TI'INAANGW 34 - Biblía Axweesantá Hhohho' ar Mungú 2004

Tlaa/aá parereehhayen awa ki/imaá tsár

¹ AAKOÓ MUNGÚ Mose guri báy, «Tlaa/aá parereehhayen awa tsár tleehheek awa slaqás nee kudaá geera, daqaní aníng axweesantadá' baraá tlaa/eedá' parerhhayenií dirii', kudá' kuúng taa giqeér, a baraá kwisíng i gooiím.

² Kuúng ti amohhe'es, matlaatlér boo/e ni tseewa ti'ít, ni tsa/aán gawaá tloomár Sinai, ni dir'eéní hardát gawaá tsitsantá tlooma.

³ Nee heé wák lo' miti alkoomara', miwa deerút lo' tam heé wák gawaá tlooma adáwá ale, laqaá bee/i laqaá slee makawa de'éngw ay afaá tlooma.»

⁴ Naagáy Mose tlaa/aá parereehhayen awa tsár giri tsaát, awa slaqás nee kudaá geera. Mose matlaatlér boo/e iri tseewa tláy, iri tsa/án gawaá tloomár Sinai adoodá' AAKOÓ MUNGÚ ngira oó', tlaa/aá parereehhayen awa tsár gi kón dabaawose.

⁵ AAKOÓ MUNGÚ iri aweér gawaá tlooma ar baraá huunki, iri sihhiít dinkwa nee inós, umuuwós guri alki/iít iwa kaahi, «Aníng a AAKOÓ MUNGÚ.»

⁶ AAKOÓ MUNGÚ iri waaraáhh ar dír geeraá Mose, iri malé oó', «Aníng a AAKOÓ MUNGÚ, a AAKOÓ MUNGÚ, a Munguú gurtleemuuwo haáts nee oo gurhhoó', aníng ti inslahheeká buhhtaawo, nee a haáts sla'aarír warqawaakahe nee inkihhimuwo.

⁷ Aníng sla'aarir'eé' ar warqawaaká an komkaakoóm ay nángw sagaáwa kumér kúm, aníng múk iringér koóm nee tlakweema nee dakumisuuwo un gurtlatláw. Ala heé tlakusmo u harafaaraaká tawa adór heé gana'amuú koóm, aníng li/oó tlakweemaá xwayliité un buú' dír na/ii'ín, nee na/aá nangw'ín tam ay nángw sagaáwa tám laqaá tsiyáhh.»

⁸ Mose iri gaanslár tláy sagós guri xupu'uús, Mungú guri sluufiís.

⁹ Mose iri oó', «Aá AAKOÓ MUNGÚ, bar aníng kuúng iga gurií bá/, aníng kuúng u firiím, atén nee kuúng masók tin alkoomaán, tam mukwí a múk sagegawdene tlakweemaarén gurtlaweek nee dakumisuurene, atén ti aalirók wa ot.»

Alqado kawa /abeés

¹⁰ AAKOÓ MUNGÚ iri oó', «Ga/aaweek, aníng hamí alqado a tleéhh. Muruú waa/oo/amo oo aa baloó tleehharutiiká baraá xoorduwo, laqaá tam baraá yaamu sleémeero u tleéhh dír ilaá muk'eé' sleémeero wa ale. Nee muu sleémeero, kudá' nee kuúng alhootá', gadiyér AAKOÓ MUNGÚ gari ar, asma gár waa/oo/amo ngi kuúngií tleéhh.

¹¹ Hara'ayaarí laarí ni kuúng babaw harmagahheek! Ga/aaweek aníng xoorór Amori nee ar Kana'ani, nee ar Hiti, nee ar Perisi, nee ar Hifi, nee ar Yebusi an geerahúng wa tlatlahhaás.

¹² Kuúng ti harmagahh alqado ma tleehhara' nee yaamuloouusér yaamaá ta keera', asma kuungá' aluuwo nu gee/asliyá'.

¹³ Ala kuúng kiteeri'ín kudaá munguaá hatlá' kiwa ilahhooárí hanmiisi fee/eek, nee uheemi'ín kudaá munguiidá' ta bay Ashera ki supiín.

¹⁴ «Kuungá' munguaá hatlá' i sluufmisuú eera'aaká, asma AAKOÓ MUNGÚ kudá' umuuwós ta bay, ‹Oo da/tá koóm›, inós an Munguú da/tá koóm.

¹⁵ Miti axweesani slawaara' nee yaamuloouusér yaamuudá', asma inooín munguii'ín biringa sluufmisuú ayé', nee ilahhooár muruú ta tsu/i kawa hanmiisi, aluuwo kuungá' tunduri afa /aasl tam fu'unaá muruú taa ilahhooár wa tsuú/ kiri /aymár eera'.

¹⁶ Daaqaywók mu dasuuín ar duuxuutmisaar, aluuwo dasuuín iri munguii'ín sluufmisuú áy, daaqayhúng sleeme kuri ta/eekw, iri munguii'ín sluufmisuú áy.

