TI'INAANGW 5 - Biblía Axweesantá Hhohho' ar Mungú 2004

Mose nee Aroni ta dír geeraá Farao

¹ Aluudae Mose nee Aroni tari amór waawutmo Farao káy, kuri báy, «AAKOÓ MUNGÚ, Munguú Israeli, i kaahi, ‹Muk'eé' geemaweek, deelór ur ngi baraá xaanxáy wa tleehhiye' as aníng.› »

² Ala waawutmo Farao iri oó', «AAKOÓ MUNGÚ a heemá tam inós nguwa iiárií qaas, nee múk Israeli nguwa geemaw? Aníng AAKOÓ MUNGÚ u xuaaká, nee sleeme múk Israeli u geemawaaká.»

³ Inooín nguri bayé', «Munguú Israeli tina dirén i geehhooeés. Atén ti geemeer tawa aa'aá kawaan baraá xaanxaay deelo tame, as ilahhooár murú ta tsu/i ngiwa haniisár awaan dír AAKOÓ MUNGÚ Munguúrén. Bar adooriheeká inós atén tin tsuu/ ar tiqtír pu/i, laqaá ar slaqwara.»

⁴ Ala waawutmoó Misri Mose nee Aroni giri báy, «Aá Mose nee Aroni, ahaá waáy, gár muu kus baraá gadiyér'ín wa hingeemisa'? Kuungá' baraá gadiyerhúng tidá' gawit nay ki/aak!»

⁵ Waawutmo farao iri kumiít axweesanto giri báy, «Ga/aawaak, daxta inooín ki ur ta múk yaamuukae, ala kuungá' an sla'á' gadiyeé kawa may.»

⁶ Baalaadár kilae Farao hara'aya gari oó' dír mukduú sagesihhtuusér muu, nee dír ga/aawuuseero, giri báy,

⁷ «Gitsoodá' ta matofaálírár tlehhaahhiti ma muksíng i hanisara', adoodá' qoomár geeraawo kara tlehhé', inooín ngi kilooín leelehhtuú aye'.

⁸ Ala faarór matofaáli miwa /aaruúr ló' dír tidár geeraawo, asma inooín a tli/uuse, an gár is /aa/amina' tawa kaahi, ‹Atén ti geemeer as ilahhooár muruú ta tsu/i ngiwa haniisár awaan dír AAKOÓ MUNGÚ.›

⁹ Muksíng gadiyér gawit ar gi slahh'ees ti sleere', tam pa/ángw axweesanoó lama nguwa iiárií qamina' munguwa slayé'.»

¹⁰ Mukduú sagesihhtuuse nee Ga/aawuusér muko tari tláy amór múk Israeli, kiri báy, «Waawutmo Farao ina oó', ‹Aníng kuungá' nu gitsoórí haniisaaká.

¹¹ Tlawsé' gitso kuungaá kilá' leelehhtuú awaak dír kawa qo sleeri'i, nee slám gadiyérhúng ka /aareesiiká tam adór niiná.› »

¹² Aluuwo mukdá' sleémeero yaamaá Misri sleémeero giri altsiyayaaxaát as xwaansloó baraá qamu kuwa huwi kitángw gitsór wa alé.

¹³ Mukduú sagesihhtuuse múk Israeli kuri báy, «Gadiyérhúng tleehhaak, deelo sleémeero ar adoodá' umuú deelooro kara qoomeés ar adór qoomaadá' tunduwa gitsór i hanmaamisi.»

¹⁴ Ga/aawuuseedár múk Israeli tidá' taa qaás nee sagesihhtuusér Farao kari muúx nee sagesihhtuuseedá', nee kiri yaahamiís tawa kaahi, «Gár qoomayduú matofaáli oo /isá' nee laarí kusa hatsisi'iiká a milá, adór /iisí ta tlehhaahhita'?»

¹⁵ Mukduú Ga/aawuusér múk Israeli tari tláy amór waawutmo Farao, kuri báy, «Atén awa lawaaleerók mista adoorí tléhh?

¹⁶ Lawaaleerók ka malé gitsoórí hanmisiiká slám bartaqae ti babay matofaáli tleehhaak, ga/aaweek adór lawaaleerók kara muúx, ala dakuús ar mukók.»

¹⁷ Ala inós inooín giri báy, «Kuungá' a tli/uuse, tli/uusér kilá', an gár tas kata', ‹Atén ti geemeer as ilahhooár muruú ta tsu/i ngiwa haniisár awaan dír AAKOÓ MUNGÚ.›

¹⁸ Daxta tlawsé' gadiyeé tleehhaak, gitso kingi haniisiiká, ala faarór matofaáli i /aaruraaká, aqo adoodár kilá'.»

¹⁹ Ga/aawuusedár múk Israeli ngiri tsaahhiyé' adór tar baraá slahh'amií dirii'i qoomár kiwa báy, «Faarór matofaáli ar umuú baala a /aaresa'aaká.»

²⁰ Inooín niwa dír Farao wa tlayé', tina doogiyé' nee Mose nee Aroni, kudá' inooín daamaramá'.

²¹ Ga/aawuuseedá' Mose nee Aroni giri beér, «AAKOÓ MUNGÚ kuungá' nu i qayti, nee qaa/aywí ngu tsati, asma atén kuungá' taa tli/isé' dír geeraá Farao nee geeraharuuseero, kuungá' kiri pa/ángwií hanisé' as atén tiwa tsu/iya'.»

Mose i wa/aa/ dír Mungú

²² Mose iri kií/ amór AAKOÓ MUNGÚ iri oó', «Aá AAKOÓ MUNGÚ, ahaá waáy mukwí musa kaangwí tlákwií tléhh? Gár aníng isa ya/áp?

²³ Iimír wa'aá geeraawo niwa hardáh dír Farao, niwa axwees ar umuuwók, inós mukwí guna adoorí tlaákwií tleéhh, nee kuúng tam adór niina ar taa tléhh i káhh ar mukók kuwa tu/.»