TI'INAANGW 31 - Biblía Axweesantá Hhohho' ar Mungú 2004

Qwatsiruusér heémár Mungú

¹ AAKOÓ MUNGÚ Mose guri báy,

² «Ga/aaweek aníng Besaleli ugwa ateét, inós a garmoó Uri, nángw naangoó Huri, heé tlahhoó Yuda.

³ Aníng ugwa hatsiís qeeruueene as aleesleemu nguwa slay, nee fuquraangw, nee xu'uti, nee umuúqo gadiyeede ngiwa aleeslay,

⁴ as kahhó' muruú xuaawaslén nguwa aleeslay tleehhamooro, ar sahaábu nguwa kwahhuuti nee muqslár peésa, nee muqslár sirdaa/atene.

⁵ Ugwa aleesleemií haniís oo tlaa/e ngiwa tlaaqi, nee peehháy nguwa parootuusi, nee gadiyér umuú adooro ngiwa aleeslay tleehhamooro.

⁶ Slám ga/aaweek, aníng Oholiabu garmoó Ahisamaki oo tlahhoó Dani ugwa tsawaár sleeme, as kahhó' nee Besaleli iwa algadiyuusiya'. Aníng múk hatlá' oo sageloén ugwa sagalooár i doók as gadiyeduudá' sleémeero ugwa báw iwa tleehharutiya'.

⁷ Adór heémaadár Mungú nee sandakmooduú alqado nee kitángw gurtleemu kuduú gawaá daanduuwós i dirií', nee xoosla sleémeero ar gadiyér heémaadá'.

⁸ Meésadá' nee xooslaarose, nee kitangwdá' hhoohhoó' oo tsaa'aso ki qamin nee xooslaarose, nee kitángw ilahhooár mooyángw tsuú' kuwa da/aa/an.

⁹ Nee kitángw ilahhooár da/a/aangw kuwa hanmaamisi nee xooslaarose, nee iimpe nee kitaangose.

¹⁰ Nee tlabaadá' tlehhma hhohho', nee tlabaadá' taa paraátl as gadiyér kahamuusi'iima awa Aroni nee daaqaywós.

¹¹ Nee di/tadá' tar iimbalaxan, nee mooyangwdá' tsuua, kudá' taa tleéhh as gadiyér didaádá' hhoohhoo'. Muruuwí sleémeero ngu tleehhiye' ar adoodár kilá' aníng kuúng ura hara'ayiím.»

Sabaáto, deelór hungu/uma

¹² AAKOÓ MUNGÚ Mose guri báy,

¹³ «Múk Israeli ku beer, ‹Deelor'eé' ar Sabaáto harmagahhaak asma deeloorí a layár alqado tla/ángw aníng nee kuungae, nee dír xwaylarhúng sleémeero, as kahhó' kuungá' kawa xua' adór aníng tar AAKOÓ MUNGÚ, kudá' kuungá' nu hhohhoeemiís.

¹⁴ Kuungá' deelór Sabaáto harmagahhaak, asma deeloorí ka hhoohhoo' as kuungá'. Heé deeloorí gaa meetagaas gár kuwa hariím a gaasa. Nee heé gadiyeé gaa tleehh deeloorihe a baynitisa dirhunge.

¹⁵ Gadiyeduhúng tleehhaak deelo lahhooe, ala bál faanqw a baalár Sabaáto ar hungu/uma ar taa paraátl as anuú AAKOÓ MUNGÚ. Heé aa gadiyuus baalaarír Sabaátoro gár kuwa hariím a gaasa.

¹⁶ Gawaá adoorihe xoorór Israeli baalaarír Sabaáto ngi harmagahh nee ngi iialooes baraá xwaylar'ín sleémeero, asma a alqadór alhhe'eesoó koomaaká.

¹⁷ Baalaarí a layár warqawaaká tla/ángw aníng nee xoorór Israeliro, asma anuú AAKOÓ MUNGÚ, doori nee yaamuwo ina tleéhh deelo lahhoó', ala bál faanqwe gadiyeé ana máw niri hungu/uús.› »

¹⁸ Qoomár Mungú axweesantá dír Mose ngiwa hhe'eés gawaá tloomár Sinairo, Mose guri tlaa/eedá' tsáp awa parereehhayénií haniís, kudá' Mungú aa hara'ayaarós i gooín ar dakós oo kilá'.