAHHOÓ LAÁWI 12 - Biblía Axweesantá Hhohho' ar Mungú 2004

Hhohhoeesár /ameena alaá xwaylaro

¹ AAKOÓ MUNGÚ Mose guri báy,

² «Múk Israeli ku beeto, /ameeni bar aa tsít na/oó garma guri xwayluúr, i baraá meeta deelo faanqw, slaqás nee deeloodá' /ameeni iwa baraá hariímarós i diri'.

³ Bál dakaate na/aay ku al/utli.

⁴ Naagáy aayoorós iri baraá meetií dirí' deelo mibeeri tám nee tám. Qoomaarihe gár taa paraátl mingiwa kwatít laqaá miwa baloó dát didá' hhoohhoo', ay bál deeloorós tidár hhoohhooeesa i bo/.

⁵ «Ala bar na/oó aa xwayluúr a dasi, inós i baraá meeta har wiíki tsare, slaqás nee deeloodá' /ameeni iwa baraá hariímarós i diri', iri kumít tiwa hhoohhooeemis, deelo mibeeri lahhoó' nee lahhoó'.

⁶ «Baalaarós ar hhohhoeesa bira bó/, na/aay bar garma laqaá bar dasi, deelmoó bee/i oo kurkú wák gun húp dír kaahamusmoó Mungú, dír afkú heémár Mungú, as tawa ilahhooár da/a. Na/oó hhooki ngun húp sleeme, kaahamusmo guri haniis geeraá Mungú as tawa ilahhooár tlakweema hingeesa.

⁷ Kaahamusmo gan dír geeraá AAKOÓ MUNGÚ i haniis, /ameenidá' gari haraki/isárí tleehh, inós iri hhoohhoouúr baraá tseerduuwose. Gaarí tari dawa dír /ameenár na/oó garma gwaa xwayluur laqaá oo dasi.

⁸ «Barnaxes deelmoó bee/i ku aleeslayká haniisaro, hhookár tsár ka huwi, laqaá na/aá hhooka awa tsár, ar wák as ilahhooár da/a, nee ar hatlá' as ilahhooár tlakweema hingeesa. Kaahamusmoó Mungú haraki/isa gari tleehh, inós iri hhoohhoouúr.»