TI'INAANGW 38 - Biblía Axweesantá Hhohho' ar Mungú 2004

Tlehhmuú kitángw ilahhooár da/a/aangw

¹ Aluuwo kitángw ilahhooár da/a/aangw guri tleéhh ar masqaryaán, tlenaangós badu sleémeero i alqoná', tlenaangós a miíta tsár nee gár niina, tlenángw bihheero a miíta tsár nee gár niina, tlenángw gawa a miíta wak nee gár niina.

² Guri xareemií tleéhh baduwós tsiyahhawo, xareemiidá' a gár wák nee kitangwdá'. Inós giri ninkiriíts ar muqslár sirda/atén.

³ Xoslu sleémeero awa kitangwdá' giri tleéhh: Hutla'aá da/ara nee kureemi nee iimpu, nee muqslár sihhnaá koom, nee xooslaá asla loohisho. Xosluuwós sleémeero gina tleéhh ar muqslír sirdaa/aat.

⁴ Muqslír tsiiriihh gari tleéhh ar muqslír srdaa/aat as kitangwdá', gari qaás baraá bihheerós wa alé ay tla/ángw kitaangw.

⁵ Baraá baduwós tsiyahhawo duungoó tsiyáhh guri tleéhh as nguwa qaasi gawaá muqslidá' tsiiriihh as kitangwdá' loohiso.

⁶ Xaa'aá kitangwdá' kur loohisi giri tleéhh ar masqaryaán giri ninkiriíts ar muqslír sirdaa/aat.

⁷ Xaaidá' giri dahaás baraá dungáyduú bihhér kitangwdií dirií' as loohiso. Kitangwdá' guna tleéhh ar peehháy nee i guruú kón.

Tlehhmuú iimpér muqslár sirdaa/aten

⁸ Aluuwo iimpér hamtlo gari tleéhh ar muqslír sirdaa/aat nee kitaangós guri tleéhh ar muqslidá'. Iimpedá' gana tleéhh ar muqslír qwiirii/ ar aa sláy dír /ameenadá' gadiyumamiis dír afkú heémadár Mungú wa ale.

Tlehhmuú afeenír heémár Mungú

⁹ Aluuwo afeeni gari tleéhh. Inqwaarír tsiiriihh ar taa tleéhh ar neewór kitaánír hhohho' ar taa hhuútl, gari qaás ar bihhaá basa. Tlenaangós a miíta mibeeri tsiyáhh nee tsiyáhh.

¹⁰ Uheemaá ki tsegiiti a mibeeri tsár, nee yukumaá mibeeri tsár oo ki iwitisi kina tleéhh ar muqslír sirdaa/aat, ala muqslár afe mogól ar uheemiidá' nee tlin'iwo gár kira tleéhh a muqslír peésa.

¹¹ Bihhaá /iiko tlenángw inqwaaridá' tsiiriihh a miíta mibeeri tsiyáhh nee tsiyáhh. Uheemiiwós a mibeeri tsár, nee yukumoó ki iwitisi oo mibeeri tsár kuna tleéhh ar muqslír sirdaa/aat, muqslár afe mogól ar uheemidá' nee tlini'iiwo gár kira tleéhh a muqslír peésa.

¹² Bihhaá /uwaawo inqwaaridá' tsiiriihh gari qaás, tlenaangós a miíta mibeeri tsár nee tsár. Uheemiiwós a mibaangw, nee yukumoó mibaangw, ala muqslár afe mogól ar uheemidá' nee tlin'iwo gár kira tleéhh a muqslír peésa.

¹³ Bihhaá da/aáw amoodá' afkú heéma i dirii'i tlenángw bihhe a miíta mibeeri tsár nee tsár.

¹⁴ Inqwaaridá' tsiiriihh ar taa qaás bartá wák ar afkú heéma uroó bihheero a miíta lahhoó' nee tlaqi, nee uheemiiwós a tám, nee yukumoó ki iwitisi a tám sleeme.

¹⁵ Bartá tsár ar afkú heéma a adoorí sleeme, inqwaaridá' tsiiriihh uroó bihheero a miíta lahhoó' nee tlaqi, nee uheemi a tám, nee yukmi'i aqo tám sleeme.

¹⁶ Inqwaruuwí sleémeero taa afeenír ar harweér gár kura tleéhh a neewór taa hhuútl ar kitaánír hhohho'.

