TI'INAANGW 35 - Biblía Axweesantá Hhohho' ar Mungú 2004

Dabér Sabaáto

¹ Mose dinku'uumár múk Israeli sleémeero gari dinkwár i ateét, giri báy, «Muruuwí an kudaádá' AAKOÓ MUNGÚ naa alqadín dirhúng i ale as kuungá' kuwa tlehha'.

² Deelo lahhooe gadiyérhúng tleehhaak, ala bál faanqw a deelór hhoohhoo' ar Sabaáto ar AAKOÓ MUNGÚ ar kuungá' tawa hungu/usa'. Umuúqo heewo oo gadiyeé gaa tleehh baalaarihe aqo kun gaas.

³ Asla a oohisa'aaká baraá marayhunge deelór Sabaátoro.»

Ohme as heémár Mungú

⁴ Aluuwo Mose iri axweés dír dinku'uumár múk Israeli, giri báy, «Muruuwí an kudá' AAKOÓ MUNGÚ naa hara'ayín, iwa kaahi:

⁵ Ohmér ni hanisa' dír AAKOÓ MUNGÚ ngin baraá daqaari'iimarhúng wa duxá'. Umuúqo heé muunuú sla'aari gu koóm, gár i haniisi dír AAKOÓ MUNGÚ ngi huwi. Ohmér ni hanisa' a tí: Sahaábu nee muqslár peésa, nee muqslár sirda/aten,

⁶ nee neewór taa tleéhh ar se'éngw bee/aangw ar kaloó sirboó/, nee ar sirda/aten, nee ar da/aten, nee kitaánír hhohho', nee neewór se'éngw aara,

⁷ nee kadaá gwaandaawe awa taa da/teemiís, nee kadaá aara, nee peehhoó masqaryaán,

⁸ nee di/tá tsaa'asi, nee muruudá' ta di/tá iimbalaxángwár aleedogiiti, nee mooyangwdá' tsuú' ta d/a/aa/an,

⁹ nee tlaa/aá tlaxo gawden awa ta bay sardoniki, nee tlaa/aá tlaxo gawden awa hatlá' awa ta qaasi gawaá naifeéra, nee gawaá tlakoó da/eewo.»

Xooslár heémár Mungú

¹⁰ «Umuúqo heewo dirhunge oo xu'utír muruuko tlehhit ga koóm ni hardihi, nee muruuwí sleémeero oo AAKOÓ MUNGÚ naa oó' ngu tleehhi:

¹¹ Heémár Mungú nee tuuntukumaarose, nee inqwaaridár afkú do' kur tuuntuuki, nee dungáywose, nee uheemiwose nee yukmi'iiwo.

¹² Sandakmoodá' nee xaa'aá kur loohisi, nee kitangwduú gurtleemu nee inqwaaridár tuuntuuka,

¹³ nee meésadá' nee xaaiiwós kudá' kar loohisi, nee xosluuwós sleémeero, nee mikaáteedár Munguhe,

¹⁴ nee kitángw tsaa'aso iwa gwa/at nee xosluuwose, nee tsaa'aso nee di/tá tsaa'aso,

¹⁵ nee kitángw ilahhooár mooyángw tsuú' kuwa da/a/an, nee xaaiiwós awa kur loohisi, nee di/tá iimbalaxaangw nee mooyángw tsuú', nee inqwaarír afkú heémár Mungú.

¹⁶ Nee kitángw ilahhooár da/a/aangw kawa hanmiisi, nee muqslír sirdaa/aat ar tsiiriihh, nee xaa'aá kur loohisi, nee xosluuwós sleémeero, nee iimpeedár hamtlo nee kitaangose.

¹⁷ Nee inqwarudá' tsiiriíhh taa afeenadár harweér nee uheemi'ine, nee yukumayduú uheemiwo, nee inqwaarír afkú afeena,

¹⁸ nee kika'ár heémár Mungú, nee kika'ár afeena nee him'eerose.

¹⁹ Nee tlabaadá' taa hiriít ar parooti as kiwa ar gadiyuusi didá' hhoohhoó' wa alé. Hiyoó hhoohhoó' as Aroni kudú kaahamusmoó Mungú, nee hiya'aá hhohho' as daaqoó Aroni asma gadiyér'ín ar kahamuusi'iima.»

Muu ohmer'ín ngiwa huwahuúw

²⁰ Aluuwo muu sleémeero oo xoorór Israeli tari diya/aát dír ilaá Mosewo.

