TI'INAANGW 30 - Biblía Axweesantá Hhohho' ar Mungú 2004

Kitángw mooyángw tsuú' kuwa da/aa/an

¹ «Kuúng kitángw mooyángw tsuú' kuwa da/aa/an tleehheek ar xa'anoó masqaryaandi as tawa dír ilahhooár mooyángw tsuú' kawa da/aa/an.

² Tlenaangós umuú barto a sentimiíta mibeeri tsiyáhh nee kooán, tlenaangós iimír baráy wá ooha ay gawa a sentimiíta mibeeri gwaleél, xareemiiwós masók ti alkoná' tlehhmuwo nee kitangwdá'.

³ Kitangwdá' sleémeero ku ninkiríts ar sahaábuú hhohhó', nee daanduuwós kuduú gawa nee bihheerós sleémeero nee xareemiiwose. Daqaní kankeemoowós ki sahaábúr tléhh.

⁴ Daqaní duungoó tsár oo sahaábu ku tléhh, ku qás biihhaá baraay awa gangeefaydá' badu tsaraawo masók ti afe qoná'. Dungáysíng kun xaaií dahmiis qoomár bar ku loohiis.

⁵ Xaa'aá loohiso ki masqaryaandír ar tléhh, ki ninkiríts ar sahaábu.

⁶ Kitaanguú ilahhooa ku qás daanduú tsee/a oo inqwaaridá' do' gwaa tla/a qasis, bihhaá sandakmoó alqado, geeraá kitángw gurtleemu kuduú gawaá sandakmoó alqado, didá' án nee kuúng tay dogitaan.

⁷ Umuúqo matlaatleero qoomár Aroni bir tsaa'asór da/tá áy, ilahhooár mooyángw tsuú' gan gawaá kitaángwí da/tá áy.

⁸ Qoomár tsiindoowo bira tsaa'asór da/tá áy ilahhooarír mooyángw tsuú' gan daa/ sleeme. Ilahhooarír mooyángw tsuú' koom an hanmisá' dír AAKOÓ MUNGÚ umuúqo qarto ay qari sleémeero.

⁹ Mooyángw daa'awtá hatlá' oo hhohhoeeká mu gawaá kitaangwií duuxara' laqaá tam ilahhooár da/a/aangw, laqaá ar balaangw, laqaá ar tsipipi'iimis.

¹⁰ Aroni haraki/sa ngi tleehhi gawaá xareemaá kitangwdá' baraá kurko sagaáwa wak. Gár haraki/isa ngir tleehhi a tseerér ilahhooár tlakweema hingeesa, tidá' ta hanmiisi sagaáwa wak umuúqo kurko baraá umuúqo qarto, asma kitangwsíng ku ló'wa hhoohhoó' dír anuú AAKOÓ MUNGUHE.»

Ohmér heémár Mungú

¹¹ AAKOÓ MUNGÚ Mose guri báy,

¹² «Qoomár bar xoorór Israeli a faarór eér, umuú heewo gár hhiintluuwós ngur tu/i baraá dabaeene ngi bui, as kahhó' tiqtír tlakw mingiwa sleér qoomár birki fadiit.

¹³ Umuúqo heé ta faari gár i haniisi a tí: Tlaqtá sheleéli gan haniis ar harqoomoó didá' hhoohhoo'. Gaarí an ilahhooár ni anuú AAKOÓ MUNGÚ haniisi.

¹⁴ Umuúqo heé taa faari iimír kureeri mibeeri tsár wá tleemu ay múk urén sleémeero ilahhooarí ngi dír anuú AAKOÓ MUNGÚ i hanisiye'.

¹⁵ Daqaarmo peésár dír tihe waraahh mingiwa huúw, laqaá narkutmo peésár tlaqtá tihe aa /aaruur mingiwa huúw, qoomár anuú AAKOÓ MUNGÚ bir ilahhooarí hanmisá' as haraki/isarhúng.

¹⁶ Kuúng peésasíng tinda huúw as haraki/isa ka ilaaót dír múk Israelír wa alé, daqaní afér heémaadár Mungú ngi tlaq, as kahhó' peésaarí aníng iwa inslawtamis daanduú múk Israeliwo, asma peésaarí slafingw'ín guna tú/.»

Iimpeér muqslír sirdaa/aat

¹⁷ AAKOÓ MUNGÚ Mose guri báy,

¹⁸ «Iimpér hamtlo tleehheek ar muqslír sirdaa/aat, kitaangós ku tléhh ar muqslír sirdaa/aat, ka qás tla/ángw heémár Mungú nee kitángw ilahhooa kawa da/aa/an, daqaní ka ma'áy qás.

