TI'INAANGW 36 - Biblía Axweesantá Hhohho' ar Mungú 2004

¹ «Besaleli nee Oholiabu gadiyeé ngi tleehhiye', dinkwa nee umuúqo hhawaatuú sagalooár kooma, oo AAKOÓ MUNGÚ aa sagalooár i haniís nee fuquraango, as xu'utír gadiyér heémaadár Mungú sleémeero ngiwa aslay, nee as sagadiyuusi'iimár hhoohhoo' ar adór AAKOÓ MUNGÚ ngira hara'ayín.»

Ohmér yaariir ar muu aa huúw

² Mose, Besaleli nee Oholiabu nee umuúqo heé fuqurángw kooma, oo ta sagalooár i haniís nee AAKOÓ MUNGÚ, nee umuúqo heé baraá muunaáwose taa tliw/ina, giri ateét as gadiyeérí ngiwa tleehhiya' ar sla'aari.

³ Inooín ohmeedá' sleémeero ngiri ilaoohiyé' dír Mose wa alé, ohmeerí an tidá' tinda duúx nee múk Israeli ar sla'aari as gadiyér didá' hhoohhoo'. Aluudae muu ina kumiít ohme huwahubuwo, umuúqo looár tlawa adoorí ngina tleehhiyé' ar muunuú sla'aari.

⁴ As adoorí mukdá' sleémeero oo sagalooár koóm oo gadiyér didá' hhoohhoo' ga tleehha, gadiyeeduuín ngari geexayé', tari tláy ay amór Mose,

⁵ nguri bayé', «Muu muruú tinda huúw ku yaariír, tam qoomaydá' bu'uút didá' hhoohhoo' tleehhamooro guri harwaaráhh, kudá' AAKOÓ MUNGÚ naa atén i hara'ayín.»

⁶ Mose iri ya/abín baraá maraay sleémeero muu kuwa bay, «Umuúqo heewo ta hhawaatá laqaá ta /ameeni matawa kumiít ohme burumburingo as didaádá' hhoohhoo'.» Muu kuri ilaá/ ohme huwahubuwo.

⁷ Asma muruudá' taa burumbuúr sleémeero i bu'uút gadiyeédá' tleéhharo nee iri harwaraáhh.

Heémár Mungú kawa tleéhh

⁸ Hhawaate sleémeero kudá' taa qo sagalooár i haniís, heémadá' hhoohhoo' ngiri tleehhiyé' ar kaeemaá mibaangw awa inqwaruú taa tleéhh ar kitaánír hhohho', nee ar tlabaá taa tleéhh ar neewór sirbo/ ar se'éngw bee/aangw, nee ar sirda/aten, nee ar da/aten, slaqsa'aá keruúbi kiri gawaadí tleéhh, nee heé tleehhamooro gu baál.

⁹ Umuúqo inqwaariro tlenaangós a har miíta mibaá nee tsár, nee tlenángw bihhe a miíta tsár. Kaeemooká' sleémeero i alqoná'.

¹⁰ Inós kaeemaá kooán giri hiriít dinkwár i ale, as ngiwa wak tleehhi, nee awa hatlá' kooán giri malé adoorí laáq.

¹¹ Tlin'aá sirbó/ giri hiriít baraá alhhe'eesoó ka'amír wák ar bartá wák i dirii', tlin'aá hatlá' giri hiriít baraá alhhe'eesoó ka'amír hatlá'.

¹² Tlin'aá mibeeraá kooán giri hiriít baraá ka'amír wák, nee awa hatlá' mibeeri kooán giri hiriít baraá ka'amír tsár tlin'iiká' sleémeero i afiqoná'.

¹³ Aluuwo muqslár afe mogól ar mibeeraá kooán ar sahaábu gari tleéhh as kaeemoodá' tsaraawo ngiwa haraagasi, naagáy kaeemoodá' tsaraawo giri heémár wák tleéhh.

¹⁴ Aluuwo tuuntukmár heémaadá' gari tleéhh ar se'éngw aara, kaeemo ngaa tleéhh a mibaá nee wak.

¹⁵ Umuúqo ka'amiro tlenaangós a miíta mibaá nee tám, nee uroó bihheero a miíta tsár. Kaeemoodá' sleémeero i alqoná'.

¹⁶ Naagáy kaeemaá kooán giri dinkwaárií hiriít, nee kaeemaá lahhoó' giri dinkwaárií hiriít sleeme.

