TI'INAANGW 9 - Biblía Axweesantá Hhohho' ar Mungú 2004

Slahhtá kooán ar qatlór muruú ta de'en

¹ AAKOÓ MUNGÚ Mose guri báy, «Tláw amór Farao, ku beer, AAKOÓ MUNGÚ, Munguú Ebrania, i kaahi, ‹Muk'eé' geemaweek i tlay as aníng iwa sluufmisuú aya'.

² Barnaxés geemawto aga sí' tari kumít ila/aango,

³ dákw AAKOÓ MUNGÚ makayhúng kudaá ta deaeendá' gi slaahh ar tiqtír pu/i, faras nee daqwaaye, nee angamía, nee hikwa, nee muruú quqmade.

⁴ Ala AAKOÓ MUNGÚ makaá múk Israeli gin paraatl dír makaá múk Misriro, nee makiito'ór múk Israeli ar gwaa' tam ar wák i káhh.› »

⁵ AAKOÓ MUNGÚ qooma gari qaás, iwa kaahi, «Matlo anuú AAKOÓ MUNGÚ adoorí an tleéhh baraá yaamaá Misriro.»

⁶ Looaytleérós AAKOÓ MUNGÚ adoodá' gari tleéhh, makaydaá múk Misri ta de'en niri qatliyé', ala awa múk Israeli gár gaa eer i káhh.

⁷ Farao muu guri ya/aáw as makaá múk Israeli kiwa artá ay, naxés tam makiito'ór wák ar aa gwa' i káhh. Ala Farao muunaáwós guri gawdeés, múk Israeli gwa geemayká.

Slahhtá lahhoó' ar umi'i

⁸ AAKOÓ MUNGÚ Mose nee Aroni giri báy, «Umuú heewo dirhunge da/arár asltá gufteeriwo tsa/aywós ngu dalaa/i, daqaní Mose ngi gáwtí kwahhi dír geeraá Farao wa ale.

⁹ Da/araadá' iri teerír natsatsaa' tleehhít, yaamaá Misri giri aleetsát, tiqtír umi'i gari húp dír muu nee makaá ta de'en baraá yaamaá Misri sleémeero.»

¹⁰ Naagáy inooín da/ara ngiri taatahhiyé' baraá asltá gufteerí wa ale, niri sihhitiyé' dír geeraá Farao, Mose da/araadá' gari gáwtí kwaáhh geeraá Farao wa ale. Tiqtír umi'i gari húp dír muu nee makaywo.

¹¹ Qwaslaare sihhtanór dír geeraá Mose gari harslaaqát, as kiwa uhín nee umi'i adór mukduú hatlá' oo Misri.

¹² Ala AAKOÓ MUNGÚ muunuú Farao guri gawdeés, as inós inooín ngiwa iiárií qaasiiká, adoodá' AAKOÓ MUNGÚ ngira oó'.

Slahhtá faanqw ar tluwoó tlaa/e

¹³ AAKOÓ MUNGÚ Mose guri báy, «Matlaatlér boo/e tseewa ti'iít amór Farao, ku beer, AAKOÓ MUNGÚ, Munguú múk Ebrania, i kaahi, ‹Muk'eé' geemaweek iwa tlay as aníng iwa sluufmisuú aya'.

¹⁴ Asma qoomaarihe kuúng muxtar'eé' sleémeero u sleér, nee geeraharuuse nee mukók sleémeero, as kahhó' kawa tsahh adór oo nee aníng slaqmís ir kaáhh baraá yaamu sleémeero.

¹⁵ Asma ay hamí geeraawo dakw'eé' una qaroó tleés, kuúng nee mukoge nuri hhaamiís ar pu/i baraá yaamuwo.

¹⁶ Ala aníng nuna slafíngwí máw as /uuruueé' nguwa laqaam, nee umuueé' kuwa alki/iiti baraá yaamu sleémeerowo.

¹⁷ Tam hamí baré kuúng ti xirfayeemís daanduú muk'eé' wa ale, i gimeeraaká niwa tlaya'.

¹⁸ Ga/aaweek, matlo qoomár adór tihe tluwoó hhamhhám oo tlaa/e ngu huúw, oo aa baloó tluwiiká baraá yaamaá Misriro iimír aange.

