TI'INAANGW 29 - Biblía Axweesantá Hhohho' ar Mungú 2004

Dabér Aroni nee daaqaywós kir paraatli tawa kaahamuusér Mungú

¹ «Muruuwí tleehheek dír Aroni nee daaqaywós as kiwa paratl tawa kaahamuusér aníng i sagadiyuus: Tsa/atamoó awu na slaweek, nee gwaandaawér tsár ar xaslxaansli wasl,

² nee mikaátér ta sluuftisiiká nee mandasoó taa sluuftisiiká oo taa tleéhh ar di/i, nee mikaátér ninakw ar taa tleéhh ar di/i nee ar taa sluuftisiiká, muruuwí sleémeero gár kur tlehha' a puuruú natsaatsaá' oo angaáno.

³ Mikaátedá' ka qás baraá katati, daqaní ngi hanís aníngí ale, dinkwa nee awuudá' nee gwaandaaweedá' tsaraawo.

⁴ «Daqaní Aroni nee daaqaywose ki húp ay dír afkú heémár Mungú, ki hamátl ar ma'aay.

⁵ Aluuwo tlabaadaá kahamuusi'iima ki Aroni dahás, hiyaydá' tleér nee kudá' ququmaare, nee naifeéra nee tlakwayduú da/eewo. Himuudá' taa tleehhamo hhe'eés oo naifeéra ku afeetloowós i tsék.

⁶ Kofiyaádá' ka dahás gawaá sagós, slamangwdá' hhoohhoó' ku gawaá kofiyaádá' i qás.

⁷ Muruuwí bura hhe'és tleehhamooro, ku di/tár iimbaláx as kuwa baraá gadiyeédií dahas.

⁸ «Daqaní daaqoó Aroni ngu húp ki tsiitís ar hiyi'iidá' tlet.

⁹ Him'eedár afeetler'ín an tsék, nee kofiyaduín kiri dahás. Asma adoorí an adór Aroni nee daaqaywós kir hhohhoes tawa kaahamuuser'eé' daqisleém.

¹⁰ «Daqaní tsa/atamoodá' ngu húp dír heémár Mungú as Aroni nee daaqaywós dabaaín ngiwa qaasiya' gawaá ságw tsa/atamoowí.

¹¹ Daqaní tsa/atamoodá' ku gás dír geeraá AAKOÓ MUNGÚ didár dahmaá afkú heémár Mungú.

¹² Tseerér niina ar awuudá' ka taatáhh, nee ka slík ar ditsaawók baraá xareemidaá kitángw ilahhooa, nee tseeredár hatlá' aa met ka ku'ús baraá ya'aá kitángw ilahhooa.

¹³ Daqaní wayo sleémeero awa baraá waqát nee daeero nee gumbayaaya' nee wayoodá' gawaawose, sleémeero ki dá/ gawaá kitángw ilahhooa.

¹⁴ Ala fu'unaá awuudá' nee kaahartose nee saankarose ki da/tá eér tsee/aá didá' kuungá' ti diria', asma ilahhooarí ar dakuús hingeesa.

¹⁵ «Gwaanduú wák baraá gwaandaaweedá' tsare taatahheek, daqaní Aroni nee daaqaywose ki ádbeér dabaaín ngiwa qaasiya' gawaá sagós i ale.

¹⁶ Kuúng gwaanduudá' ku gás, daqaní tseereerós ka hikimís gawaá kitángw ilahhooa baduwós tsiyahhaawo.

¹⁷ Daqaní gwaanduudá' ku supiín, waqatuuwós ku hamátl nee ya'aawose, sleémeero ki dinkwárí qás nee sagose.

¹⁸ Daqaní fu'uunaydá' sleémeero ki dá/ gawaá kitángw ilahhooa as ilahhooadár da/a/aangw ngiwa aníng i hanis, slaahhareeridá' tsuú' awa ilahhooadá' anuú AAKOÓ MUNGÚ iri sla'atisiyá'.

¹⁹ Kuúng gwaanduduú hatlá' ku léhh, daqaní Aroni nee daaqaywós dabaaín ngi gawaá ságw gwaandudií qaasiye'.

²⁰ Daqaní ku gás, tseereerós ka bahh taatáhh, ka slík ar sagér iaá doó /iyáy awa Aroni nee awa daaqaywós, nee dugeenaá dabér doó /iyáy, ka male slík nee ar dugeenaá ya'aá doó /iyáy, tseerér aa met ka hikimís gawaá kitangwduú ilahhooa baduuwós sleémeero.

²¹ Tseereedár gawaá kitángw ilahhooárí dirii' ka bahh taatáhh, nee di/tadár iimbalaxaango ka tsipipi'ís gawaá Aroni nee gawaá tlabaawós, ka male tsipipi'ís gawaá daaqaywós nee gawaá tlabaaín. Daqaní Aroni nee daaqaywose kaa hhoohhooeés tawa kwe'eé' nee sleémeero.

²² «Di/tá gwaandudá' sleeme ka hingés, nee hhayshowose, nee wayoodaá baraá guruuwo, nee daeero, nee gumbayaayá' tsaraawo, nee tlawanqár gawaawose, nee yaaeerós ar doó /iyayhe. Asma a gwaanduú inooín kira paraátl as gadiyér Mungú.

²³ Baraá katatidár dír geeraá AAKOÓ MUNGÚ diriia, tidá' mikaátér taa sluuftisiiká ga koóm, mukaatmoó wák ku taatáhh nee mandasamoó wák oo taa di/tár tleéhh nee mukaátmoó wák oo niiná.