¹⁷ Aluuwo tlin'aá mibeeraá kooán giri hiriít baraá ka'amír wák, nee awa hatlá' mibeeri kooán gawaá ka'amír tsár.

¹⁸ Aluuwo muqslár afe mogól mibeeraá kooán gári tleéhh, ar muqslár sirdaa/aten as kahhó' kaeemooká' tsár kiwa haragaasi. Daqaní ka'ami tari wák ar heéma tuuntuuka.

¹⁹ Aluudae tuuntukma gari malé tleéhh ar kadaá gwaandaawe awa natsatsa'aá' awa taa da/teemiís. Tuuntukmár hatlá' gari malé tleéhh ar kadaá natsaatsaa'á' awa aara.

²⁰ Aluudae sihhteeraá masqaryaandi giri tleéhh as kiwa sihhin.

²¹ Umuúqo sihhtamoowo tlenaangós a miíta tsiyáhh, nee yaangareemaawós a sentimiíta mibeeri lahhoó' nee lahhoó'.

²² Umuúqo sihhtamoowo guna tlaqáfuú tsár i tleéhh, as kahhó' sihhteeri tiwa oohiya'. Sihhteeri sleémeero awa heémaadá' gina tlaqáfií tleéhh.

²³ Sihhteeraá mibeeraá tsár gina siíhh ar bihhaá basa.

²⁴ Yukumoó muqslár peésa guri tleéhh, yukumáy ngwaa tleéhh a mibeeri tsiyáhh, umuúqo sihhtamoowo yukumáy a tsár as tlaqáfuudá' nguwa oohi.

²⁵ Bihhaa /iya awa heémaro sihhteeri ngaa tleéhh a mibeeri tsár sleeme.

²⁶ Yukumoó muqslár peésa oo sihhteeriidá' ngwa tleéhh a mibeeri tsiyáhh, umuúqo sihhtamoowo yukumáy tsár.

²⁷ Bihhaá /uwaawo, amoodár alaá heémaro sihhteeri ngaa tleéhh a lahhoó'.

²⁸ Sihhteeraá tsár giri tleéhh as qul/ayduú alaá heéma.

²⁹ Sihhteeriiká' tsaraawo baraaywo niwa tlayé' kaa haragaasiiká, tiri doogiyá' dír tseegár geera ar heéma. Sihhteeraá tsár umuú barto kina adoorír tleéhh as qul/oó heéma.

³⁰ Sihhteeri dinkwaaro a dakaát, nee yukumáy'ín a mibaá nee lahhoó' kudá' taa tleéhh ar muqslár peésa, umuúqo sihhtamoowo a yukumáy tsár.

³¹ Waqasuú kooán oo masqaryaandi guri tleéhh as nguwa qaasi ar sagér sihhteeraá bihhaá wák.

³² Nee waqasuú kooán as sihhteeraá bartá hatlá' ar heémaadá', nee waqasuú kooán as sihhteeraá alaá heémár hará' bihhaá /uwa.

³³ Waaqaasír hatlá' gari tleéhh ar tla/ángw heéma gur oh, bartí wa tleemu ay bartaqá'.

³⁴ Sihhteeri sleémeero giri ninkiriíts ar sahaábu, waqas guri tseék ar qutúrú sahaábu gawaá sihhteerií ale. Waqas sleeme guri ninkiriíts ar sahaábu.

³⁵ Aluuwo inqwar guri tleéhh ar neewór sirbo/ nee ar sirda/aten nee ar da/atene, nee neewór taa hhuútl ar kitaánír hhohho', inqwaaridá' kari slaqsoó keruúbírí hiriít. Gadiyeérí kana tleéhh nee heé ga tlehhma baál.

³⁶ Uheemaá tsiyáhh awa masqaryaán giri tleéhh, gari sahaábúr ninkiriíts giri muqslár afe mogólií tleéhh ar sahaábu. Yukumoó tsiyáhh oo peésa guri tleéhh as uheemidá'.

³⁷ Inqwaarír ta afkú doó heémár wa qaasi gari tleéhh, gár ngira tleéhh a neewór se'éngw bee/aangw ar sirbo/, nee ar sirdaa/aten, nee ar da/aten, nee neewór taa hhuútl ar kitaánír hhohho'. Inqwaaridá' sleeme kari parootuús kángw kilá' wa alé.

³⁸ Uheemaá kooán giri tleéhh nee dungáy'ine. Sagér uheemiidá' gari ninkiriíts ar sahaábu nee dungáydá'. Ala yukumoó kooán guri tleéhh ar muqslír sirdaa/aat.