TLAHHOÓ LAÁWI 1 - Biblía Axweesantá Hhohho' ar Mungú 2004

Ilahhooár da/a ar gár ádkoom

¹ AAKOÓ MUNGÚ Mose guna ateét, iri amór Mose axweés baraá heémár Mungú wa ale, guri báy,

² «Xoorór Israeli i axweeseek, ki beer, ‹Umuúqo heewo bar ilahhooarós ngi huuw baraá makaywós wa ale, ngi baraá daqtá hikwaá wa duuxi, laqaá baraá daqtá bee/aangós nee aaraawose.›

³ «Bar ilahhooarós ar da/a gan duux, a makiito'ór yaqaamba ar xaslxaanslír koomaaká baraá daqtose, as aníng ngiwa ya/aam. A gan huuw dír afkú heémár Mungú.

⁴ Dakós guri qaas gawaá ságw makiito'oodár ilahhooár da/a. Adoosinge ilahhooadá' i ya/aán haraki/isaro.

⁵ Naagáy awuudá' ku gaasi geeraá AAKOÓ MUNGÚ wa ale, nee daaqoó Aroni kudaá kaahamuusér Mungú, tseereedá' ngi tsiririxiisiye' bihhe sleémeero ar kitangwduú ilahhooa, kuduú dír geeraá heémár Mungú i dirií'.

⁶ Daqaní makiito'oodár ilahhooár da/a gari daaq, gari supaapín.

⁷ Daaqoó kaahamusmo Aroni asla ngi qaasiye' gawaá kitángw ilahhooa, nee migír ku gawaá asltadií qaasi.

⁸ Daaqoó Aroni kudaá kaahamuuse /aare'eeraá fu'unaay ngi gawaadií qaasiye', saga nee tlawaanqaro ki qaasi gawaá migíruuduú baraá asltadár gawaá kitángw ilahhooa.

⁹ Ala xooslár gura' nee ya'aá makiito'oodá' ki hamaatli ar ma'aay. Kaahamusmo ilahhooadá' sleémeero ngi ád wa da/i gawaá kitángw ilahhooa as tawa ilahhooár da/a, ilahhooarí taa daá/ ar asla slaahhareeriiwós AAKOÓ MUNGÚ nguri sla'atisiyá'.

¹⁰ «Barnaxes hee ilahhooarós ar da/a ga haniisár wa slaa' baraá daqtós ar bee/aangw laqaá ar aara, ilahhooár gwaanda, laqaá gurta oo xaslxaanslír koomaaká ngu haniisi.

¹¹ Guri gaas bihhaá /iya awa kitángw ilahhooa dír geeraá AAKOÓ MUNGÚ, daaqoó Aroni kudaá kaahamuusér Mungú tseereedá' ngi tsirirxiisiye' bihhe sleémeero ar kitángw ilahhooa.

¹² Fu'unaay giri supaapín, saga nee tlawaanqa, kaahamusmo giri qaas gawaá migíruuduú baraá asltadár gawaá kitángw ilahhooa.

¹³ Ala xooslár gura' nee ya'a' giri hamaatl ar ma'aay. Kaahamusmo sleémeero giri ád aldaa/ gawaá kitángw ilahhooa, tawa ilahhooár da/a. Ilahhooarí ta da/a/an ar asla slaahhareeriiwós AAKOÓ MUNGÚ nguri sla'atisiyá'.

¹⁴ «Barnaxes hee AAKOÓ MUNGÚ gu ilahhooár dá/átí haniisár wa slaa' ar tsir/i, masók a hhooki laqaá na/oó hhooki ngu tsawaari, as kuwa ilahhooár wa hup.

¹⁵ Kaahamusmoó Mungú tsir/oodá' gan huuw gawaá kitángw ilahhooa, gari hayaá saga tuu/, gari daa/ gawaá kitángw ilahhooa. Tseereerín gari tsiririxiis ar bihhaá kitángw ilahhoa.

¹⁶ Tlaa/anoowósw sankaro gin hingees, nee giri bihhaá da/aáw awa kitángw ilahhooárí kwaahh, amoodá' da/ara kay qamaamin.

¹⁷ Inós tsir/idá' gan hhampi'i oh, ala ga tla/a feehhisiiká. Naagáy kaahamusmo gari daa/ gawaá kitángw ilahhooa gawaá migíruuduú baraá asltá gawaá kitángw ilahhooa, tawa ilahhooár da/a. Ilahhooarí ta da/a/an ar asla slaahhareeriiwós AAKOÓ MUNGÚ nguri sla'atisiyá'.»