¹⁹ Aroni nee daaqaywós ma'aaysingá' ngin dabaaín ar hamatliyá' nee ya'aaine.

²⁰ Dír nira dahi'iiká baraá heémaadár Mungú, laqaá dír nira naka/i'iiká dír ilahhooa as iwa gadiyusiya' as anuú AAKOÓ MUNGÚ iwa ilahhooár da/atí hanisiya', nin ala hamtliná' as kahhó' mindiwa qatliyé'.

²¹ Inooín daba' nee ya'aawo ngin hamtliitiyá'. Adoorí ngi tleehhiye' as kahhó' mindiwa qatliyé', asma gaarí an dákw kumamiít daqisleém dír Aroni nee xwaylarose nee umuúqo qarto.»

Di/tá imbalaxaangw

²² AAKOÓ MUNGÚ Mose guri báy,

²³ «Muruuwí afhhamít taatahheek, mooyángw manemane kuduú ma'aay oo harqoomoó kílo lahhoó' nee xa'anoodá' ta bay dalasini oo mooyángw koóm oo kílo tám huwang, nee miíwa oo mooyángw koóm kílo tám huwang.

²⁴ Kílo lahhoó' ar daa'awtá hatlá' ar dalasini huwang ar harqoomoó didá' hhoohhoo', nee kílo tsiyáhh ar di/tá seituúni.

²⁵ Di/aysíng sleémeero un aleedók as kahhó' di/tá iimbalaxaangw kawa tlehh ar adór tidár múk mooyángw tlehhahhiít. Gadiyér di/tisíng a partlitór mura'.

²⁶ Di/tí ka iimbaláx ar heémaadár Mungú nee ar sandakmooduú Alqado.

²⁷ Ka male iimbaláx ar kitángw ilahhooa nee xooslaarose, nee ar kitángw tsaa'aso nee xooslaarose, nee ar kitángw ilahhooár mooyángw tsuú' koóm kuwa da/a/aangw.

²⁸ Ka iimbaláx ar kitángw ilahhooár da/a/aangw kuwa hanmamisi nee xooslaarose, nee ar iimpeedár hamtlo nee kitaangose.

²⁹ Muruusíng hhohhoeeseek as kahhó' kuwa ló'wa hhohhó', nee as kahhó' umuúqo gár xooslaasíng ga kwatiita aqo in hhoohhoouúr.

³⁰ Daqaní Aroni nee daaqaywose ki di/tisír ar iimbaláx as kiwa paratl as kahhó' inooín tawa kaahamuusér aníng i sagadiyuus.

³¹ Kuúng xoorór Israeli ka beer, ‹Di/tí a te'eé' ar hhohho' ar tar iimbalaxaanda' umuúqo daqto baraá qari sleémeero.

³² Di/tí makawa baloó umuúqo heé wár iimbalaáx, slám di/tá hatlá' ar slaqás nee tí makawa tleéhh, asma di/tí ka hhohho', nee tam dirhunge ka hhohho' sleeme.

³³ Heé di/tá adór tí gaa tleehh nee heé di/tí gaa heé iwa harindaakár iimbalaax, heé adoorí gaa tleehh a baynitisa.› »

Mooyaangw

³⁴ AAKOÓ MUNGÚ Mose guri báy, «Qoomoó alqoóm oo muruuwí tsuú' slaweek, moqonjoó xa'anoó ta bay natafi, nee oo xa'anoó ta bay shekeleti nee oo xa'anoó ta bay kelbena nee mooyángw tsuú'.

³⁵ Mooyángw tsuú' tleehheek ar muruusíng adoodá' kur tlehhahhiiti nee mukdá' mooyaangw gu baál tlehhtuuwo, díwtií qaaseek as kahhó' kuwa hhohhó' nee as kuwa paraátl as aníng.

³⁶ Daqaní ku bahh xósl ay dír i natsatsauuti, kuri bahh qás dír geeraá sandakmooduú alqado baraá heémaadá' aníng nee kuúng ti dogagitaan. Daqaní mooyangwsíng dirhunge kwa ló'wa hhoohhooeés.

³⁷ Mooyángw adór kwí mukuwa tleéhh baloó ale, as kuungá' kuwa slikiinda', asma mooyaangwí masók kuungá' un tsahhá' tawa mooyángw taa hhoohhooeés as anuú AAKOÓ MUNGÚ.

³⁸ Heé mooyángw daa'awtí gwaa tleehh as slikiingós a baynitisa.»