TLAHHOÓ LAÁWI 11 - Biblía Axweesantá Hhohho' ar Mungú 2004

Makaá /aymaaro ta waki nee awa ta /aa/ayi

¹ AAKOÓ MUNGÚ Mose nee Aroni giri báy,

² «Xoorór Israeli adoorí bawaak, makaá ni oo' an makaá /aymaaro hariimá', baraá tla/ángw makaá daanduú yaamu sleémeero.

³ Makaay sleémeero awa fuqeeni tsár nee awa /aaruusá' an kudá' ta /aga'.

⁴ Ala makaay bahh'ale tam i /aaruusiia mi /ayaara', asma fuqeenii'ín naa qasitii'iiká. Ala kookariya' tam fuqeenii'ín kaa tla/a qasiisi i /aaruusiaaká. Angaamía tam i /aaruusa, ma /aayaara', asma fuqunoowós kwaa tla/a qasisiiká. Ka waak /aymaaro dirhunge.

⁵ Kwe/ee/ana ma /ayaara' tam i /aaruusa, asma ya'aawós i fuunqáruú kona'aaká. Inós ka waak /aymaaro dirhunge.

⁶ Kwa/aangw mu /ayaara' tam i /aaruusi, asma ya'aawós i fuunqáruú kona'aaká. Inós ku waak /aymaaro dirhunge.

⁷ Baynamo mu /ayaara' tam fuqeeniwós kaa qasiisi, asma i /aaruusiiká. Inós ku waak /aymaaro dirhunge.

⁸ Asma makayká' kiwa waki, mi /ayaara', laqaá tu'uuín mi kwatitara'.

⁹ «Siyó sleémeero oo baraá tlawi, laqaá oo baraá yaae, i harín kuwa /aga', barnaxes i hhampa'aá kón nee darqeefoowo.

¹⁰ Ala muruú slaáf oo baraá tlawtá hoót, laqaá baraá yau, oo hhaampa'aá koomaaká laqaá darqeefo, ki waak /aymaaro.

¹¹ Muruuwí dirhunge ku waak daqisleém, fu'unay'ín mi /ayaara', laqaá tu'uuín mi kwatiitara', asma ki waak dirhunge.

¹² Umuúqo gár baraá ma'aá hoot, ar hhampa'aá koomaaká nee darqeefowo ka waak dirhunge.

¹³ «Tsir/oorí sleémeero ni dirhúngí oo' ka waak dirhunge, slám ma /ayaara': Gwareesi, nee deelgaasi, nee gíd/awú,

¹⁴ nee kuuraay nee daa'awemo sleémeero awa /awa/awi,

¹⁵ nee daa'awemo sleémeero awa xwaa'aro,

¹⁶ nee sakweeli, nee hár kuuraay, nee kuruumbú, nee geenaawér daa'awemo sleémeero,

¹⁷ nee hár koonki, nee daa'awtá halé/, nee udombalilí,

¹⁸ nee halé/, nee hoomaa/áy, nee diingo,

¹⁹ nee qunqaál, nee daa'awtá diingo sleémeero, nee daa'awtá hhurí, nee hhamparara'amó.

²⁰ «Makaydá' sleémeero awa hhampa'aá koomá', nee awa ya'a tsiyáhh, kuká' ki waak dirhunge.

²¹ Ala makaay bahh'ale awa hhampa'aá koomá' nee kudá' ya'aá tsiyáhhár hi'iimitá' sleémeero i hariná' /aymaaro, kudá' /akumiitá' ar ya'aaín.

²² Adór daa'awemo sleémeero awa ingigi ar ninakw nee ar urene, nee daa'awemo sleémeero awa tsaxwi'i kudá' qantsaren nee awa hatlae.

²³ Ala makaydaá hatlá' sleémeero awa hhampa'aá koomá' nee awa ya'a' tsiyáhh ki waak dirhunge.

²⁴ «Makaay bahh'ale tu'uuín birka kwatimiít, hee ngun meetagaasiyá' ay tsiindo.

²⁵ Bar hee fu'unaá tuua gaa baraaka ar tláy, inós kwaa meetagaás ay tsiindo, tlabaawós gár kiwa hariím a kin hhuunts.

²⁶ Makiito'ór fuqeeniiwós taa qasiís ala guruú fuquno kwa qasiisiiká, slám a tidá' /aaruusaaká, hee bar ngaa kwatiít, inós kwa meetagaás.

