TI'INAANGW 6 - Biblía Axweesantá Hhohho' ar Mungú 2004

¹ AAKOÓ MUNGÚ Mose guri báy, «Daxta kuúng adór aníng Farao ngu /imiis a aán. Asma ar dákw /uuruú kooma inós ku harakees muu nguwa geemay. Ar dákw /uuruú kooma inós gay guus baraá yaamuuwose.»

Mungú Mose nguwa ateét

² Naagáy Mungú Mose guri báy, «Aníng a AAKOÓ MUNGÚ.

³ Nee aníng tina gehhooatís dír Abrahamu nee Isaka nee Yakobo, tawa adór Munguú Aleesleemuú koóm, ala umuueé' kwí tiwa babay AAKOÓ MUNGÚ ugwa dir'iní xu'utisiiká.

⁴ Slám alqador'eé' dir'ine aga gawdeés ar yaamaá Kana'ani ngiwa dir'ínií haniis, kudá' aáng naa hootiyé' tawa adór dahaaye.

⁵ Dinkwa nee tisinge aníng /aa/aá xoorór Israeli iga axaás, kudá' taa /uurutís baraá lawaali'iima nee múk Misri, nee aníng alqador'eé' aga insláw.

⁶ Gawaá adoorihe múk Israeli ku beer, ‹Aníng a AAKOÓ MUNGÚ, aníng kuungá' nu gweér baraá gadiyeédá' tunduwa /uurutimiisi, nee nuri ba/amis baraá lawaali'iimar'ine, nuri tuú/ ar dákw taa gan'aás nee ar muxtár ur.

⁷ Nee aníng kuungá' nun muk'eé' tleéhh, aníng tari AAKOÓ MUNGÚ, Munguúhúng, kudá' kuungá' nu gweér baraá gadiyeédá' tunduwa /uurutimiisi nee múk Misri.

⁸ Aníng kuungá' nu huúw ay baraá yaamuudá' aníng naa lo'ór wa /aáy, ngiwa haniis dír Abrahamu nee Isaka nee Yakobo, aníng ngi haniís tawa aalirhúng, aníng a AAKOÓ MUNGÚ.› »

⁹ Mose múk Israeli guri ádbáy, ala inooín Mose ngwa iiárií qaasi'iiká as niwa munesi'iyé' as lawaali'iimár gawit.

¹⁰ AAKOÓ MUNGÚ Mose guri báy,

¹¹ «Tláw amór Farao, waawutmoó múk Misri ku beer, ‹Múk Israeli geemaweek iwa ti'iitiya' baraá yaamuuwoge!› »

¹² Ala Mose AAKOÓ MUNGÚ guri báy, «Qaytsiít, muk Israeli aníng iga iiárií qaasiiká. Daxta alók an Faraówo oo aníng i iiárií qaás, anuúdá' axweesani qomeemesuwo ga xuaaká?»

¹³ AAKOÓ MUNGÚ nee Mose nee Aroni tari axweés, giri ádbáy múk Israeli kuwa i daqay nee waawutmo Farao oo Misriro, as múk Israeli nguwa duuxi baraá yaamaá Misriro.

Tlahhoó Mose nee Aroni

¹⁴ Mukwí an múk urén oo maraá baabi'i: Daaqoó Reubeni garmoó baris oo Israeli a kwí: Hanoki nee Palu, nee Hesroni, nee Karmi, kuká' an xwaylár Reubeni.

¹⁵ Nee daaqoó Simeon a kwí: Yemueli nee Yamini, nee Ohadi, nee Yakini, nee Sohari, nee Saulo garmoó /ameenír Kana'ani. Kuká' an xwaylár Simeon.

¹⁶ Daxta umeerí ar daaqoó Laáwi nee xwaylar'ín: Gershoni nee Kohati, nee Merari. Laáwi kureeri ngaa hoót a tsiiruú wák nee mibeeri tám nee faanqw.

¹⁷ Daaqoó Gershoni a kwí: Libni nee Shimei, nee xwaylar'ine.

¹⁸ Daaqoó Kohati a kwí: Amramu nee Ishari, nee Hebroni, nee Usieli. Kohati kureeri ngaa hoót a tsiiru nee mibeerí tám nee tám.

¹⁹ Daaqoó Merari a kwí: Mahli nee Mushi. Kuká' an xwaylár Laáwi.

²⁰ Amramuwí hho'ór baabuúín Yokebedi gari duúx, nee inós Aroni nee Mose giri laqwál. Kureeraá Amramu aa hoót a tsiru nee mibeeraá tám nee faanqw.

²¹ Daaqoó Ishari a kwí: Kora nee Nefegi, nee Sikri.

²² Daaqoó Usieli an Mishaeli nee Elisafani, nee Sitri.

²³ Aroni Elisheba gari duúx, dasír Aminadabu, hho'ór Nashoni. Inós Nadabu guri xwayluúr, nee Abihu, nee Eleasari, nee Itamari.

²⁴ Daaqoó Kora a kwí: Asiri nee Elkana, nee Abiasafu. Kuká' an xwaylár Kora.

²⁵ Eleasari garmoó Aroni dasír wák ar Putieli gana duúx, nee inós Finehasi guri xwayluúr. Kuká' an múk urén oo gur'ér mari baraá tlahhoó Laáwiwo.

²⁶ Aroni nee Mose an múk AAKOÓ MUNGÚ aa báy, «Múk Israeli duuxare' baraá yaamaá Misriro ar adoodá' daqooráy'ín i dirii'i.»

²⁷ Aroni nee Mose an kudaá kilá' nee waawutmo Farao oo Misri taa axwees, as múk Israeli nguwa baraá yaamaá Misrír wa duuxiya'.

Mungú Mose nee Aroni ngiwa hara'ayín

²⁸ Baalaadá' AAKOÓ MUNGÚ nee Mose tawa baraá yaamaá Misrír wa axweés,

²⁹ AAKOÓ MUNGÚ Mose guri báy, «Aníng a AAKOÓ MUNGÚ, axweesanaydá' sleémeero ugwa báw ooeek dír Farao.»

³⁰ Ala Mose iri dír geeraá AAKOÓ MUNGÚ wa axweés, i kaahi, «Aníng bar heé axweesani qoomeemesuwo ga xuaaká, adór Farao aníng ir iiárií qaasi?»