¹⁷ Yukmi'i sleémeero awa ta uheemií iwitimiisi gár kira tleéhh a muqslár sirdaa/aten, ala muqslár afe mogól ar uheemidá' nee tlin'iwo gár kira tleéhh a muqslár peésa, nee uheemi sleémeero awa afeeni nga harweeriye' gár kira nigihhitimís a paa/alár taa muqslár peésaárár tleéhh.

¹⁸ Iqwaarír afkuduú afeeni kari qaalín ar neewór se'éngw bee/aangw ar sirbo/ nee ar sirdaa/aten nee ar da/atene nee kitaánír hhohho' ar taa hhuútl. Tlenaangós bihheero a miíta gwaleél, tlenángw gawto a miíta tsár, i alqoná' nee inqwaaridá' tsiiriihh ar afeena.

¹⁹ Uheemiwós a tsiyáhh, yukmi'i tsiyahhaawo gár kira tleéhh a muqslár sirdaa/aaten, muqslár afe mogól gár kara tleéhh a muqslár peésa nee tlin'iwose.

²⁰ Kika'a sleémeero ar heéma nee ar afeeni gaa harwedi gár kara tleéhh a muqslár sirdaa/aten.

Xooslár Heéma

²¹ Xoslu sleémeero awa heémár Mungú, tidár alqado, kara tleéhh, faarór'ín tí: Mose hara'aya gana oó' dír múk Laáwi kiwa geerahari nee Itamari garmoó Aroni kaahamusmoó Mungú.

²² Besaleli garmoó Uri nángw naangoó Huri oo tlahhoó Yuda umuúqo gaaro ar AAKOÓ MUNGÚ aa oó' dír Mose gana tleéhh.

²³ Alee/isusmoó Besaleli kudá' ta bay Oholiabu garmoó Ahisamaki oo tlahhoó Dani, inós a heé dako ga xuú' nee parootír yaariir ga xuú' tlehhtuuwo, nee heé tlabaá tlehhahhiít ar neewór hhohho' ar kitaáni ar taa hhuútl, nee neewór taa tleéhh ar se'éngw bee/aangw ar sirbo/ nee ar sirdaa/aten nee ar da/atene.

²⁴ Sahaábu sleémeero oo muu naa hanmiís as gadiyér tlehhmuú heémár Mungú a har qoomoó kílo tsiire dakaát mibeeri faanqw nee faanqw nee graámu tsiire tám, ar harqoomayduú heémár Mungú i dirii'i.

²⁵ Muqslár peésár mukdá' sleémeero taa faár aa burumbuúr a kílo kume tám nee mibaá nee faanqw, nee graámu tsiire faanqw nee mibeeri kooán ar harqoomayduú heémár Mungú i dirii'i.

²⁶ Umuúqo heé kureeraá mibeeri tsár gaa ay nee oo gaa ba/i kuna faár, hhawaate a kume tsiire lahhoó' nee tám nee tsiire kooán nee mibeeri kooán. Umuú heewo ohmeero gár aa haniís a muqslár peésa ar graámu kooán.

²⁷ Kílo kume tám ar muqslár peésa kana yukuma'aá tsiirúr tleéhh awa heémár Mungú nee inqwaariro, umuúqo yukumayhe gár kura tleéhh a kílo mibeeri.

²⁸ Kílo mibaá nee faanqw nee graámu mibeeri faanqw nee kooán ar aa met kana duungoó uheemír tleéhh, nee kari sagér uheemír ninkiriíts nee tlin'i sleeme.

²⁹ Muqslár sirdaa/aten ar tinda huúw nee muu ohmér wa ale a kílo kume tsár nee tsiiruú wák nee mibeeri tsár nee tsiyáhh.

³⁰ Besaleli muqslaarí sirdaa/aten gana yukuma'aá afkú heémár Mungú ar tleéhh nee kitángw ilahhooa, nee muqslaadá' tsiiriíhh ar kitangwdá', nee xoslu sleémeero awa kitangwduú ilahhooa.

³¹ Bahh'ale gana yukumoó ta uheemidií iwitimisi ar tleéhh, kudá' afeena ngaa harweeriye', nee ar yukuma'aá afér afeenadá', nee yukuma'aá kika'ár afeenár heéma nee bahh'ale gana kika'ár heémár Mungú ar tleéhh.