²⁴ Muruuwí sleémeero dír Aroni nee daaqaywós ti hanis, inooín ngi gáwtí tleesiye' as tawa slaqsoó ilahhooár tinda anuú AAKOÓ MUNGÚ i haniís.

²⁵ Muruuwí ku dir'ín wa ar tleér ku dá/ gawaá kitángw ilahhooa dinkwa nee ilahhooadá' ta da/a/an as tawa slaahhareeraá aníng i sla'atimiisá'. Asma gaarí an ilahhooadá' ta hanmiisi dír AAKOÓ MUNGÚ ar loohirí kawa da/aa/an.

²⁶ «Daqaní da/eewaá gwaanduudá' taa Aronír hhoohhooeesi ki taatáhh, daqaní ki gáwtí tlés adór gár taa AAKOÓ MUNGÚ hanmiisi, daqaní da/eewosíng a kók.

²⁷ «Qoomár kaahamusmoó Mungú bar ku paraatl as Mungú, da/eewo nee manguduú alu oo gwaanduudá' taa kaahamusmór paraátl, kingi amor'eení huwi as kiwa paraatli ar loohír kiwa gáwtí tleesi, daqaní kari hanís dír Aroni nee daaqaywós.

²⁸ Gawaá adoorihe xoorór Israeli daqisleém baraá ilahhooar'ín tidár wayda i hanmamisia dír AAKOÓ MUNGÚ, da/eewo nee manguú aluuwo kin haniis dír Aroni nee daaqaywós. Gaarí an ilahhooar'ín ar wayda ar ta haniisi dír AAKOÓ MUNGÚ.

²⁹ «Barnaxés Aroni aa gwaá' tlabaawós kudá' hhohho' ki daaqaywós i haniis, inooín ngin dahaasiyá' bál birki iimbalaax nee ki dákwí qaas.

³⁰ Garmoó Aroni oo gadiyér aakoó dooín ga óh, tlabaádá' hhohho' gin dahaas deelo faanqw ar iwa gadiyuusi didá' hhoohhoo' ar heémár Mungú.

³¹ «Daqaní kuúng fu'unaá gwaandudá' kira parátl ki humiín didá' hhoohhoó' wa ale.

³² Aroni nee daaqaywós fu'unaasingá' ngi /ayiye' dír afkú heémaadá' wá ale, dinkwa nee mikaátedá' baraá katatírí diri'.

³³ Inooín muruudá' sleémeero kira paraátl nee kira baraá gadiyeédí qaás ngu /ayiye', ala heé hatlá' mingiwa /aáy, asma kaa paraátl as AAKOÓ MUNGÚ.

³⁴ Baraá fu'unaydá' nee mikaáteéro miwa gaa mét ay bál tsár, ala birna meetiyé' ki dá/ baraá asla, mikiwa /aay asma kaa hhoohhooeés.

³⁵ «Muruuwí un tléhh dír Aroni nee daaqaywós ar adoodá' ura hara'ayiím, in parátl deelo faanqwe.

³⁶ Slám umuú deelooro awu un hanmís, as tawa ilahhooár tlakweema hingeesa as haraki/isa kawa tlehh. Daqaní didá' ilahhooa kawa hanmamiisi aga hhoohhoés, di/i ka gawaadá' i tsipipi'ís as kawa paratl.

³⁷ Kuúng ilahhooa an hanmís deelo faanqw as kitángw ilahhooa kawa harki/ís nee kawa hhoohhooes. Daqaní kitángw ilahhooa kawa hanmamisi ku ló'wa hhoohhoó', as kahhó' umuú gár gu kwatiita aqo in hhoohhoouúr.»

Ilahhooár umuú baalaaro ta hanmiisi

³⁸ «De'emaá hi'iita'a umuú daqto ilahhooár ta hanmisa' dír kitángw ilahhooaro a tí: Deeloó tsár oo bee/aangw oo kurkú wák.

³⁹ Oo wák matlaatleero un gás nee oo tsár qoomár tsiindo.

⁴⁰ Gwaanduduú matlaatle un hanís dinkwa nee kílór wák ar puuruú natsaatsaá', oo taa aledoók nee di/tá hhohho' ar har liítár wák nee difaáír liíta wak, as kahhó' tawa ilahhooár muruú wahaangw.

⁴¹ Sleeme deelmooduú tsár un gás qoomár tsiindoowo, kuri ilahhooár wa hanís dinkwa nee ilahhooár balaangw nee ar wahaangw, adór kuduú matlaatle, ku dá/ baraá asla, slaahhareeraá ilahhooasíng anuú AAKOÓ MUNGÚ iri sla'atisiyá'.

⁴² Ilahhooasír da/a/aangw umuú daqto kan hanmiis baraá qari sleémeero ar hi'iita geeraá afkú heémár Mungú, didá' aníng nee kuungá' ti dogitaan nee niwa amorhúng i axwees.

⁴³ Aníng nee xoorór Israeli tin didaádií dogiitaán, nee xirfuueé' heémaadá' gari hhoohhoees.

⁴⁴ Aníng heémaadá' ti dogiitaan ngari hhohhoeés dinkwa nee kitángw ilahhoa kawa hanmamisi. Tam Aroni nee daaqaywose sleeme in hhoohhooeés as inooín tawa kaahamuusér aníng i sagadiyuus.

⁴⁵ Aníng nari hoót baraá tla/ángw múk Israelír wa alé. Aníng tari Munguúín.

⁴⁶ Daqaní xoorór Israeli aníng iri tsáhh adór tar AAKOÓ MUNGÚ Munguúín, kudá' inooín gaa duux baraá yaamaá Misrír wa ale, as niwa baraá tla/angw'ín wa hoot, aníng an AAKOÓ MUNGÚ Munguúín.»