TI'INAANGW 33 - Biblía Axweesantá Hhohho' ar Mungú 2004

Mungú Mose nguwa ádbáy aai kiwa iimu/un

¹ AAKOÓ MUNGÚ Mose guri báy, «Gimsé', tlawé' quutlé' diirihe, kuúng nee mukwí naa dúx baraá yaamaá Misrír wa ale, tlawsé' ay dír yaamuudá' aníng naa lo'ór wa /aáy ngiwa haniis dír Abrahamu nee Isaka nee Yakobo, niwa oó', ‹Yaamuuká' i dír xwaylarhúng i haniís.›

² Aníng malaykamooeé' ngu ya/aáw, inós geeraahúng gi haar, aníng mukdá' baraadá' wa hoót u guús. Inooín a xoorór Kana'ani, nee ar Amori, nee ar Hiti, nee ar Perisi, nee ar Hifi nee ar Yebusi.

³ Ta hardatá' baraá yaamuudaá diíhhooár ilwa nee dane. Ala aníng nee kuungá' ti alkoomanaaká, asma kuungá' a múk sagegawdén, aluuwo aníng kuungá' nu baraá loohírí hhaamiís.»

⁴ Qoomár muu kaangwí tlákw nguwa axaás tari tsuunqumiís, tam heé wák oo xooslaá parooti gaa dahaas i kaahh.

⁵ Adoorí kana tleéhh, asma AAKOÓ MUNGÚ Mose guna báy, «Xoorór Israeli ka beer, ‹Kuungá' a múk sagegawdén, aníng nee kuungá' birtin alkoomana har afi qoomár niina, aqo nun hhaamiís. Gimsé' xosluuhúng kudaá parooti qafimaak, as daqaní aníng gár ni kuungá' i tleehh a xuú'.› »

⁶ Gawaá adoorihe múk Israeli xosluuín kudaá parooti kiri qafín iimír tindiwa tláy tloomár Horebu wa ale ay aluudá'.

Heémár Mungú

⁷ Mose alhotaariro heémaadá' hhoohhoo' gana kikií' amorqá' saáw i ale dír xafaywo. Umuú heémaadá' guri báy a Heémár Mungú. Nee umuúqo heewo oo axweesantá koóm nee AAKOÓ MUNGÚ in amoodá' i hardah, didá' saaw dír xafaywo.

⁸ Umuú qoomaaro Mose bira tláy iwa amór heémaadá' kay, muu sleémeero tindin ti'iit tsee/áy ale baraá xafaywo, umuúqo heewo dír afkú heémarós gun i sihhiit. Mose kun aluúwaá ga/aa/áy ay dír i dahi baraá heémadár Mungú.

⁹ Qoomár Mose bira dáh baraá heémadár Mungú, uhmoó huunki nin aweer, iri sihhiit dír afkú heémadá', AAKOÓ MUNGÚ iri amór Mose axwees.

¹⁰ Qoomár muu sleémeero uhmooduú huunki bur kwa ár aa sihhiít dír afkú heémár Mungú, muu sleémeero in tláy, umuúqo heewo iri tumbarara'aat dír afkú heémaarós.

¹¹ Adoorí an adór AAKOÓ MUNGÚ nee Mose tar axweemaamisi ar afe, adór hee nee heewós tar axweemaamisi. Aluuwo Mose iri kii/ baraá xafaay. Ala alee/isusmoowós Yoshua garmoó Nuni a masoomo, ina meét baraá heémadár Mungú.

Al'axweesantá Mungú ar nee mukós tawa dinkwa

¹² Mose AAKOÓ MUNGÚ guri báy, «Ga/aaweek, kuúng aníng ina beér, ‹Mukwí ar tlaweek.› Ala heé nee aníng ti alkoomá' ngwa o'oká. Tam adoorihe ina beér, ‹Aníng kuúng u xuú' nee ugwa gurií baá/.›

¹³ Na'ás aníng kuúng u firiím, barnaxes iga qo tsuwa gurií bá/, lohuuwók dir'eé' laqaamang as kahhó' aníng ngiwa tsaahh adór aníng ira gurií bá/. Ka insleér sleeme adór xoororí tar tók.»

¹⁴ Mungú iri oó', «Anínguú kilá' ti koomaán nee kuúng, aníng kuungá' u amohhooár i haniís.»

¹⁵ Mose Mungú guri bay, «Kuúng bar nee atén a aldinkwaarooká diirihe mawa quutlaán.

¹⁶ Asma adór ir xu'utit adór aníng kuúng ira gurií bá/ barnaxés kuúng a dinkwa nee ateneeká? Kuúng bar dinkwa nee atén daqaní atén a múk dimbé baraá tla/ángw muu sleémeero oo daanduú yaamuwo.»

¹⁷ AAKOÓ MUNGÚ Mose guri báy, «/Aymuusíng taa ó' i qón, as aníng kuúng uwa gurií baá/, nee umuuwók nguwa xuú', adoosíng kuúng ta kat ngi tleéhh.»

¹⁸ Mose iri oó', «Na'ás, u firiím, xirfuuwók dir'eénií laqaamang.»

¹⁹ Mungú iri oó', «Aníng a dír geeraawók ar waaraáhh nee hhooeemaaeé' sleémeero ngiri dirók i laqaám, nee umuueé' nguri dirók i alki/iít niwa kah, Aníng a AAKOÓ MUNGÚ. Án hee bur gurtleemuú wa slaá', u gurtláw, nee kudá' guruueé' iwa tlatlay un gurtleemií tleéhh.»

²⁰ Ala MUNGÚ iri oó', «Kuúng gitsee/aeé' i aandaaká, asma i ya/aandaaká hee gitsee/aeé' ngiwa ari aluuwo iri hoot.»

²¹ AAKOÓ MUNGÚ iri kumiít axweesanto, iri oó', «Qaytsiít, dír bihhaeene dirka i deer, kuúng an sihhít gawaá daanduú tlaa/a.

²² Daqanirkó qoomár xirfueé' bir waaraahh, aníng kuúng u qaás baraá mar'ír tlaa/a, aníng kuúng uri luu/ ar dakw'eé' ay dír aníng ni waaraahh.

²³ Aluuwo aníng dakw'eé' nguri hingeés gawaawoge. Kuúng daanduueé' un aán, ala gitsee/aeé' i aandaaká.»