²¹ Tindiri hardáh umuúqo heewo oo muunaáwós i tliwii/in, nee umuúqo heewo oo qeeruuwós taa sla'atís, inooín ohme kingiri huúw amór AAKOÓ MUNGÚ as gadiyér heémadár Mungú nee as sagadiyuusi'iimarós, nee as tlabaadá' hhohho'.

²² Hhawaate nee /ameenaaro kudá' sleémeero muner'ín taa tliwií/ niri hardihiyé', kipi'i ngiri huwiyé' nee muqslár ta bay hasama, nee mungiaá ta dugeenír qamin, nee himtaawe, nee xooslaá taa tleéhh ar sahaábu. Umuúqo heewo xooslaá taa tleéhh ar sahaábu giri haniís dír AAKOÓ MUNGÚ.

²³ Umuúqo heewo oo neewór sirbo/ ar se'éngw bee/aangw ga koóm ngina huúw, nee ar sirdaa/aten nee ar da/aten, nee kitaánír hhohho' nee se'éngw aara, nee kadaá gwaandaawe awa taa da/ateemiís, nee kudaá taa natsatsaeemiís.

²⁴ Umuúqo heé peésa ga duuxi laqaá muqsladá' sirdaa/aten aqo gana ilahhooár wa huúw dír AAKOÓ MUNGÚ. Nee umuúqo heé masqaryaandi ga qo kooma, aqo ngina huúw as gadiyérka ngiwa ot.

²⁵ Nee /ameena sleémeero ar gadiyér daba' ga aleesláw, muruuín kudá' naa tlatlawiné' nguri huwiyé', neewór sirbo/ ar se'éngw bee/aangw nee ar sirdaa/aten nee ar da/aten nee ar kitaánír hhohhoe.

²⁶ Nee /ameena sleémeero ar tlaatlawiingw gu aleeslaw, nee ar muunaáwí gu koom, se'éngw aara nguri tlaatlawiné'.

²⁷ Geeraharuuse sleeme tlaa/aá ta bay sardoniki nee awa hatlae kingina huúw as kiwa hiriiti gawaá naifeéra, nee gawaá tlakwayduú da/eewo.

²⁸ Muruudá' taa mooyángw ar tlehhahhiiti nguna huwiyé' sleeme, nee di/tá tsaa'aso nee di/tá iimbalaxaangw, nee mooyángw tsuú'.

²⁹ Múk Israeli sleémeero, hhawaate nee /ameenaaro kudá' muner'ín aa qwala/ as gaa ngiwa AAKOÓ MUNGÚ i haniisi, umuúqo heé muunaáwós taa sla'atís, muruuwós guri huúw ar muunuú /awaák as adoodá' AAKOÓ MUNGÚ Mose ngwa bay kawa tleehhi.

Qwatsiruusér heémár Mungú

³⁰ Aluuwo Mose múk Israeli guri báy, «Ga/aawaak, AAKOÓ MUNGÚ Besaleli garmoó Uri, nángw naangoó Huri oo tlahhoó Yuda gwa tsawaár.

³¹ Inós kwa hatsiís qeeruú Munguhe, as aleesleemu nee fuquraangw nee xu'uti ngiwa slay as gadiyér umuúqo adooro ngiwa aleeslay tleehhamooro.

³² As kahhó' gadiyér xuaawasl ngiwa aleeslay tleehharo ar sahaábu nguwa kwahhuuti nee peésa nee muqslár sirdaa/atene.

³³ Nee kahhó' tlaa/eedá' tlaxo gawden ngiwa aleeslay dakooro, nee xaai ngiwa aleeslay parootiro, nee gadiyér umuúqo daa'awto ngiwa tleehhi.

³⁴ Inós kwa sagalooár i haniís dinkwa nee Oholiabu garmoó Ahisamaki oo tlahhoó Dani, as múk hatlá' kuwa intsaahhatimiisi.

³⁵ Mukwí tsaraawo kwa hatsiís sagalooaro, as gadiyér umuúqo daa'awto ngiwa tleehhiya', gadiyér tlaa/e parootusa nee gadiyér fuqurángw slaa', gadiyér parootír neewór se'éngw bee/aangw ar sirbo/ nee ar sirdaa/aten nee ar da/aten, nee kitaánidá' hhohho' ar taa hhuútl, nee gadiyér tlaba' tlehhit, nee umuúqo daa'awtá gadiyeede, nee daa'awtá gadiyér xuaawaslen.»