TI'INAANGW 32 - Biblía Axweesantá Hhohho' ar Mungú 2004

Slaqsoó dama oo taa tleéhh ar sahaábu

¹ Qoomár muu ngiwa ár adór Mose nira tliík gawaá tloomár wa ale, inooín tari burumbuuriít dír Aroni aleeró tari oó', «Qwaláng, munguiirén tleehhang awa atén ti geerahará', asma Mosewí atén taa duux baraá yaamaá Misrír wa ale, gár gwaa eer a xuanaaká.»

² Aroni giri báy, «Saaqaánduú sahaábu kuduú gawaá iaá tlaawayhúng nee awa daaqayhúng nee awa dasuuhúng dír'eéní huwaare'.»

³ Aluuwo muu sleémeero saaqaánduú sahaábu oo gawaá iaaín i dirií' nguri huwiyé' dír Aroni.

⁴ Aroni saaqaánduudá' oo sahaábu guri ilaaóh dir'ín wa ale, guri daá/ ar asla, guri kwahhuút, guri murslaaqatuú damaárár tleéhh. Nee inooín tari oó', «Aá Israeli, gaarí an munguiirén kudá' atén taa baraá yaamaá Misrír wa duuxiye'.»

⁵ Qoomár Aroni adoorí ngiwa ár, kitángw ilahhooa guri dír geeraadá' i tleéhh, kaangwí guri ilahaniís iri oó', «Matlo a deelór ur as AAKOÓ MUNGÚ.»

⁶ Matlaatlér boo/e tari tseewa ti'iít, ilahhooár da/a/aangw ngiri hanisiyé' nee ilahhooár wayda ar muruú ta tsu/i ngiri hanisiyé', muu iri iwiít tawa /ayin nee tawa wahan, tari sihhiít as tawa neeti.

⁷ AAKOÓ MUNGÚ, Mose guri báy, «Tláw aweér ar gaanslaay, asma mukók kudá' naa dúx baraá yaamaá Misrír wa ale, taa kilooín qwaareesiyé'.

⁸ Naa qwaariyé' ar gaanslaay, loohidá' aníng ngay hara'ayiím ngaa mayé'. Inooín taa damár taa kwahhuút i tleehhiyé', ngay sluufmisiyé', nee ilahhooár muruú ta tsu/i ngiri hanmiisiyé', tawa kaahi, ‹Aá Israeli, gaarí an munguiirén, kudá' atén taa baraá yaamaá Misrír wa duuxiye'.› »

⁹ AAKOÓ MUNGÚ Mose guri male báy, «Aníng mukwí ugwa ár, nee ga/aaweek, adór tar múk sageegawdén.

¹⁰ Hám daxa aníng mawáng, aníng mukwí u i daa/atúw buhhtaawo nguri hhaamiís. Ala aníng kuúng u xoorór ur tleéhh.»

¹¹ Ala Mose AAKOÓ MUNGÚ Munguúwós guri harhheehhe'eés, guri báy, «Aá AAKOÓ MUNGÚ, gár buhhtaawo tas daa/atuur dír mukók kwí naa baraá yaamaá Misrír wa dúx ar /uuruuwók kudá' úr nee ar dákw aleesleemuú koóm.

¹² Ahaá waáy, gár múk Misri tas ooi, ‹Aáng gár tlaakw gana qo qoomeés daanduuine, inooín gina baraá yaamuuká' wa duúx as ngiwa tsu/utár ay gawaá tlom'i nee ngiwa hhaamisi gawaá daanduú yaamuwo.› Buhhtaasingá' xaraaslá' maweek, warqáw baraá inslawaysíng tlákw ta koon daanduú mukoge.

¹³ Sagadiyuuseerók Abrahamu nee Isaka nee Yakobo inslaweegáy, kudaádá' kuúng lo'o kasa /ák ar umuuwók nee kiri beér, ‹Aníng xwaylarhúng a tlahhás adór tsatse/uú gawaá doori, nee yaamuuká' sleémeero aníng naa dirhúng i al'axweés, aníng i haniís dír xwaylarhúng i ale, inooín kiri aal ay alhhe'eesáy wasle.› »

¹⁴ AAKOÓ MUNGÚ inslawaywós kudá' tlákw guri máy, kudá' geeraawo i tleehhamór wa slai dír mukós.

¹⁵ Naagáy Mose iri harawarqáy iri gawaá tloomár wa aweér, tlaa/e parereehhayen tsaraawo, kudá' hara'ayár koomá', gi kón dabaawose kaa gooín bihhe tsaraawo.

¹⁶ Nee tlaa/eedá' parereehhayen Mungú gina tleéhh, nee gooidár gawaadá' a Mungú inósuú kilá' gana gooín.

