TI'INAANGW 7 - Biblía Axweesantá Hhohho' ar Mungú 2004

¹ AAKOÓ MUNGÚ Mose guri báy, «Ga/aaweek, aníng kuúng u adór Mungú tleéhh dír Faraowo, nee hhiyaawók Aroni an adór aarusmoowók.

² Umuúqo gár ugwa bawi kuúng kari ó', nee hhiyaawók Aroni gari oo' dír Farao, as múk Israeli nguwa geemay tawa ti'iiti baraá yaamuuwose.

³ Ala aníng muunuú Farao un gawdeés, tam tlehhma'aá waa/oo/amo nee layaá yaariir i tleehha baraá yaamaá Misriro.

⁴ Farao kuúng u iiárií qaasiiká, ala aníng dakw'eé' u gáwtí tleés, yaamaá Misri ngiri slaáhh ar xarasleema, muk'eé' oo Israeli ar adoodá' daqooráy'ín i dirii'i nguri duúx baraá yaamaá Misrír wa alé ar tlehhma'aá uren awa sakwasleema.

⁵ Qoomár án dakw'eé' bura tleés gawaá múk Misri, nee muk'eé' oo Israeli nguri baraá tla/angw'ín wa duúx, múk Misri gari tsaahh adór aníng tar AAKOÓ MUNGÚ.»

⁶ Mose nee Aroni adoodá' AAKOÓ MUNGÚ ngaa báy kari tleéhh.

⁷ Qoomár Mose tawa axweés nee Farao kureeriiwós a mibeeri dakaát, nee awa Aroni a mibeeri dakaát nee tám.

Hhartá Aroni

⁸ AAKOÓ MUNGÚ Mose nee Aroni giri báy,

⁹ «Qoomár Farao burna báy, ‹Waa/oo/amo tleehhaak,› daqaní kuúng Aroni ku beer, ‹Hhartók taatahheek, dír geeraá Farao ti kwahh, daqaní i dayshamo tleehhít.› »

¹⁰ Naagáy Mose nee Aroni tari amór Farao káy, adoodá' AAKOÓ MUNGÚ ngaa báy ngiri tleehhiyé'. Aroni hhartós tidá' gari kwaáhh dír geeraá Farao nee geeraharuuse, hhartidá' iri dayshamo tleehhít.

¹¹ Farao múk sageloén guri ateét, nee da/aluuse nee qwaslaareero, inooín adoodár kilá' ngina tleehhiyé' ar miislay'ín.

¹² Umuúqo heewo oo qwaslaarmo didae hhartós gari yaamií kwaáhh, hhadoodá' niri dayshe tleehhitiyé'. Ala hhartidár Aroni hhadoodá' giri gu/uún sleémeero.

¹³ Tam adoorihe muunuú Farao iri ak gawdúy, inooín giri iiárií qaasiiká, ar adoodá' AAKOÓ MUNGÚ ngira oó'.

SLAHHA MIBAANGW AR MÚK MISRRI AA SLÁY Slahhtá geera ar tseere

¹⁴ AAKOÓ MUNGÚ Mose guri báy, «Muunuú Farao ku ló'wa boó/, inós aa ló'wa sií' muu nguwa geemay.

¹⁵ Matlaatleero tláw amór Farao qoomár inós bir baraá yaaér káy, kuúng sihhiít dír afá yaae nee inós tiwa doga', nee hhartadá' a dayshamo tleehhit masók a koón dakoge.

¹⁶ Inós ku beer, AAKOÓ MUNGÚ, Munguú múk Ebrania, aníng iga amoorók i ya/aáw i kaahi, ‹Muk'eé' geemaaweek, inooín aníng i sluufmisuú aye' baraá xaanxaay. Ala ga/aaweek, kuúng tam ay hamí aga iialooeská.›

¹⁷ AAKOÓ MUNGÚ i kaahi, ‹Ar tlehhmuuwihe kuúng aníng i tsáhh adór tar AAKOÓ MUNGÚ, ga/aaweek aníng ar hhartí dakw'eene ni kooma ma'aykaá yaaér Nili i slaáhh, niri tseere tleehhitiyá'.

¹⁸ Siyó baraá yaae iri qaatl, nee yaae iri díx, múk Misri ma'aá yaaeerí wahaango ngiri si'iyá'.› »

¹⁹ AAKOÓ MUNGÚ Mose guri báy, «Aroni ku beer, ‹Hhartók taatahheek, gáwtí tleeseek gawaá ma'aá yaamaá Misri, gawaá ya'aá Misri nee mapeero, nee tlahheeso, nee tlahheesooín sleémeero awa taa tlehhiiti, sleémeero niri tseerdu tleehhitiyá' baraá yaamaá Misri sleémeero, tam kudaá baraá xooslaá xaai nee awa tlaa/eewo.› »

²⁰ Mose nee Aroni adoodá' AAKOÓ MUNGÚ aa oó' kari tleéhh. Hhartós gari gáwtí tleés, ma'aá yaaeedá' giri slaáhh dír geeraá Farao nee geeraharuuseerós wa ale, ma'aydaá baraá yaae niri tseere tleehhitiyé'.

²¹ Siyó baraá yaaeedá' iri qaátl, yaaeedá' iri díx. Múk Misri ma'aydá' giri harslaaqaát wahaango, nee tseereedá' yaamaá Misri giri aleetsát.

²² Ala qwaslaarér yaamaá Misri adoodár kilá' gana tléhh ar miislay'ín. Naagáy muunuú Farao iri gawdúy, tam inooín gaa iiárií qaasiiká, adoodá' AAKOÓ MUNGÚ ngira oó'.

²³ Farao iri warqáy iri waátl amór do'ós, tam tí sleeme gaa gaárí xuiiká.

²⁴ Múk Misri sleémeero afaá yaaér Nili kiri qorqorín as ma'aá wahaangw kiwa slay, asma ma'aá yaaér Nili waha ngiwa ya/ana'aaká.

²⁵ Deelo faanqw iri waaráhh alaá AAKOÓ MUNGÚ yaaér Nili ngiwa slaáhh.