Tito 3 - Biblía Axweesantá Hhohho' ar Mungú 2004

Hotaá Krishaanu'uuma

¹ Muu inslawtiseek iwa ilaiwa/amér kon dír geeraá múk aleesleemuú kooma, nee dír geeraharuuseero, nee ta iialooeesi nee ti amohhe'eesiye' umuúqo gadiyér hhoe.

² Inooín muu mukuwa daandeemo axweés, ala inooín masók a múk gilimaaká nee oo hhó', nee umuúqo daqto masók a múk tsatsaa'arén dír muu sleémeerowo.

³ Aáng atén sleeme a daktana, slám a múk iawásl. A múk aa qwaar, nee atén a lawaalér ilatleeri nee qwal/uú dimbadimbé. Atén ana hootaán baraá tlakweema nee da/i, muu una buhhtimisaán, nee nguri ahhitaán.

⁴ Ala qoomár hhooeemaá Mungú Ba/amusmoorén kiwa geehhooeés, nee sla'aarirós,

⁵ inós atén tiri ba/amís. Ala gár tisa ba/amís a ooanaaká atén tlehhema'aá ganaa'á' ina tleehhaán, ala tina ba/amís as gurtleemuuwós. Mungú tina slafís ar hamtlitór laqwali'iimár /aben, tina /abeemiís ar Qeeruú hhoohhoó',

⁶ oo yaariír, kudá' naa atén i ku'uús, ar loohír Yesu Kristo, Ba/amusmoorén.

⁷ Tina gan'amií harafaár as gurtleemuuwós, nee atén tina aaluusér slafíngw alhhe'eesay wásl tleéhh, adoodár harahhifoorén i kat.

⁸ Tí naa oó' ar ló'. Nee án gár ni slaa' muruuwí masók un gawdés ooaro, as mukdá' Mungú gwa sangw haratlintii', tlehhema'aá hho' kiwa tlehhiiti ki slai. Adoorí ka hhoo' nee slám ka afhhamít dír muko.

⁹ Ala kuúng ti paratl nee muruuduú dakti'iima, kudá' tlaampa'aamisuú huwahuúw, nee faarór digir wakeetíngw tlahhi'iiwo, nee gila. Slám ti paratl nee tlaampa'amisuú daanduú hara'aya. Asma muruuwí alee/iisoó i huwi i kaahh, nee slám ku gaa wásl.

¹⁰ Heé partlitór huwahuúw bir deer, naanaaqeek har geeraawo, tam sagaáwa tsár sleeme. Ala bira sií', sieek.

¹¹ Asma kuúng a xú' heé adoosíng a heé aa hhitiruut. I tlakweemaá tlehhiit, nee slám gi xuu'.

Axweesanoó alhhe'eesaay

¹² Qoomár Artema laqaá Tukiko burngwa ya/aáw amoorók i alé, ilakaaharu tleehheek ar niwa amor'eé' hardat baraá gixsár Nikapoli. Asma aníng gár ni slaa' an hotángw áw didií alé qoomár tsaaqwaro.

¹³ Sena, kudá' hara'aya gaa soomuus, nee Apolo alee/iiseek ar ilakaaharu baraá aaii'ine, matawa gaa /aarúy.

¹⁴ Nee mukrén sleeme gár kuwa hariím masók a tlehhema'aá hho' tleehhtuuwo kin intsaahh didaádá' kiwa hariím, as matawa tawó hoót baraá slafingw'ine.

¹⁵ Muu sleémeero oo nee aníng dinkwa kuungá' nu intsihhiimiis. Mulqeerén tidá' atén ti slaa' ar baraá haratlintaao intsihhiiseek. Tsuuqa masók i dinkwa nee kuungá' sleémeero.