¹⁹ Gawaá adoorihe ya/abiím muruuwók kuduú de'eengw kunguwa daafi, nee umuúqo gaarók ar baraá xátstí diriia. Asma umuúqo heewo laqaá makiito'o ar taa baraá xátstí áy nee tluwaywuú tlaa/e gari i tluúw, aqo in gwá'.› »

²⁰ Geeraharuuseedá' axweesantá Mungú ga ilaiwawa/aa/, lawaaler'ín ngiri harakeesiyé' nee makay'ín kudá' ta de'ena as kiwa daafi.

²¹ Ala geeraharuuseedá' axweesantá Mungú ga hhaslitaaká lawaaler'ín nee makay'ín kudaá de'eengo ngiri mayé' baraá xatsa.

²² AAKOÓ MUNGÚ Mose guri báy, «Dakók gáwtí tleeseek as tluwoó tlaa/e niwa hardihi baraá yaamu sleémeero awa Misri, gawaá daanduú muu nee makaywo, nee gawaá balaangw sleémeero oo baraá qamaá yaamaá Misri.»

²³ Naagáy Mose dakós guri gáwtí tleés, AAKOÓ MUNGÚ tluwoó tlaa/e nee kwarara/aaro nee mankaroro ngiri huúw baraá yaamaá Misri sleémeero.

²⁴ Tluwoó tlaa/e iri tluúw nee mankaro tin alkoomaakoná'. Tluwoó ló'wa úr oo adór kwí inaqo baloó tluwiiká baraá yaamaá Misriro iimír xooro iwa iimu/uún.

²⁵ Tluwayduú tlaa/e umuú gaaro ar tsee/áy diriia gana giqáy, muu nee makaywo nee balaangw nee umuúqo xa'anoowo.

²⁶ Yaamaá Gosheni kilooín, kudá' múk Israeli i hooti, tluwoó tlaa/e gaa i tluwiiká.

²⁷ Aluuwo Farao Mose nee Aroni giri ateét, giri báy, «Aníng waiikae aga dakuús, AAKOÓ MUNGÚ in gan'amuú kón, aníng nee muk'eé' tlakweema iga tleehhaán.

²⁸ AAKOÓ MUNGÚ firiimare', kwarara/aarí nee tluwaywuú tlaa/eewo oo AAKOÓ MUNGÚ a ido daxta. Aníng nu geemáw, ma baraakaá wa male hootara'.»

²⁹ Mose Farao guri báy, «Aníng bara sa ti'iít baraá gixsarihe, dabaaeé' in gáwtí tleés amór AAKOÓ MUNGÚ, kwarara/aarí nee tluwaywuú tlaa/eewo niri faakiyá', kuúng kari tsáhh adór yaamu tar awa AAKOÓ MUNGÚ.

³⁰ Ala aníng a xuú' adór kuúng nee geeraharuuseeroge tam ay hamí AAKOÓ MUNGÚ kur ilaiwawa/a'aaká.»

³¹ (Kitaáni nee angaánoó shayiíriro tluwaydá' gaa ló'wa hhitín, asma qoomaadae angaánoó shayiíri aa hamaár nee kitaáni i baraá /ayór i dirí'.

³² Ala angaáno nee daa'awtá hatlae naa hhitiruti'iiká asma ki ninakw.)

³³ Naagáy Mose iri dír Farao wa tláy, iri tsee/aá gixsárí ti'iít, dabaawós giri amór AAKOÓ MUNGÚ i tleés. Tluwayduú tlaa/e nee kwarara/arose niri faakiyé', tluwaay iri sangw malé tluwiiká baraá yaamuwo.

³⁴ Ala qoomár Farao ngiwa ár tluwayduú tlaa/e nee kwarara/aaro naa faakiyé', inós nee geeraharuuseero tari ak kumiít tlakweema tlehhtuuwo, muner'ín ngiri ak gawdeesiyé'.

³⁵ Naagáy Farao muunaáwós guri ak gawdeés, múk Israeli geemawto iri sií', adoodá' AAKOÓ MUNGÚ ngira oó' dír Mose.