TI'INAANGW 28 - Biblía Axweesantá Hhohho' ar Mungú 2004

Tsitoó kaahamuusér Mungú

¹ «Kuúng Móse, tláw hhiyaawók Aroni nee daaqaywós Nadabu, nee Abihu, nee Eleasari nee Itamariwo paraatleek dír xoorór Israeliro, as tawa kaahamuusér aníng i sagadiyuus.

² Kuúng daqaní hhiyaawók Aroni ku tlabaá hhohhó' i tléhh, kahhó' bar ku ga/áy tawa heé xiríf nee oo hhoohhoó'.

³ Kuúng mukdá' tlaba' tlehhtuuwo gi baál ádbaweek, kudá' aníng naa fuqurángwí haniís, Aroni ngu tlabií tleehhiye' as kuwa paraatli as gadiyér'eé' ar kahamuusi'iima.

⁴ Tlabaá ta tleehhi a kuká': Tlakwayduú gawaá da/eewo nee naifeéra nee hiyoó ququmaár, nee hiyaydá' tleér taa qaalín, nee kofiyá nee himuú afeetlo. Tlabaaká' hhiyaawók Aroni nee daaqaywose kin dahamiis as kahhó' tawa kaahamuusér aníng i sagadiyuus.

⁵ Mukdá' tlabaá tlehhiít, tlabaaká' ki tleehhi ar neewór taa tleéhh ar sahaábu nee ar se'éngw bee/aangw ar sirbo/, nee ar sirdaa/aten, nee ar da/aten, ar taa tleéhh ar kitaánír hhohho' ar taa hhuútl.

⁶ «Inooín naifeéra ngi tleehhiye' ar neewór sahaábu, nee neewór se'éngw bee/aangw ar sirbo/, nee ar sirdaa/aaten, nee ar da/aten, nee ar kitaánír hhohho' ar taa ló'wa hhuútl.

⁷ Slám naifeérarí ka tlin'aá tsárí tleehhi awa kar gawaá sum'ií tseegi.

⁸ Himuú afeetlo gár kur tleehhi aqo muruudá' naifeéra kara tleéhh, neewór sahaábu nee neewór se'éngw bee/aangw ar sirbo/, nee ar sirdaa/aaten, nee ar da/aten, nee kitaánír hhohho' ar taa hhuútl, himuudá' kuri gawaá naifeéradií hiriit.

⁹ Daqaní tlaa/aá tsár awa ta bay sardoníki ki sleér as umér xoorór Israeli kawa gawaadá' i gooiin.

¹⁰ Umér tlahh'aá lahhoó' ka gawaá tlaa/anoó wakí gooiín, nee umér hatlá' lahhoó' gooimeek gawaá tlaa/anoó hatlá'. Umérí ka gooiín ar adór xwaylaro tira harahariyé'.

¹¹ Umeesíng gooimeek adór kareeramo laya ngir gooaain, kari qaaliín kari qás gawaá qoloqoloó sahaábu.

¹² Tlaa/eedá' tsaraawo kin qaas gawaá daanduú naifeéra, Aroni ngi tseegi gawaá sum'iiwós bir dír geeraá AAKOÓ MUNGÚ káy, as tawa inslaslángw tlahh'aá mibaá nee tsár awa xoorór Israeli.

¹³ Kuúng qoloqoloó tsár tleehheek oo sahaábu.

¹⁴ Himtaawér tsár tleehheek ar sahaábuú hhohhó', ka hhútl adór himuú wa ale, nee himtaaweesíng ka tsék gawaá qoloqoláydá'.»

Tlakoó da/eewo

¹⁵ «Kuúng tlakoó gawaá da/eewo ku tléhh, oo sla'aarír Mungú kar tsaahhi. Ku tleehhi nee heé gu baál tleehhamooro, ar adór naifeéra kara tleéhh ar neewór sahaábu nee neewór se'éngw bee/aangw ar sirbo/, nee ar sirdaa/aten, nee ar da/aten, nee ar kitaánír hhohho' ar taa hhuútl.

¹⁶ Tlenaangós nee uroó bihheero i alqone', tlakwaywí kun wageeqáy, tlenaangós a sentimiíta mibeeri tsár nee tsár, nee uraywo sleeme.

¹⁷ Kun parootuus ar hha'aá tsiyáhh awa tlaa/aá tlaxo uren, hháw geera gár kur uhisi a tlaa/aá ta bay akiíki, nee awa topaási nee miislír da/aten.

¹⁸ Hháw tsár a tlaa/aá ta bay sumariídi nee yakuútír sirboo/, nee miisli.

¹⁹ Hháw tám a tlaa/aá ta bay yasínto nee akiíkír da/aten nee awa ta bay ametiísto.

²⁰ Hháw tsiyáhh a tlaa/aá ta bay sambarajaádi nee shohaámu nee yáspi. Tlaa/eeká' sleémeero kin qaas baraá qoloqoloó sahaábu.

²¹ Tlaa/eedá' a mibaá nee tsár awa umér tlahh'aá mibaá nee tsár awa xoorór Israeli ki gooin. Umuúqo tlaa/anoowo tari adór laya ar sihhmiit daanduú tlahhoó wák baraá tlahh'aá mibaá nee tsár awa múk Israeliro.

²² Kuúng himtaawe tleehheek ar sahaábuú hhohhó' ar taa hhuútl adór hima as tlakwayduú da/eewo.

