TI'INAANGW 8 - Biblía Axweesantá Hhohho' ar Mungú 2004

Slahhtá tsár ar aamaxupa

¹ Aluuwo AAKOÓ MUNGÚ Mose guri báy, «Tláw amór Farao ku beer, AAKOÓ MUNGÚ i kaahi, ‹Muk'eé' geemaweek as aníng iwa sluufmisuú aya'.

² Ala bar muk'eé' geemawto aga sí', ga/aaweek, aníng yaamuuwók sleémeero in aamaxupárí tleés.

³ Nee yaaér Nili iri háts aamaxupaaro, iri dát baraá do'ók kuduú waawuti'iima, ay baraá kutuwirók nee gawaá qatanirók, ay baraá maraá geeraharuuseerók, nee maraá mukók, nee gawaá slaqwaá mukók, baraá tla/afi gan aletsát ay baraá xooslaá huuriingw, ay baraá puurú.

⁴ Aluuwo aamaxupaasíng iri gawaawók i tsa/aán, nee gawaá slaqwaá mukók, nee gawaá slaqwaá geeraharuuseerók.› »

⁵ AAKOÓ MUNGÚ Mose guri báy, «Aroni ku beer, ‹Dakók gáwtí tleeseek, hhartók looloqooseek gawaá yau sleémeero nee mapeero nee gawaá tlahheeso, aamaxupa ni baraadá' wa ti'it yaamaá Misri ngi aleetsat.› »

⁶ Naagáy Aroni hhartós gari looloqoós gawaá ma'aay sleémeero awa yaamaá Misri, aamaxupa niri ti'ít, yaamaá Misri giri tuuntúk.

⁷ Qwaslaarér yaamuudá' adoodá' gari tléhh ar miislay'ín, aamaxupa ngiri huwiyé' sleeme baraá yaamaá Misri.

⁸ Farao Mose nee Aroni giri ateét, giri báy, «AAKOÓ MUNGÚ firiimaak as aamaxupaarí ngiwa hingeesi dir'eene nee dír muk'eene. Daqaní aníng múk Israeli u geemáw as ilahhooár muruú ta tsu/i ngiwa haniisár aya' dír AAKOÓ MUNGÚ.»

⁹ Mose Farao guri báy, «Kahhó', kuúng baalár ta sla' ooang, ar kuúng nee geeraharuuseeroge, nee mukoge, nuwa alefiriim dír Munguhe, as aamaxupaarí iwa qutl diroge, nee dír do'oge, iri mét baraá yaaér Nili kilós.»

¹⁰ Farao iri oó', «A matlo.» Mose iri oó', «A adoosíng kara ó'. Masók kuúng a xú' adór oo nee AAKOÓ MUNGÚ Munguúrén alqoomá' ir kaáhh.

¹¹ Aamaxupa in mét diroge nee dír do'oge, nee dír geeraharuuseero nee dír mukoge, iri mét baraá yaaér Nili.»

¹² Aluuwo Mose nee Aroni tari dír Farao wa tláy, Mose iri /aá/ dír AAKOÓ MUNGÚ as aamaxupaadá' naa huúw ngiwa hingeesi dír Faraowo.

¹³ Nee AAKOÓ MUNGÚ adoodá' Mose aa firín gari tleéhh, aamaxupaadá' iri qátl ar baraá maraay nee baraá matla/eerdu nee ar baraá qamu.

¹⁴ Muu aamaxupaadá' gari burumburín, gari ufe tlehhiít, yaamu niri tsutsuiyé'.

¹⁵ Ala Farao tsiní ngiwa ár, muunaáwós guri gawdeés, inooín gaa sangw iiárií qaasiiká adoodá' AAKOÓ MUNGÚ ngira oó'.

Slahhtá tám ar kwasiyaangw

¹⁶ Aluuwo AAKOÓ MUNGÚ Mose guri báy, «Aroni ku beer, ‹Hhartók gáwtí tleeseek, hhapér yaamú slahheek, daqaní hhapeesíng iri kwasiyaangw tleehhít baraá yaamaá Misri sleémeero!› »

¹⁷ Inooín adoodá' ngiri tleehhiyé', Aroni hhartós gari gáwtí tleés, teerír yaamu gari slaáhh, teeri sleémeero iri kwasiyaangw tleehhít, kwasiyaangw muu guri alnitsitsi'iít nee makaywo.

