TI'INAANGW 40 - Biblía Axweesantá Hhohho' ar Mungú 2004

Kikiiár heémár Mungú nee kawa paraátl

¹ AAKOÓ MUNGÚ Mose guri báy,

² «Slahhángw geera bál bar wak heémár Mungú ka kikí'.

³ Kuúng daqaní sandakmooduú alqado ku baraadií dahás, nee inqwaarír kur geehhaantes ka tareeré'.

⁴ Nee meésa ka dahás nee xoslu ki amohhe'és gawaawósií ale. Nee kitángw tsaa'aso ku dahás sleeme, daqaní tsaa'aso ka gawaawós i qás.

⁵ Kuúng kitangwduú sahaábu oo mooyángw tsuú' kuwa da/a/an ku qás geeraá sandakmooduú alqado, daqaní inqwaari ka tareeré' afkú heémár Mungú.

⁶ Kuúng sleeme kitángw ilahhooa kawa da/aa/an ku qás geeraá didá' hhoohhoo' ar heémár Mungú.

⁷ Nee iimpeedár hamtlo ka qás tla/ángw heémár Mungú nee kitángw ilahhooa kay da/a/an, ma'aywo dala/eek.

⁸ Daqaní koo/ír afeena ka sihhtís bihhe sleémeero nee afkú dahma ku inqwaarír i tareeré'.

⁹ «Aluuwo heémár Mungú nee umuúqo gár baraawósí diriia nee xosluuwós sleémeero ka parátl, ar kawa iimbalax ar di/tá iimbalaxaangw, umuúqo gaaro iri hhoohhoouúr.

¹⁰ Kuúng kitangwduú ilahhooár da/a/aangw nee xoslu sleémeero ki parátl nee ki iimbaláx ar di/i, daqaní i kángw kilá' wa hhohhooúy.

¹¹ Iimpeedár hamtlo nee kitaangose ki parátl nee ki iimbaláx di/to.

¹² «Aluuwo Aroni nee daaqaywose ngi húp ay dír afkú heémár Mungú, daqaní inooín ki ma'ár hamátl.

¹³ Daqaní Aroni ku tsiitís tlabaadá' hhohhoe nee ku iimbaláx di/to as kuwa paratl, as kahhó' tawa kaahamusmoó Mungú.

¹⁴ Daaqaywós ngu húp sleeme ki tsiitís hiyi'i.

¹⁵ Ki iimbaláx di/to adór baabuúín ar ale, as kahhó' inooín tawa kaahamuusér Mungú. Iimbalaaxar'ín tisíng gin dahás baraá gadiyér kaahamuusi'iima ay qari sleémeero.»

¹⁶ Mose adoodá' sleémeero AAKOÓ MUNGÚ aa hara'ayín gari tleéhh.

¹⁷ Slahhángw geera tawa wak oo kurkú tsár alaá inooín tindiwa yaamaá Misrír wa ti'iít, heémadár Mungú kari kikií'.

¹⁸ Mose yukuma'aá uheemi ki sihhin giri qaás, peehhoó ngir gáwtí oohi guri qaás, guri muqslár tseék, uheemi giri sihhtís,

¹⁹ heéma gari gáwtá wa hhaáf, inqwaaridá' tsiiriihh gari tuuntukumár wa qaás ar adoodá' AAKOÓ MUNGÚ Mose ngura ádbáy.

²⁰ Tlaa/eedá' parereehhayen awa tsár awa hara'ayár koomá' giri qaás baraá sandakmo, xaaidá' sandakmo kur loohisi giri qaás baraá dungáydá', kitangwduú gurtleemu guri gawaá daanduú sandakmoó i qaás.

²¹ Sandakmoodá' guri dahaás baraá guruú heéma, inqwaari gari tarereé', nee inqwaaridá' sandakmoodá' guri gehhaantés ar adoodá' AAKOÓ MUNGÚ Mose ngura ádbáy.

²² Meésa gari dahaás baraá guruú heémaadá', gari qaás bihhaá /iikú wa ale daanduú tsee/a oo inqwaaridá' taa sandakmór gehhanteés.

²³ Gawaá daanduú meésaadae mikaáteédá' taa Mungú i haniís gari qoomeés, ar adoodá' AAKOÓ MUNGÚ Mose ngura ádbáy.

²⁴ Inós kitángw tsaa'aso guri dahaás baraá guruú heéma bihhaá basa, ti afiqoná' nee meésaadá'.

²⁵ Tsaa'aso gari qaás gawaá kitaangw dír geeraá AAKOÓ MUNGÚ ar adoodá' AAKOÓ MUNGÚ Mose ngura ádbáy.

²⁶ Inós kitangwduú sahaábu oo ilahhooár mooyángw tsuú', guri dahaás guruú heéma, guri qaás daanduú tsee/a oo inqwaaridá' sandakmo gwa geehhaantes.

²⁷ Nee ilahhooár mooyángw tsuú' guri gawaadá' i daá/ ar adoodá' AAKOÓ MUNGÚ Mose ngura ádbáy.

²⁸ Inós afkú heémaadár Mungú guri inqwaarírí tarereé'.

²⁹ Kitángw ilahhooár da/a/aangw gari qaás dír afkú heémadár Mungú, ilahhooár da/a gari gawaadá' wa haniís nee ilahhooár balaango, ar adoodá' AAKOÓ MUNGÚ Mose ngura ádbáy.

³⁰ Iimpér hamtlo gari qaás tla/ángw heémaadár Mungú nee kitángw ilahhooa, ma'aá hamtlo giri baraadií qaás.

³¹ Mose nee Aroni nee daaqoó Aroniwo dabaaín nee ya'aaine ngin baraadií hamtliitiyá'.

³² Qoomár inooín birna dahiyé' baraá heémár Mungú, nee qoomár kitángw ilahhooa burku i tseewúy, aqo nin hamtliná' ar adoodá' AAKOÓ MUNGÚ Mose ngura ádbáy.

³³ Aluuwo Mose koo/idá' afeenír heéma gaa harwet nee kitángw ilahhooaro giri qaás, nee afkú dahmaá baraá afeeni guri inqwaarírí tarereé'. Gawaá adoorihe Mose gadiyeé sleémeero gari hhe'eés.

Huunki i gawaá daanduú heémár Mungú

³⁴ Aluuwo huunki heémadár Mungú gari tuuntúk, nee xirfuú AAKOÓ MUNGÚ heémadá' gari dalaá/.

³⁵ Mose dahmaá baraá heémár Mungú gari harslaaqaát, asma huunkidá' i gawaá daanduú heémaadá' nee xirfuú AAKOÓ MUNGÚ heéma gaa dalaá/.

³⁶ Qoomár huunkidá' barka ar tláy gawaá daanduú heémaro, múk Israeli in kumiit aaii'ine.

³⁷ Ala barnaxes huunkidá' kaa hingeesiiká inooín i kumitiaaká aiiwo, aqo kan dán ay bál kay hingeesi.

³⁸ Asma huunkirír AAKOÓ MUNGÚ qoomár tlaatla/ango in gawaá heémadá' i dirí', nee ala xweeraawo asla in baraawós wa gwa/át, múk Israeli sleémeero huunkidá' kana ga/aa/áy baraá aaii'ín sleémeero.