TLAHHOÓ LAÁWI 10 - Biblía Axweesantá Hhohho' ar Mungú 2004

Tlakweemaá Nadabu nee Abihu

¹ Daaqoó Aroni, Nadabu nee Abihu, umuú heewo xooslmoowós kudá' taa tleéhh ar tleei guri ásltí qaás, guri mooyángwí doók nee guri haniís dír AAKOÓ MUNGÚ, asltadá' ka hhoohhooeeká asma ka hara'ayinká nee AAKOÓ MUNGÚ.

² AAKOÓ MUNGÚ asla gari kwaáhh amór daaqaydá', guri qororo'ós dír geeraawós i ale.

³ Mose Aroni guri báy, «Ar tleehhmuuwí taa aán AAKOÓ MUNGÚ gana slaá' ngiwa laqan tidá' iwa oó', ‹Tin laqaám dír mukdá' dir'eéní tseéw, adór tir hhoohhoó', aníng tiri xirfayees nee muu sleémeero.› » Aroni iri qartlamiít.

⁴ Mose daaqoó Usieli, Mishaeli nee Elsafani, giri ateét, kudaá baabuú niiná oo Aroni, giri báy, «Qwalaasé', hhaeehúng diirí hhoohhooe huwaak, duuxaak tsee/aá xafaay.»

⁵ Naagáy tindari hardáh, tuaá hhaeeín kiri gagaár ar inqwaruuín tsee/aá xafi, adoodá' Mose ngira oó'.

⁶ Mose Aroni nee daaqaywos, Eleasari nee Itamari giri báy, «Se'eemerhúng ma xaafara' nee tsitayhúng mu feehhamiisara' as tsuunqumis, bar adooriheeká tundu tsuu/ nee AAKOÓ MUNGÚ, xooro sleémeero gari i buuhh. Ala hhaeehúng awa xoorór Israeli ngi aleeslayá' iwa hheehhe'eemiisiya' as asltadá' AAKOÓ MUNGÚ naa huwi.

⁷ Kuungá' ma baloó ti'iitara' afkú heémár Munguhe, bar adooriheeká a qatlá', asma di/tidá' tundura iimbalaáx ar AAKOÓ MUNGÚ i gawaahúng.» Aroni nee daaqaywós adoodá' Mose aa oó' kari tleéhh.

Adór kaahamuuse ir gadiyus

⁸ AAKOÓ MUNGÚ Aroni guri báy,

⁹ «Kuúng nee daaqaywók bar dartá' baraá heémár Mungú, difaái laqaá umuúqo gár oonitimisa ló' ma wahaara', bar adooriheeká a qatlá'. Gaarí an hara'ayár hotaatiim xwaylarhúng sleémeero.

¹⁰ A gár hariim gár hhoohhoo' nee ar hhoohhooeeká kawa paratl, nee gár meetagaamiis nee ar meetagaamisaaká.

¹¹ Slám xoorór Israeli an intsaahhatisa' kaahirí sleémeero naa hara'ayiimi dír Mose ale.»

¹² Mose Aroni nee daaqaywós kudaá meet, Eleasari nee Itamari, giri báy, «Ilahhooadá' aa met ar balaangw dír tidá' ta hanmaamisa' dír AAKOÓ MUNGÚ tawa ilahhooár da/a, taatahhaak ka /agá' bihhaá kitángw ilahhooár wa ale, mu gár sluuftimisií qaasara', asma ka ló'wa hhoohhoo'.

¹³ Baraá ilahhooadár da/a taa haniisi dír AAKOÓ MUNGÚ, kuúng nee xwaylarók ka /agá' didá' hhoohhoó' wa ale, asma adoorí a gan'amu diroge nee dír xwaylaroge, adoorí an adór aníng tira hara'ayín.

¹⁴ Ala fu'unaá da/eewo nee awa yaae awa ilahhooár ta gáwtí tleesi kawa haniisi dír AAKOÓ MUNGÚ, i aleesleerá' kiwa /aga' umuúqo dír hhoohhooe, kuúng nee na/iiwók awa daaqaay nee awa dasuuwo. Muruuwí an hariímarók nee xwaylarók, kwí tinda haniís as ilahhooár wayda nee múk Israeli.

¹⁵ Da/eewo nee yaaeero, kudá' ta gáwtí tleesi as kiwa haniisi dír AAKOÓ MUNGÚ, kingin huuw dinkwa nee wahhnadá' ta ilahhooár wa da/i as kiwa gáwtí tles as kiwa hanis dír AAKOÓ MUNGÚ. Muruuwí a kók nee na/iiwók, a hariímarhúng ay alhhe'eesay wasle, ar adoodá' AAKOÓ MUNGÚ ngira hara'ayín.»

¹⁶ Naagáy Mose gurtuú ta ilahhooár tlakweema hingeesár wa haniisi guri xuuxuú', guri tsaáhh adór kura daá/, asla guri fák. Iri buúhh dír Eleasari nee Itamari, daaqoó Aroni kudá' aa qatliiká, giri yaahaás,

¹⁷ «Ahaá waáy, ilahhooár tlakweema hingeesa masa didá' hhoohhoó' wa /agi'iiká? Asma ka ló'wa hhoohhoo' Mungú ngina dirhúngí haniís as kahhó' kuungá' dakuúsár xooro kawa hingeesa', nee haraki/isa kawa tlehha' dír geeraá AAKOÓ MUNGUHE.

¹⁸ Tseereerós kinga huwiiká baraá guruú didá' hhoohhooe. As adoorí gár tunduwa hariím an /agá' baraá guruú didá' hhoohhoó' wa ale ar adoodá' aníng ngira oó'.»

¹⁹ Aroni Mose guri yaahaás, «Ga/aaweek, laarí ilahhooár tlakweema hingeesa nee ilahhooár da/to ngaa haniisiyé' dír AAKOÓ MUNGÚ, tam adoorihe án kaangwí iga sláy, xáy geera ilahhooár tlakweema hingeesa bara /ayi laarí, adoorí i ya/aánda dír geeraá AAKOÓ MUNGUHE? »

²⁰ Mose adoodá' ngiwa axaás, guri sla'atís.