¹⁸ Qwaslaarér yaamuudá' ar miislay'ine kwasiyaangw nguri iiariyé' nguwa tleesiya', ala adoodá' ngiri harslaaqatiyé'. Kwasiyaangw slaqwaá muu nee makaywo gaa aleetsaát.

¹⁹ Nee qwaslaare Farao guri beér, «Gaarí ar dákw Mungú.» Ala Farao muunaáwós guri gawdeés, inooín gaa iiárií qaasiiká, adoodá' AAKOÓ MUNGÚ ngira oó'.

Slahhtá tsiyáhh ar ba'ár

²⁰ Aluuwo AAKOÓ MUNGÚ Mose guri báy, «Matlo matlaatlér boo/e tseewa tláw ta hardát dír Farao qoomár inós bir baraá yaaér káy, nee ku beer, AAKOÓ MUNGÚ i kaahi, ‹Muk'eé' geemaweek, i tlay án iwa sluufmisuú aya'!

²¹ Asma bar muk'eé' u geemeeraaká, aníng ba'aruú yaariír ngu amoorógií tleés nee amór geeraharuuseerók, nee amór mukoge nee baraá marayhúng. Maraá múk Misri sleémeero ba'ár gi dalaa/, nee baraá yaamu sleémeero awa i hootiya'.

²² Ala baalaadae aníng yaamaá Gosheni i paraátl, kudá' muk'eé' i hooti, as ba'ár ngiwa kayká. Kuungá' kari tsahhá' adór anuú AAKOÓ MUNGÚ nir baraá yaamuuká'.

²³ Aníng muk'eé' u paraátl dír mukoge. Layaarí i geehhoouur a matlo.› »

²⁴ AAKOÓ MUNGÚ adoodá' gari tleéhh, daqtá yaariir ar ba'ár gari tleés, iri dát baraá doó Farao nee baraá maraá geeraharuuse, yaamaá Misri sleémeero niri hhiturutiyé' as ba'áruudá'.

²⁵ Naagáy Farao Mose nee Aroni giri ateét, giri báy, «Tlawsé', Mungú ilahhooárí hanisaak baraá yaamuuká' kilá' wa ale.»

²⁶ Ala Mose iri oó', «Adoosíng i qoondaaká, asma ilahhooadár muruú ta tsu/i atén ni haniisár awaan dír AAKOÓ MUNGÚ, Munguúrén, ka waak dír múk Misriro. Barnaxes ilahhooarír muruú ta tsu/i tidá' i wakiya' aga dír geeraá múk Misrír wa hanisaán, atén ti tlaquutiíaáke ar tlaa/e?

²⁷ Gár hariím aqo atén an aa'aá kawaán deelo tame baraá xaanxaay, as ilahhooár muruú ta tsu/i ngiwa haniisár awaan dír AAKOÓ MUNGÚ, Munguúrén ar adoodá' atén taa báy.»

²⁸ Naagáy Farao iri oó', «Aníng kuungá' nu geemáw as ilahhooár muruú ta tsu/i kawa haniisár eera' dír AAKOÓ MUNGÚ, Munguúhúng baraá xaanxáy ale, ala ma ak saweesara'. Aníng aleefiriimaré'!»

²⁹ Aluuwo Mose guri báy, «Aníng hamí bar aga diirí wa tláw, Mungú u firiím as ba'áruuwí matlo nguwa hingeesi diroge, nee dír geeraharuuseero, nee dír mukoge. Ala Faráo, kuúng miti malé al/ayaar tari sí' muu iwa tlay, as ilahhooár muruú ta tsu/i ngiwa haniisár aya' dír AAKOÓ MUNGÚ.»

³⁰ Naagáy Mose iri dír Farao wa tláy, AAKOÓ MUNGÚ guri firín.

³¹ AAKOÓ MUNGÚ adoodá' Mose aa firín gari tleéhh, ba'ár guri hingeés dír Faraowo nee dír geeraharuuseero nee dír mukose, tam ba'aarmoó aa meet i kaahh.

³² Ala Farao muunaáwós guri malé gawdeés, mukdá' gwa geemayká iwa tlay.