TI'INAANGW 3 - Biblía Axweesantá Hhohho' ar Mungú 2004

Mose kuwa ateét nee Mungú

¹ Looarka wake Mose iwa daqtá bee/ángw de'en oo Yetro, taatoó hareerós, kaahamusmoó Midiani, daqtí gana de'éngw áy gayuú darma bihhaá /uwa, iri hardáh ay Horebu tloomár Mungú.

² Amoodae malaykamoó AAKOÓ MUNGÚ guri harati'iít ar tsángw asla baraá tla/ángw kitikiinti. Mose iwa qaytsiít, naxés kitikiinti asla ga /agká.

³ Aluuwo Mose iri oó', «Xáda xáy, aníng a haratseewúw as ngiwa ara hhe'ees, gaarí kitikiinti asla ngiwa al'ot ala ga /agká.»

⁴ Qoomár AAKOÓ MUNGÚ ngiwa ár Mose i amór kitikiintidá' i tseewuwúy, Mungú guri ateét baraá tla/ángw kitikiintidá' wa alé, i kaahi, «Móse, Móse!» Mose iri oó', «Aníng a diirí.»

⁵ Aluuwo Mungú guri báy, «Ma diirí tseewuwaar. Ya/ataawók duuxeek baraá ya'aawoge, asma diirí kuúng tawa sihhmit a dír hhoohhoo'.»

⁶ Mungú iri malé oó', «Aníng a Munguú baabuúwók, Munguú Abrahamu, nee Munguú Isaka nee Munguú Yakobo.» Mose ilaawós giri luú/ asma qaytsitár amór Mungú gana da'ayuút.

⁷ AAKOÓ MUNGÚ guri báy, «Slahh'amaayér muk'eé' kuduú baraá yaamaá Misri aga ár. Aníng /aa/eeín iga axaás, kudá' kiwa slahh'eemisi nee sagesihhtuuser'ín, nee slahh'amuuín u xuú'.

⁸ Aníng nina hardáh asma inooín ngiwa tuu/ baraá dabaá múk Misri wa alé, nee in huúw ay baraá yaamaá hhooá', yaamaá iintlaaxw, yaamaá diihooár ilwa nee dane, yaamuudá' ta hooti nee xoorór Kana'ani, nee ar Hiti, nee ar Amori, nee Perisi, nee Hifi, nee ar Yebusi.

⁹ Qaytsiít, /aa/aá múk Israeli naa hardihiyé' dir'eé', slám slahh'eemisudá' múk Misri ngir slahh'eemisi ugwa ár.

¹⁰ Gimáy daxta, án kuúng u ya/aáw amór Farao, asma muk'eé' kuduú Israeli oo baraá yaamaá Misri nguwa dux baraadae.»

¹¹ Ala Mose guri báy, «Aníng a heemá tam niwa amór Farao kaw, nee múk Israeli nguwa baraá yaamaá Misrír wa duux?»

¹² Mungú iri oó', «Aníng a dinkwa nee kuúng, layár ga laqaqaam adór aníng nee kuúng tar dinkwa a tí: Qoomár bar múk Israeli ngwa baraá yaamaá Misrír wa dúx, anuú Mungú iri gawaá tloomarí wa sluufmisá'.»

¹³ Mose Mungú guri báy, «Qaytsiít, aníng bara hardáh dír múk Israeliwo, nguwa baw, ‹Munguú baabi'iihúng aníng ina ya/aáw amorhúng,› inooín aníng bira yaahasiyé', ‹Umuuwós a heemá?› aníng mi báw?»

¹⁴ Mungú Mose guri báy, «ANÍNG A DEER, KUDÁ' QAROÓ DAADÁW.» Guri báy, «Adoorí an adór ta o' dír múk Israeliwo, ‹Kudá' ta bay ANÍNG A DEER, iga amorhúng i ya/aáw.› »

¹⁵ Mungú Mose guri malé báy, «Múk Israeli gár ku beer a tí: AAKOÓ MUNGÚ, Munguú baabi'iihúng, Munguú Abrahamu, nee Munguú Isaka, nee Munguú Yakobo, aníng iga amorhúng i ya/aáw. Umuuwós an kwí ay alhhe'eesay wasle, nee adoorí an adór tir inslaslay baraá qari sleémeero.

¹⁶ Tláw, bariisér Israeli dinkwár i burumbureek, ki beer: AAKOÓ Mungú, Munguú baabi'iihúng, Munguú Abrahamu, nee Munguú Isaka, nee Munguú Yakobo, aníng ina harati'iít iri báy, ‹Inooín ádbaweek adór ngira i hardáh nee slahh'amuudá' taa sláy baraá yaamaá Misriro ugwa ár.›

¹⁷ Aníng adór kuungá' nur duúx baraá slahh'amusuú yaamaá Misriro aga oó', nuri dahaás baraa yaamaá xoorór Kana'ani nee ar Hiti, nee ar Amori, nee ar Perisi, nee ar Hifi nee ar Yebusi, yaamaá diihhooár ilwa nee dane.

¹⁸ «Inooín afoorók ngi axaasiyá', kuúng nee bariisér Israeli ta amór waawutmoó Misri keerá', ku beera', ‹AAKOÓ MUNGÚ, Munguú múk Ebrania, nee atén tina doogaán. Daxta u firiimaán, ya/aám haniisang tawa tlawaan deelo tám baraá xaanxaay, as ilahhooár muruú ta tsu/i kawa hanisaan dír AAKOÓ MUNGÚ Munguúrén.›

¹⁹ Aníng a xuú' waawtumoó Misri ya/aám ngi haniisiiká' tawa tleera', burkwa /uurutisiiká ar dákw /uuruú koóm.

²⁰ Aníng dakw'eé' un gáwtí tleés, yaamaá Misri ngiri slaáhh ar waa/oo/amor'eé' sleémeero tidá' ni tleéhh tla/angw'ín wa alé, daqaní waawutmo nuri ya/ámár i haniis tawa tleera'.

²¹ «Aníng mukwí oo Misri un gur'e wananaeés as kahhó' qoomár bar tlatleerá' tawa dabaá kaaharen ar tleera'aaká.

²² Ala umuú /ameenír Ebrania inslaawto'oorós ar Misri, nee dahaayo'ór do'ós i diriia, gin firiín muqslár peesaaro nee sahaábuwo nee tlabaawo, kuungá' kiri dahsá' dír na/iihúng awa daaqaay nee awa dasuuwo. Kuungá' xooslaá múk Misri kari haasaáng wa ar tleerá'.»