¹⁷ Qoomár Yoshua tseeór muu ngiwa axaás, Mose guri báy, «Baraá xafaywo afór slaqwara i deer.»

¹⁸ Mose iri oó', «Afór ni axamiis ar múk baaliliimaaká, nee slám a afór múk ta balitiiká, ala afór ni axamiis a afór múk daá'.»

¹⁹ Qoomár tawa tseewúy amór xafaay, Mose damaadá' taa tleéhh gari ár, nee ni/imadae, Mose iri daa/atúy buhhtaawo, tlaa/eedá' parereehhayen kudá' hara'aya kay gooín giri yaamií kwaáhh, niri qeqtiné' didár afaá tloomárí ale.

²⁰ Damaadá' taa tleéhh gari taataáhh, gari kwaáhh baraá asla, gari xoósl, iri naasút adór teeri, gari tsaafiís baraá ma'aay. Ma'aydá' giri wahaás ar múk Israeli.

²¹ Mose Aroni guri báy, «Gár mukwí naa kuúngií tleéhh a milá, tlakweemaá ur awa adór kuká' kiri dir'ínií húp?»

²² Aroni iri oó', «Aakooeé' aníng miwa ló'wa i buúhh, kuúng mukwí u xú' adór tar múk amohhoó' tlakweema tlehhtuuwo.

²³ Asma inooín án ina bayé', ‹Munguiirén tleehhang awa atén ti geerahará', asma heewí ta bay Mose, kudá' geeraawo atén taa duux baraá yaamaá Misrír wa ale, gár gwa sleer a xuaanaaká.›

²⁴ Aníng inooín ngiri báw, ‹Umuúqo heewo oo sahaábu gu koóm ngu haniisi.› Naagáy ngway hanisiyé', aníng nguri baraá ásltí kwaáhh, damaárí niri baraadá' wa ti'ít.»

²⁵ Nee Mose ngiwa qo ár adór mukwí ira dee/anuút, asma Aroni muu gwa máy iwa dee/aanuuti adoodá' i slaiya' ngiwa tlehhiitiya', tiri kilooín mureekeesáy huwiyé' dír wakuuser'ine,

²⁶ Mose iri sihhiít afkú xafi, iri oó', «Umuúqo heewo oo bartá AAKOÓ MUNGÚ i diriia ni amor'eé' waaraahhi.» Múk tlahhoó Laáwi sleémeero iri amoorós i waaraáhh.

²⁷ Giri báy, «AAKOÓ MUNGÚ Israeli i kaahi, ‹Umuúqo heewo paángarós ngi taataahhi, umuú heewo afkú xafi ngur waaraahhi baraá xafaywihe, umuúqo heewo hhiyaawós ngu gaasi, nee mulqumoowós ngu gaasi, nee inslaawmoowós ngu gaasi.› »

²⁸ Nee mukwí oo tlahhoó Laáwi adoodá' Mose aa oó' ngiri tleehhiyé', nee múk aa qaatl baalaadae a kume tám.

²⁹ Mose iri oó', «Kuungá' laarí taa kiloohúng hanisé' as gadiyér AAKOÓ MUNGÚ kawa tlehha', asma aga babaqaasi'iiká na/iihúng kiwa tsu/a', laqaá hhaeehúng, gawaá adoorihe tsuuqaá Mungú iga sleeré'.»

³⁰ Looitleerós Mose muu guri báy, «Kuungá' tlakweemaá ur iga tlehhé', nee hám daxta a tsa/ám gawa amór AAKOÓ MUNGÚ, doóqa wayda gu ya/án daanduú tlakweemaahúng kwisingae.»

³¹ Naagáy Mose iri kií/ amór AAKOÓ MUNGÚ, iri oó', «Aga gurhaamuút! Mukwí tlakweemaá ur gaa tleéhh, taa kilooín munguú sahaábu i tleehhiyé'.

³² Na'ás, tlakweemaaín gurtlaweek, ala barnaxes i gurtleeraaká, umuueé' fiitseek baraá kitaábuudá' umér mukók ki gooiindi.»

³³ Ala AAKOÓ MUNGÚ Mose guri báy, «Umuúqo heé aníng iga tlakweemaá i tleehh, an kudá' aníng ni fiits baraá kitaábuueene.

³⁴ Ala hám daxta, tláw, muu geerahareek ay didaádá' aníng kangós naa kuúng báw. Ga/aaweek, malaykamooeé' geeraawók gi haar. Tam adoorihe bál aníng birna amorhúng káw, li/aay u buú' as tlakweemaaín.»

³⁵ AAKOÓ MUNGÚ muu guri tiqtír pú/tí kwaáhh, as adoodá' Aroni nguwa firiné' ngiwa murslaaqatuú damaárí tleehhi.