TI'INAANGW 37 - Biblía Axweesantá Hhohho' ar Mungú 2004

Tlehhmuú sandakmoó alqado

¹ Besaleli sandakmoó alqado guri tleéhh ar peehhoó masqaryaán. Tlenaangós a miíta wak nee sentimiíta mibaangw, bihheero uraywós a sentimiíta mibeeri lahhoó' nee lahhoó', baráy wa tleemu ay gawa a sentimiíta mibeeri lahhoó' nee lahhoó'.

² Sandakmo guri ninkiriíts ar sahaábuú hhohhó', gura' nee daanduwo, gangeefoó sahaábu guri tleéhh badu sleémeero.

³ Duungoó tsiyáhh guri tleéhh ar sahaábu, guri qaás baraá baduuwós tsiyahhawo, duungoó tsár bartá wák, nee oo tsár bartá hatlá'.

⁴ Xaa'aá tsár awa masqaryaán giri tleéhh as loohisór Sandakmo, giri ninkiriíts ar sahaábu.

⁵ Xaaidá' giri dahaás baraá dungáydá' bihhe tsaraawo ar Sandakmo, as loohisór Sandakmo.

⁶ Kitángw gurtleemu guri tleéhh ar sahaábuú hhohhó', tlenaangós a miíta wak nee sentimiíta mibaangw, uroó bihheero a sentimiíta mibeeri lahhoó' nee lahhoó'.

⁷ Slaqsa'aá tsár awa keruúbi giri tleéhh ar sahaábuú taa kwahhuút, as ngiwa qaasi gawaá alhhe'eesoó badu tsaraawo awa kitangwduú gurtleemu.

⁸ Keruúbír wák gana qaás alhhe'eesayqá' nee tiqá' alhhe'eesayqá' oo kitángw gurtleemuo. Keruúbi nee tuntukmaadá' kina tleéhh ar gár wák.

⁹ Slaqsi'iidaá keruúbi hhampe'eeri'ín ngaa gáwtí tleesiyé' as kitangwduú gurtleemu nguwa mahhtírií tleehhiya' ar hhaampe'eeri'ín, inooín taa gur'ér xu'usiyé', nee gitsee/er'ín i kitangwduú gurtleemuú ngu ga/eér.

Meésár mikaátér ta hanmiisi dír Mungú

¹⁰ Aluuwo meésa gari tleéhh ar peehhoó masqaryaán, tlenaangós a sentimiíta mibeeri dakaát nee dakaát, uroó bihheero a sentimiíta mibeeri tsiyáhh nee tsiyáhh, baráy wa tleemu ay gawa a sentimiíta mibeeri lahhoó' nee lahhoó'.

¹¹ Meésaarí gari sahaábuú hhohhó' ar ninkiriíts, gangeefi gari tleéhh bihhe sleémeero ar sahaábu.

¹² Peehhír uraywo sentimiíta faanqw nee tlaqi gari tleéhh, gari harweér ar meésa, gari gangeefír sahaábií tleéhh.

¹³ Duungoó tsiyáhh guri tleéhh oo sahaábu, guri qaás afiqoomár ya'aá meésa, badu tsiyahhaawo.

¹⁴ Duungáydá' guna qaás bihhaá peehhidá' taa harweér ar meésa, as kahhó' xaaiidá' meésa kar loohisi kiwa baraadií dahaasi.

¹⁵ Xaa'aá masqaryaán giri tleéhh as kiwa meésár loohisi, giri ninkiriíts ar sahaábu.

¹⁶ Xoosla gari tleéhh ar sahaábuú hhohhó' as kawa qaasi gawaá daanduú meésa, adór sahaánaay, nee slooqa'aá mooyángw tsuú' kway da/aa/an, nee búklaay nee dahhaaráy as ilahhooár tsipipi'iimis.

Tlehhmuú kitángw tsaa'aso ki qamin

¹⁷ Aluuwo kitángw tsaa'aso ki qamin guri tleéhh ar sahaábuú hhohhó'. Gwe'eedaá kitangwduú tsaa'aso nee hhartose kina tleéhh ar sahaábuú hhohhó' oo taa kwahhuut, nee slooqi'iiwose nee qoloqoláywose nee diqaywose nee /ayooro sleémeero aqo gár wák.

¹⁸ Haleemaá lahhoó' giri tleéhh gawaá hhartadá', awa tám bartá wák ngina ar oohiyé', awa hatlá' tám bartá tsár.

¹⁹ Gawaá umuúqo halmiro qoloqoloó tám oo slaqamís nee /ayór ta bay loósi guna tleéhh. Umuúqo qoloqolto gana diqtí tleéhh nee /ayoorose.

²⁰ Gawaá hhartós tidá' aa gáwtí ganai qoloqoloó tsiyáhh guna tleéhh ar slaqsoó /ayór ta bay loósi, umuú qoloqolto gana diqtós i tleéhh nee /ayoorose.

²¹ Didár haleemaá tsár niwa bihhér xuiyé', bihhaá baraay gina diqito'oórí tleéhh.

²² Diqiyaadá' nee haleemidae a gár wák nee hharto, sleémeero gina tleéhh ar sahaábuú hhohhó'.

²³ Aluuwo tsaa'asodá' faanqw gari tleéhh ar sahaábuudá' hhohhó' nee muqslaadá' kar ohina nee sahaánaywose.

²⁴ Kitaanguú tsaa'aso nee xosluuwós sleémeero gár kira tleéhh a kílo mibeeri tám nee kooán ar sahaábu hhohhó'.

Tlehhmuú kitángw ilahhooár mooyángw tsuú'

²⁵ Kitángw ilahhooár mooyángw tsuú' kuwa da/aa/an guri tleéhh ar xa'anoó masqaryaandi. Tlenaangós badu sleémeero i alqoná', tlenaangós a sentimiíta mibeeri tsiyáhh nee kooán, tlenángw bihhe a sentimiíta mibeeri tsiyáhh nee kooán, nee tlenaangós oo gawa a sentimiíta mibeeri gwaleél. Xareemi a gár wák nee kitangwduú ilahhooa kay hanmiisi.

²⁶ Daanduú meésadá' guri ninkiriíts ar sahaábu hhohhó' bihheerós sleémeero nee xareemiwose, nee gangeefír sahaábu gari tleéhh, gari harweér ar meésa.

²⁷ Duungoó tsár oo sahaábu guri tleéhh guri qaás bihhaá baraay awa gangeefír kitaangw. Dungáydá' i afi qón badu tsaraawo, as xaaidá' kur loohisi kiwa baraadá' i dahmiisi.

²⁸ Xaaidá' tsár awa kur loohisi awa masqaryaandi giri tleéhh, giri ninkiriíts ar sahaábu.

Tlehhmuú di/tá iimbalaxaangw nee mooyaangw

²⁹ Di/tá hhohho' ar iimbalaxaangw gari tleéhh, nee mooyángw tsuú' oo taa aleedoók nee gár adór mooyaangw.