²³ Duungoó tsár tleehheek ar sahaábu gawaá tlakoó da/eewo, daqaní ku hirít gawaá pasleemaá tsár awa tlakwaydá'.

²⁴ Himtaweedá' tsaraawo ar sahaábu ka tsék gawaá duungayduú tlakoó da/eewo.

²⁵ Sagér himtaweedá' tsár ar sahaábu ka tsék gawaá daanduú qoloqoláydá' taa qás gawaá daanduú naifeéra.

²⁶ Duungoó tsár tleehheek ar sahaábu, ku qás gawaá tsaafír baraay guruú tlakwáy wa ale bihhaá naifeéra.

²⁷ Duungoó hatlá' tsár tleehheek ar sahaábu, ku qás gawaá pasleemaá geera kudaá baraay awa naifeéra, didá' naifeéra nee himuú afeetlo ti doogiyé', kudá' taa tleéhh nee heé gu tleehhmo baál.

²⁸ Tlakwayduú da/eewo kun tseek gawaá naifeéra ar duungaydá', kuri tseek ar him'ér sirbo/, as tlakwaydá' miwa slakwewe'eét ala i kita hhe'eesi gawaá himuduú afeetlo oo ta tleehhi nee heé gu tleehhamo baál.

²⁹ «Naagáy qoomár Aroni bir dah dír hhoohhoó' i aleeró, tlakwayduú da/eewo ngun dahaas, kudá' sla'aarír Mungú kar tsaahhi oo taa umér tlahh'aá xoorór Israelirí gooín, as kahhó' tawa inslaslaangw dír geeraá AAKOÓ MUNGUHE daqisleém.

³⁰ Kuúng gawaá tlakwayduú da/eewowo tlaa/eedá' ta bay urimu nee tumimu ki baraadá' i qás, ni tarereamiitiye' gawaá da/eewaá Aroni wa ale, umuúqo bar ni amor'eé' káy. Qoomár barni amor'eé' káy tlakwaydá' munguwa baloó máy dahaasaro, as kahhó' gár aníng ni slaa' tleehhamooro daanduú xoorór Israeliro ngiwa tsaahhi.»

Tlabaá hatlá' awa kaahamuusér Mungú

³¹ «Hiyaay hiriteek ar neewór sirbo/ ar se'éngw bee/aangw oo ta guruú naifeérár wa dahamiisi.

³² Ku ístí tléhh, daqaní istasíng ka hhamaángwí tléhh, as kahhó' istadá' miwa feehhít.

³³ Afaayeerós ar baraay ka harweeri ar slaqsoó mamaá komamaángár sirbo/, nee ar sirdaa/ate, nee ar da/aten. Mitingartá sahaábu sleeme ka tléhh baraá tla/eeraá komamaángadá'.

³⁴ In tla/eeri slahhaán komamaánga gár aluudá' a mitingari, ay dír ki harwet.

³⁵ Aroni hiyaysíng ngu dahamiisi a qoomár bir gadiyeérós ar kaahamusi'iimár tleehh, nee afór mitingaraydá' ka axamiis qoomár bira dáh dír geeraeéní ale, nee qoomár bir ti'iimiit daqaní inós ku gaasiiká.

³⁶ «Daqaní parereehhamtá sahaábu hhohhó' ka tléhh ar adór laya nee /aymi'iiká' ki gooiín gawaadá' i ale, awa kaaha', ‹Gaarí kaa paraátl as AAKOÓ MUNGÚ.›

³⁷ Parerehhamtidár sahaábu ka tsék ar himuú sirboó/ amór geeraá kofiyá.

³⁸ Aroni parereehhamtí ngin gawaá gitse/aawósí qaas, nee gawaá parereehhamtihe lo'odu nee tlakweema sleémeero awa xoorór Israeli naa tleehhiyé', qoomár niwa ilahhooár hhohhó' hanmisiya', ngin gagaar, aníng ilahhooadá' ngari ya/aám.

³⁹ «Aroni ku hiyaydá' ququmaárí tléhh oo taa qaalín ar kitaánír hhohho', nee ku slamaángwí tleehhi ar kitaánír hhohho', nee himuú afeetlo ku ló'wa qaalin.

⁴⁰ «Daaqoó Aroni ku hiya'aá ququmadií tléhh nee him'ér afeetle nee kofiyadu, masók birki ga/áy ki xirfayen nee ki hhohho'.

⁴¹ Hhiyaawók Aroni nee daaqaywose in tsiitís ar tlabaasingá', daqaní ki iimbaláx di/to, kiri dákwí qás as kiwa paratl tawa kaahamuusér aníng i sagadiyuus.

⁴² Suruwaánoó kitaáni ti tlehh, ku hirít inooín i ale, ar ni gawaá afeetloó wa tlaw ay gawaá naawdu as /aankwetsuuín kuwa lu/i.

⁴³ Suruwánaywí Aroni nee daaqaywose ngun dahamiisiyá' umuúqo barni baraá heémár Mungú kayá', laqaá barta dír kitángw ilahhooa káy, as gadiyér'ín ar kaahamuusi'iima ngiwa tleehhiya'. Adoorí birnga tleehhi'iiká, tlakweema ngaa tleehhiyé' nee nin qatliyá'. Dakwí i warqayká dír Aroni nee daaqaywose ay kureér.»