TI'INAANGW 4 - Biblía Axweesantá Hhohho' ar Mungú 2004

Mungú Mose gwaa aleesleemuú i haniís oo muruú waa/oo/amo nguwa tlehhiiti

¹ Mose guri mu/aywaáts, iri oó', «Ala qaytsiít, inooín aníng i haratlinti'iaaká, laqaá afor'eé' ngi iiárií qaasiaaká, asma tan ooi, ‹AAKOÓ MUNGÚ taa dirógí geehooeesiiká.› »

² AAKOÓ MUNGÚ guri báy, «Gaasíng ta koon a milá baraá dakoge?» Mose iri oó' «A hhara.»

³ AAKOÓ MUNGÚ Mose guri báy, «Yaamií kwahheek.» Gari yaamií kwaáhh, iri dayshamo tleehhít, Mose iri goów.

⁴ Aluuwo AAKOÓ MUNGÚ Mose guri bay, «Dakók gan'aaseek, hhaysho ooheek.» Mose dakós guri gan'aás, guri óh, dayshamoodá' iri malé hhara tleehhiít baraá dakose.

⁵ AAKOÓ MUNGÚ Mose guri báy, «Daqaní inooín i haratlintii'iyá' adór AAKOÓ MUNGÚ, Munguú baabi'ii'ín tira dirógí laqán, Munguú Abrahamu, Munguú Isaka nee Munguú Yakobo.»

⁶ AAKOÓ MUNGÚ Mose guri malé báy, «Dakók qaaseek gawaá da/ewaawók.» Mose dakós guri qaás gawaá da/ewaawós, dakós nguwa hingeés, naxés dakós i tiqtír tsatimituú kón, ku /awaák adór tlaa/aá tluwaay.

⁷ Guri malé báy, «Dakók malé qaaseek gawaá da/ewaawók.» Dakós guri qaás gawaá da/ewaawós. Nee nguwa malé hingeés, naxés dakós aa hhooáy adoodár aáng slaqwtós i diri'i.

⁸ AAKOÓ MUNGÚ Mose guri báy, «Barnaxes inooín taa haratlinti'iiká layarír geeraawo, doóqa tu haratlintii' layarír tsare.

⁹ Ala barnaxés inooín naa haratlinti'ii'iiká layuuká' tsare, laqaá kuúng ugwa iiárií qaasi'iiká, daqaní ma'aá yaaér Nili ki iihhék, ki ku'ús baraá yaamaá kaahaar. Nee ma'aydá' taa iihhek baraá yaaér Nilír wa alé, i tseere tleehhitiyá' baraá yaamuudá' kaahare.»

¹⁰ Mose AAKOÓ MUNGÚ guri bay, «AAKOÓ MUNGÚ, iimír aange aníng axweesani a aleeslawaaká, tam alaá anuú sagadiyusmoowók nee kuúng tawa axweesaán, asma aníng ti inslahheeká axwesanto, tsifrangw'eé' ku iiloó'.»

¹¹ AAKOÓ MUNGÚ iri oó', «Heé afkú hee gwaa axweesántí tleehh aa heemá? Laqaá heé afaawasli nee iawaslero, nee heé xuumiís nee oo taampaaro gaa tleehh a heemá? A anuú AAKOÓ MUNGUHEEKÁHE?

¹² Daxta tláw, aníng kuúng u alee/iís gár ta oa, nee aníng gár kuúng ta o' ngi oó'.»

¹³ Ala Mose iri oó', «Aá Aakooeé', án kuúng u firiím, heé hatlá' ya/aaweek.»

¹⁴ Aluuwo AAKOÓ MUNGÚ Mose guri i buúhh, guri báy, «Ahaá Aroni hhiyaawók kuduú tlahhoó Laáwi i káhhi? Inós axweesani ga asláy. Qaytsiít, inós hám u al'áy. Qoomár inós kuúng bura ár, muunaáwós iri qwalaa/.

¹⁵ Kuúng tari axwés nee inós, nee /aymi'iiká' kiri qás baraá afkós. Aníng a dinkwa nee afkók, nee afkose, aníng kuungá' nu intsaahhatís ar ta tlehha'a.

¹⁶ Aroni múk Israeli gun daanduuwók wa i axwees, inós an adór afkók, nee kuúng an adór Mungú dirose.

¹⁷ Kuúng hhartí dakoge ooheek, nee ar hhartihe layuuká' kiri tléhh.»

Ki/imaá Mose baraá Misri

¹⁸ Mose iri kií/ amór Yetro taatoó hareerós, guri báy, «Na'ás aníng geemawáng niwa amór hhaee'eé' kaw baraá Misri, ngiwa artá aw, áx i slafiía ay laarí.» Yetro Mose guri báy, «Tláw ar wayda.»

¹⁹ AAKOÓ MUNGÚ Mose guri baraá Midianír wa báy, «Tláw, kií/ baraá yaamaá Misri, asma mukdá' sleémeero kuúng u gaasár wa slaá' aa qaátl.»

²⁰ Naagáy Mose hareerós nee daaqaywose giri tsa/aás gawaá daqwaay, iri kií/ baraá Misri. Mose baraá dakose i hhartadár Mungú kón.

²¹ AAKOÓ MUNGÚ Mose guri báy, «Qoomár bar aga kí/ baraá yaamaá Misri, qaytsiít tlehhmi'iidaá sleémeero awa waa/oo/amo, kudá' aníng kuúng uwa aleesleemúy haniís, tleehheek dír Farao wa ale. Ala aníng muunaáwós u gawdeés, nee inós kuungá' nu geemayká.

²² Kuúng Farao ku beer: AAKOÓ MUNGÚ i kaahi, ‹Israeli a garmaaeé' oo baris.

²³ Aníng kuúng un báw, garmaaeé' geemaweek as án iwa sluufmisuú ay. Barnaxes kuúng aga sí' kuwa geemeer, qaytsiít, aníng garmaawók oo baris u gaás.› »

²⁴ Qoomár tawa loohír i dirii'i dír qata, AAKOÓ MUNGÚ nee inós tiri doogiyé', guri gaasár wa slaá'.

²⁵ Sipora tlaa/anoó tsingaarmo guri taatáhh, garmaawós guri al/utl, tumbidá' gari ya'aá Mosér kwatiít guri beér, «Kuúng an hhawaatuueé' oo naa tuú/ ar tseere.»

²⁶ Naagáy AAKOÓ MUNGÚ Mose guri máy. Asma Sipora ina ó', «Kuúng an hhawaatuueé' oo naa tuú/ ar tseerér al/utlo.»

²⁷ AAKOÓ MUNGÚ Aroni guri báy, «Tláw baraá xaanxaay nee Mose ti doge'.» Aroni iri tláy, tiri doogiyé' baraá tloomár Mungú, guri ma'aás.

²⁸ Mose axweesanydá' sleémeero AAKOÓ MUNGÚ nguwa ya/aáw guri oó' dír Aroni, nee layuudá' sleémeero kuwa ádbáy i tleehhi.

²⁹ Aluuwo Mose nee Aroni tari tláy, bariisér Israeli sleémeero kari burumbuúr.

³⁰ Aroni axweesanaydá' sleémeero AAKOÓ MUNGÚ aa oó' dír Mose, guri dir'ín i káh, nee layuudá' sleemeéro giri tleéhh dír geeraá múk Israeli wa alé.

³¹ Muu iri haratlintií'. Qoomár kawa axaás adór AAKOÓ MUNGÚ múk Israeli ngura iiárií qaás, nee adór slahh'amuuín ngura ár, sager'ín kari xupu'uús kuri sluufiís.