²⁷ Makaay sleémeero awa fuunqár wasl awa hi'iimita' ar ya'aá tsiyáhh, ki waak dirhunge, nee umuúqo heewo oo tuuar'ín gaa kwatiit kwaa meetagaás ay tsiindo.

²⁸ Heé taa slasla/arees ar tuuaarí ngiwa gagaár, tlabaawós gin hhuunts nee inós kwaa meetagaás ay tsiindo, asma kuká' ki waak dirhunge.

²⁹ «Makaá adór maytsitamó, nee gareeri, nee /urfár uren nee daa'aweemooín ki waak dirhunge.

³⁰ Nee qul/uutamó nee fanfeeamo, nee /urfa, nee kia'aay nee slaslangaay.

³¹ Muruuwí sleémeero ku waak dirhunge, hee bar tu'uuín gaa kwatiít kwaa meetagaás ay tsiindo.

³² Barnaxes tuuár makayká' gaa nga i hú', tam peehhi, tam tsitaay, laqaá tam kaahari, laqaá tam guniyá, laqaá umuú gaaro ar tar gadiyuusi, xooslmoodá' kwaa meetagaás ay tsiindo, xooslmoodá' ku qaasi baraá ma'aay. Xooslmoodá' daqaní ku hhoohhoó'.

³³ Barnaxes xooslmoó tuua aa i hú' a xooslmoó tleei, muruú baraadá' kwaa meetagaás, nee xooslmoodá' ku gaasi.

³⁴ Muruú /ayma laqaá muruú wahaangw oo baraá xooslmoodá' i dirií' kwaa meetagaás.

³⁵ Umuú gaaro ar tuua aa i hú' kaa meetagaás tam didár huuriingw gár kawa hariím a fee/a, kaa meetagaás, nee ka waak dirhunge.

³⁶ Tam adoosinge hhaleeri laqaá kutloó ma'aay ku hhohhó', ala umuú gaaro ar tuua gaa kwatit, kaa meetagaás.

³⁷ Barnaxes tuua dahaasiingw ngwa i hú', dahaasingwdá' kwa meetagaasiiká.

³⁸ Ala bar dahaasingwdá' kun ala naa/aas as iwa ti'iiti, kuri i huú' nee tuua, dahaasingwdá' kwaa meetagaás dirhunge.

³⁹ «Barnaxes makiito'ór ta /aa/ayi, ina kilós gwá', hee bar tuuaarós ngaa kwatiít, kwaa meetagaás ay tsiindo.

⁴⁰ Hee bar tuua gaa /aáy, tsitaywós ngu hhuuntsi, kwaa meetagaás ay tsiindo. Nee umuúqo heewo oo tuua gaa gagaar kwaa meetagaás ay tsiindo.

⁴¹ «Umuúqo gaaro ar gurúr hi'iimita baraá yaamuwo, ma baloó /ayaara', ka waak dirhunge.

⁴² Umuúqo gaaro ar ya'a wasl, eeít, tam gár gurúr hi'iimiit ar ya'aawós, laqaá ar ya'aá yaariir nee umuúqo gár hi'iimita ar gura' ma /ayaara', asma ka waak dirhunge.

⁴³ Gawaá adoorihe muruú gur'eérár hi'iimiít munduwa meetagaás as kuwa /agé', kuungá' tiri meetagasá'.

⁴⁴ Asma aníng an AAKOÓ MUNGÚ Munguúhúng. Ti partle' as tawa múk hhohhó', asma aníng ti hhoohhoó'. Kuungá' miti meetagaasara' ar muruú gur'ér hi'iimiít oo gawaá daanduú yaamu.

⁴⁵ Asma aníng an AAKOÓ MUNGÚ, kudá' kuungá' naa duux baraá yaamaá Misrír wa ale, as niwa Munguúhúng tleehhiit. Gawaá adoorihe ti hhoohhooese', asma aníng ti hhoohhoó'.»

⁴⁶ Gaarí an hara'ayár makaay nee tsir/o, nee umuúqo gár slafa ar baraá ma'aay nee yaamaá kaahaar,

⁴⁷ as kahhó' gár qoom /aymaro nee ar ta waki kawa tsahha', ar hariim /aymaro nee ar harimaaká /aymaro kawa tsahha'.