¹⁷ «Nee slám murslaqatuú munguaá hatlá' awa muqsla mi tleehhaar as kiwa sluufmis.

¹⁸ «Deeloodá' ur ar mikaáteedá' taa sluuftisiiká inslawaak. Mikaáteedá' ta sluuftisiiká an /agá' ay deelo faanqw ar adoodá' aníng ngira hara'ayiím, qoomaadá' taa qaroó qaás ar slahhángw ta bay Abibu, asma an qoomár kuungá' niwa baraá yaamaá Misrír wa ti'ité'.

¹⁹ «Umuúqo gár tindira barisi a te'eé', makaá yaqaambe baraá hikwaawoge nee baraá bee/aangoge, gár tindira barisi a te'eé'.

²⁰ Barisuú daqwaay un waa'alát ar deelomoó bee/i, ala barnaxés u sla'aká waa'alaharo, isa geeqaweek. Nee na/iiwók awa baris sleémeero in waa'alát. «Hee mindiwa dír geeraaeé' káy ar dákw kaahaár.

²¹ «Deelo lahhooe kuungá' an gadiyusá', ala bál faanqwe an hungu/usá', barnaxes an qoomár doosla laqaá an qoomár bu'uungw, kuungá' aqo an hungu/usá'.

²² «Kuungá' deelór bu'uungw harmagahhaak qoomár deelór bu'úngw angaáno bir iimu/uu/uún. Nee deelór ur ar bu'uungw kuwa burumburin alhhe'eesoó kurko.

²³ «Baraá kurko sagaáwa tám hhaawate sleémeero awa mukók ni hardihiye' dír geeraá AAKOÓ MUNGÚ, Munguú Israeli.

²⁴ Asma aníng xoordu in guús geeraahúng wa ale, nee digeemaá ayaahúng i bihheérí uuruúx, nee slám heé yaamuuhúng gi ilaatleeruús i kaahh qoomár kuungá' birna geeraá AAKOÓ MUNGÚ Munguúhúngí hardaté' ki/ima tám baraá kurko.

²⁵ «Tseerér gár taa ilahhooar'eé' wa gaás mingi hanisara' dinkwa nee mikaátér taa sluuftís, nee sleeme ilahhooadár gár taa gaás ar deelór Pasaáka ma meetisaara' ay matlaatle.

²⁶ «Bu'úngw hhó' oo geera oo balaangw baraá yaamuuhunge un hubá' baraá doó AAKOÓ MUNGÚ Munguúhúng. «Deelmoó leei laqaá oo bee/i mu humimara' baraá ilwaá aayorós.»

²⁷ AAKOÓ MUNGÚ Mose guri báy, «/Aymi'iiká' gooimeek, asma baraá /aymi'iikae aníng alqado aga tleéhh nee kuúng nee múk Israeli.»

²⁸ Mose iri gawaadá' wa iwiwiít dinkwa nee AAKOÓ MUNGÚ deelo mibeeri tsiyáhh tlaatla/aangw nee xweeraawo. Mose muruú /ayma gu /a/ayiiká nee ma'aay gi wahahanká, nee inós /aymi'iidá' alqado giri gooín gawaá parhheemoodá' tsár awa tlaa/e. Gár taa gooín an hara'ayadaá mibaangw awa Mungú.

Mose niwa gawaá tloomár Sinaír wa aweér

²⁹ Nee qoomár Mose niwa gawaá tloomár Sinaír wa aweér, gawaá dakose i parhheemoodá' tsár awa tlaa/aá kón, kudá' hara'ayár Mungú koomá'. Qoomár Mose niwa awdiiti gaa xuiiká adór kaahartá gitsee/awós ir qwiirí/, asma adoodá' inós nee Mungú tawa axweemamiís.

³⁰ Qoomár Aroni nee múk Israeliwo Mose nguwa ariyé', naxés kaahartá gisee/aawós i qwiirí/, nee niri da'ayutiyé' nguwa i tseewuya'.

³¹ Ala Mose inooín giri ateét, Aroni nee geeraharuusér dinku'uumadá' tari daqáy amór Mose. Mose nee inooín tari axweés.

³² Aluudae xoorór Israeli sleémeero iri tseewuúr dirós i aleero, Mose hara'ayadudá' sleémeero AAKOÓ MUNGÚ aa dirós i haniís gawaá tloomár Sinaír wa ale, giri dir'ín i haniís.

³³ Qoomár Mose axweesantá dír muko iwa hhe'eés, warqamo guri tseék gawaá gitsee/aawós.

³⁴ Ala barnaxes Mose i dír geeraá AAKOÓ MUNGÚ káy, warqamoodá' gun hingees ay dír ni ti'iiti baraá heémaro, nee qoomár birna ti'iít /aymiidá' sleémeero tinda inós báy ngin oo' dír múk Israeli.

³⁵ Múk Israeli gitsee/aá Mose birki ga/áy i ló'wa qwiirii/iyá', nee Mose warqamo gun male tseek gawaá gitsee/aawós ay qoomár bir dah as iwa axweesiya' nee AAKOÓ MUNGÚ.