TI'INAANGW 39 - Biblía Axweesantá Hhohho' ar Mungú 2004

Tlehhmuú tlabaá kaahamuusér Mungú

¹ Neewór se'éngw bee/aangw ar sirbo/ nee ar sirdaa/aten nee ar da/atene gana tlabaá slaqamís ar tleéhh awa ta dahamiisi qoomár barta didá' hhoohhoó' wa gadiyuus. Inooín Aroni nguri tlabaá hhohhó' i hiriitiyé' ar adoodá' AAKOÓ MUNGÚ Mose ngura ádbáy.

² Aluuwo naifeéra gari tleéhh ar sahaábu nee ar neewór se'éngw bee/aangw ar sirbo/, nee ar sirdaa/aten nee ar da/aten, nee ar neewór kitaánír hhohho' ar taa hhutla hhe'eés.

³ Sahaábu guna kwahhuút guri neewo tleéhh kuri tlaáq as kuwa alhiriiti nee neewór se'éngw bee/aangw ar sirbo/ nee ar sirdaa/aten nee ar da/aten nee ar kitaánír hhohho' ar taa hhutla hhe'eés.

⁴ Naifeéra kana tlina'aá tsár i tleéhh awa kar gawaá sum'i tsigiiti.

⁵ Himú afeetlo kuna tleéhh nee heé gu baál, himuuwí kuna gawaá naifeéra i tleéhh kuwa tsegiiti baraá afeetlo. Himuuwí gár kura tleéhh a sahaábu nee neewór se'éngw bee/aangw ar sirbo/ nee ar sirdaa/aten nee ar da/aten nee ar kitaánír hhohho' ar taa hhuútl, ar taa tleéhh ar adoodá' AAKOÓ MUNGÚ Mose ngura ádbáy.

⁶ Aluuwo tlaa/aá ta bay sardoniíki kiri amohhe'eés, kiri qaás baraá qoloqoloó sahaábu, qoloqoláydá' adór kura tleéhh a adór laya as umér tlahh'aá mibaá nee tsár awa xoorór Israeli kawa gooin.

⁷ Inós qoloqoláydá' guri qaás gawaá tlina'aá naifeéra as tawa adór xoorór Israeli kar inslaslay, ar adoodá' AAKOÓ MUNGÚ Mose ngura ádbáy.

Tlakoó da/eewo

⁸ Tlakoó da/eewo kuri tleéhh nee heé gu baál tleehhamooro, ar adór naifeéra kara tleéhh. Gár ngura tleéhh a sahaábu nee neewór se'éngw bee/aangw ar sirbo/, nee ar sirdaa/aten, nee ar da/aten, nee kitaánír hhohho' ar taa hhuútl.

⁹ Tlenaangós nee uroó bihheero i alqoná'. Tlakwaywí kuri waageeqáy, tlenaangós nee uroó bihheero aqo sentimiíta mibeeri tsár nee tsár.

¹⁰ Tlakwaywí kuri qaalín ar hha'aá tsiyáhh awa tlaa/aá tlaxo uren. Hháw geera gár kura uhís a tlaa/aá ta bay akiíki nee awa topaási nee awa miislír daa/aat.

¹¹ Hháw tsár kuna qaalín ar tlaa/aá ta bay sumariídi nee awa yakuútír sirboo/ nee awa miisli.

¹² Hháw tám kuna qaalín ar tlaa/aá ta bay yasínto nee awa akiíkír daa/aat nee awa ta bay ametiísto.

¹³ Hháw tsiyáhh kuna qaalín ar tlaa/aá ta bay sambarajaádi nee awa shohaámu nee awa yáspi. Tlaa/eeká' sleémeero kina qamín baraá qoloqoloó sahaábu.

¹⁴ Gawaá adoorihe tlaa/aá mibaá nee tsár kiri tleéhh awa taa umér tlahh'aá xoorór Israeli i gooin. Tlaa/eedá' adór kira tleéhh a adór laya kar tlehhahhiti. Umuúqo tlaa/anowo umuú tlahhaay kuna gawaadií gooín, tlaa/ano iwa sihhmiiti daanduú tlahhaydá' wa aleeró.

¹⁵ Aluuwo inooín himtawe ngina hhutliyé' ar sahaábuú hhohhó' as tlakwayduú da/eewo.

¹⁶ Qoloqoloó tsár oo sahaábuú hhohhó' nguri tleehhiyé' nee duungoó tsár oo sahaábuú hhohhó'. Dungáywí kuri hiriít gawaá pasleemaá tsár awa tlakwaydá'.

¹⁷ Himtaweedá' tsaraawo ar taa tleéhh ar sahaábu kari tseék gawaá dungáyduú tlakoó da/eewo.

¹⁸ Afér hatlá' ar himtaweedá' kari tseék gawaá qoloqoláydá' tsár, kari dinkwárí óh nee tsaafáydá' tsár oo geera oo naifeéra.

¹⁹ Duungoó tsár kuri tleéhh ar sahaábu, kuri hiriít gawaá tsaafoó baraay guruú tlakwáy wa ale bihhaá naifeéra.

²⁰ Duungoó hatlá' tsár kuri tleéhh ar sahaábu, kuri qaás gawaá pasleemoodaá baraay awa geera awa naifeéra, didá' naifeéra nee himuú afeetlo ti doogiyé', himuudá' taa tleéhh nee heé gu baál tleehhamooro.

²¹ Tlakwaydá' kuri tseék ar dungáydá' gawaá daanduú naifeéra, kuri tseék ar him'ér sirbo/, as kahhó' tlakwayduú da/eewo miwa slakwekwe'eét, ala masók iri gawaá daanduú naifeérárí kitaa hhe'ees. Adoodá' AAKOÓ MUNGÚ Mose ngura ádbáy.

Tlabaá hatlá' awa kahamuusi'iima

²² Aluuwo hiyaay guri tleéhh ar neewór se'éngw bee/aangw ar sirbo/, oo ta dahaasi guruú naifeérár wa ale.

²³ Hiyaywí kuri ístí tleéhh, nee istadá' kari hhamaángwár harweér as iwa feehhitká.

²⁴ Afaayér hiyaay kana qaalín ar slaqsa'aá mamaá komamaánga awa taa tleéhh ar neewór se'éngw bee/aangw ar taa hhuútl ar sirbo/ nee ar sirdaa/aten nee ar da/aten nee ar kitaánír hhohho' ar taa hhuútl.

²⁵ Mitingiri ngiri tleehhiyé' ar sahaábuú hhohhó', kari qaás tla/ángw mamaá komamaángadá', afaayér hiyaay gana harwét.

²⁶ Gawaá adoorihe mitingiri alaá mamaá komamaánga tina wa qaás, tiri hhay neesliyé' afaayér hiyayduú gadiyeé kari adoorír harweér, ar adoodá' AAKOÓ MUNGÚ Mose ngura ádbáy.

²⁷ Aluuwo hiyoó ququmaár kuri tleéhh ar kitaánír hhohho' as Aroni nee daaqaywós.

²⁸ Warqamoó ta ságwí tsegiiti kuri tleéhh ar kitaánír hhohho', nee kofyár kitaánír hhohho', nee suruwánoó kitaánír hhohhoe ar taa hhutliít.

²⁹ Him'ér afeetlo kari tleéhh ar kitaánír hhohho' ar taa hhutliít nee neewór se'éngw bee/aangw ar sirbo/ nee ar sirdaa/aten nee ar da/aten, kari qaalín ar adór hhoohhoo', ar adoodá' AAKOÓ MUNGÚ Mose ngura ádbáy.

³⁰ Inooín slamángw hhoohhoó' kuri tleéhh, kuri parootuús ar sahaábuú hhohhó', nee /aymi'i kiri gawaadá' i gooín adór kuqaá laya awa kaahá', «Gaarí kaa paraátl as AAKOÓ MUNGÚ.»

³¹ Slamangwdá' kuri tseék geera gawaá warqamoodá' ta ságwí tsegiiti ar himuú kaloó sirboó/, ar adoodá' AAKOÓ MUNGÚ Mose ngura ádbáy.

Gadiyeé iwa hhooeér

³² Gawaá adoorihe gadiyeé sleémeero ar heémár Mungú iri hhooeér, xoorór Israeli adoodá' sleémeero AAKOÓ MUNGÚ Mose ngwa báy kari tleéhh.

³³ Aluuwo inooín heémadár Mungú kingiri huúw amór Mose nee xosluuwós sleémeero, nee dungáywose, nee nahhtose, nee muqslár afkú do' tsegit nee uheemiwose, nee yukumi'iiwose.

³⁴ Tuuntukumaadá' taa tleéhh ar kadaá gwaandaawe nee kaduudá' natsaatsa'á', nee inqwaarír didá' hhoohhoo' gaa qasís,

³⁵ nee sandakmoó alqado, nee xaa'aá kur loohisi, nee kitangwduú gurtleemuwo,

³⁶ nee meésa, nee xosluuwós sleémeero, nee mikaáteedár Munguhe,

³⁷ nee kitángw tsaa'aso, nee tsaa'asorose, nee xosluuwós sleémeero dinkwa nee di/oó tsaa'asooro,

³⁸ nee kitángw sahaábu, oo ilahhooa nee di/tá iimbalaxaango, nee mooyángw tsuua, nee inqwaarír afkú heémár Mungú,

³⁹ nee kitángw muqslír sirdaa/aat, nee muqslaadá' tsiiriihh ar sirdaa/aten, nee xaaiiwós kudaá loohiso, nee xosluuwós sleémeero, nee iimpér hamtlo, nee kitaangose,

⁴⁰ nee inqwaruudá' tsiiriíhh taa tsegiít, kudá' taa afeenír ar tleehhi, nee uheemiiwós kudae, nee yukumi'iiwose, nee inqwaarír afkú afeenadá', nee tlin'iiwose, nee kika'aarose, nee xoslu sleémeero awa gadiyér koomá' baraá heémadár Munguhe,

⁴¹ nee tlabaadá' sleémeero taa tleéhh ar parooti as gadiyér didá' hhoohhoo', nee tlabaá hhohho' awa kaahamusmo Aroni, nee tlabaá daaqaywós as tawa kaahamuusér Mungú.

⁴² Gadiyeérí sleémeero kana tleéhh nee xoorór Israeli ar adoodár kilá' AAKOÓ MUNGÚ Mose ngura ádbáy.

⁴³ Mose gadiyeedaá inooín naa tleehhiyé' gina xuuxuú' ngina tleehhiyé' ar adoodá' AAKOÓ MUNGÚ ngira oó'. Naagáy Mose inooín giri tsuúq.